குடி போதையில் தகராறு செய்த தம்பியை கத்தியால் குத்திக் கொன்ற அண்ணன்

ஆத்திரம் அடைந்த தனசேகர் அவரின் அருகே கிடந்த கத்தியை எடுத்து நீலமேகத்தை சரமாரியாக குத்தி உள்ளார். இதில் படுகாயம் அடைந்த நீலமேகம் சம்பவ இடத்திலேயே ரத்த வெள்ளத்தில் இறந்து உள்ளார்

முத்தாண்டிகுப்பம் பகுதி

கடலூர் மாவட்டம் பண்ருட்டி அருகே உள்ள முத்தாண்டிகுப்பம் பகுதியை சேர்ந்தவர் தனசேகர் (34), இவர் தனியார் பால் விற்பனை நிலையத்தில் வேன் டிரைவராக கடந்த சில மாதங்களாக பணி புரிந்து வருகிறார். இவருக்கு திருமணமாகி கருத்து வேறுபாடு காரணமாக மனைவியை பிரிந்து தற்பொழுது தனது பெற்றோருடன் வசித்து வருகிறார்.

இவருடைய தம்பியான நீலமேகம் (32). தற்பொழுது வரை திருமணம் ஆகாமல், எந்த வேலை எதற்கும் செல்லாமலும் வீட்டிலேயே இருந்து வருகிறார், இது மட்டும் இன்றி வீட்டிலேயே இருக்கும் நீலமேகம் பலரிடம் கடன் வாங்கி தினம் தினம் குடித்துவிட்டு குடும்பத்தினரிடம் மற்றும் அக்கம் பக்கத்தினர் உடனும் தொடர்ந்து தகராறில் ஈடுபடுவதை வாடிக்கையாக கொண்டு வந்ததாக கூறப்படுகிறது. இந்த நிலையில் இவருக்கு கடன் கொடுத்தவர்கள் சிலர் வீட்டிற்கு வந்து தினசரி பணத்தை திருப்பி கேட்டு தொந்தரவு கொடுப்பதும் தொடர்  வழக்கமாக இருந்து வந்து உள்ளது.

இந்த நிலையில் கடந்த சில தினங்களுக்கு முன்பு நபர் ஒருவரிடம் ஒரு லட்சம் கடன் வாங்கிய நீலமேகம் அந்த பணத்தை வைத்து கொண்டு குடித்துவிட்டு தினசரி வந்து வீட்டில் உள்ள நபர்களிடம் மீண்டும் தகராறில் ஈடுபட்டு வந்து உள்ளார். இவ்வாறு உள்ள சூழலில் நேற்று முன் தினம் இரவு இதே போல குடி போதையில் வீட்டுக்கு வந்த நீலமேகம் தனது பெற்றோரிடமும், தனசேகரிடமும் தகராறில் ஈடுபட்டு உள்ளார். இதில் ஆத்திரம் அடைந்த தனசேகர் அவரின் அருகே கிடந்த கத்தியை எடுத்து நீலமேகத்தை சரமாரியாக குத்தி உள்ளார். இதில் படுகாயம் அடைந்த நீலமேகம் சம்பவ இடத்திலேயே ரத்த வெள்ளத்தில் இறந்து உள்ளார்.

பின்னர் இது குறித்து அக்கம் பக்கத்தினர் முத்தாண்டிகுப்பம் காவல் துறையினருக்கு தகவல் தெரிவித்தனர். சம்பவ இடத்துக்கு காவல் துறையினர் விரைந்து வந்து உடலை கைப்பற்றி  அரசு மருத்துவமனைக்கு பிரேத பரிசோதனைக்காக அனுப்பி வைத்தனர். பின்னர் தம்பியை குத்திக் கொன்ற தனசேகரை கைது செய்த காவல் துறையினர் இந்த கொலை தொடர்பாக வழக்கு பதிவு செய்து இந்த கொலை தனிப்பட்ட விரோதம் காரணமாக நடைபெற்றதா அல்லது வேறு ஏதேனும் காரங்களுக்காக நடைபெற்றதா என பல கோணங்களில் தொடர் விசாரணை நடத்தி வருகின்றனர். இந்த நிலையில் சொந்த தம்பியையே அண்ணன் குத்தி கொன்ற சம்பவம் பண்ருட்டி மற்றும் அதன் சுற்றுவட்டார பகுதிகலில் பரபரப்பை ஏற்படுத்தி உள்ளது.