கிருஷ்ணகிரி அணையிலிருந்து வினாடிக்கு 400 கன அடி தண்ணீர் : கே.ஈச்சம்பாடி அணைக்கட்டு விவசாயிகள் மகிழ்ச்சி

தொடர்ந்து ஆண்டுதோறும் மூன்று முறை வெள்ளப்பெருக்கு ஏற்படும் தென்பெண்ணை ஆற்றில் கடந்த 3 மாதங்களாக மழையின்றி வறண்டு காணப்பட்டது.

கிருஷ்ணகிரி அணை

கிருஷ்ணகிரி அணையிலிருந்து வினாடிக்கு 400 கன அடி தண்ணீர் தென்பெண்ணையாற்றில் திறக்கப்பட்டுள்ளதால், நிரம்பி வழியும் கே.ஈச்சம்பாடி அணைக்கட்டு விவசாயிகள் மகிழ்ச்சி. கர்நாடக மாநிலத்தில் உருவாகி கிருஷ்ணகிரி, தருமபுரி, திருவண்ணாமலை, விழுப்புரம், கடலூர் மாவட்டங்கள் வழியாக கடலில் கலக்கிறது. தென்பெண்ணை ஆற்றிலிருந்து வரும் தண்ணீர் ஓசூர் கெலவரப்பள்ளி அணை,   கிருஷ்ணகிரி கேஆர்பி அணை மற்றும் திருவண்ணாமலை சாத்தனூர் அணைகளில் நீர் நிரம்புகிறது. மேலும் தென்பெண்ணை ஆற்றின் குறுக்கே தருமபுரி மாவட்டம் கே.ஈச்சம்பாடி அருகில் ஒரு சிறிய அணைகட்டு  கட்டப்பட்டுள்ளது. தொடர்ந்து ஆண்டுதோறும் மூன்று முறை வெள்ளப்பெருக்கு ஏற்படும் தென்பெண்ணை ஆற்றில் கடந்த 3 மாதங்களாக மழையின்றி வறண்டு காணப்பட்டது.

 

தற்பொழுது தமிழகம் மற்றும் கர்நாடக மாநிலங்களில் தொடர்ந்து மழை பெய்து வருகிறது. இதனால் பல்வேறு இடங்களில் நீர் நிலைகள் நிரம்பி வருகின்றன. கடந்த ஒரு வார காலமாக தருமபுரி, கிருஷ்ணகிரி மாவட்டத்தில் தொடர்ந்து மழை விட்டு விட்டு பெய்து வருவதால், பல்வேறு பகுதிகளில் இருந்து வெளியேறுகின்ற தண்ணீர் தென்பெண்ணை ஆற்றில் கலந்து வருகிறது. இதனால் கடந்த மூன்று மாதங்களாக வறண்டு கிடந்த தென்பெண்ணை ஆற்றில் தற்பொழுது தண்ணீர் வர தொடங்கியுள்ளது. இந்நிலையில் தென் பெண்ணையாற்றின் குறுக்கே கே.ஈச்சம்பாடியில் கட்டப்பட்டுள்ள அணை கட்டு நிரம்பி தண்ணீர் ஆற்றில் வழிந்தோடுகிறது.

 

 கடந்த வாரம் பெய்த தொடர் மழையால், தென்பெண்ணை ஆற்றில் நீர்வரத்து அதிகரித்து, கே.ஈச்சம்பாடி அணை நிரம்பி வழிந்தது. தற்போது கிருஷ்ணகிரி கேஆர்பி அணையின் நீர்மட்டம் 52 அடியை எட்டியதால், அணையின் பாதுகாப்பு கருதி, வினாடிக்கு 400 கன அடி தண்ணீர் தென்பெண்ணையாற்றில்  திறக்கப்பட்டது. இதில் சுமார் 200 கன அடி தண்ணீர் கிருஷ்ணகிரி மாவட்டத்தில் உள்ள ஏரிகளுக்கு செல்கிறது.  தென்பெண்ணை ஆற்றில் வினாடிக்கு 170 கன அடி தண்ணீர் வருவதால், கே.ஈச்சம்பாடி அணைக்கட்டு நிரம்பியுள்ளது. இந்த நீர்வரத்தால தொடர்ந்து அணைக்கட்டு நிரம்பி, தண்ணீர் வழிந்தோடுவது பார்ப்பதற்கு ரம்மியமாக காட்சியளிக்கிறது. தொடர்ந்து 1 மாதமாக ஆற்றில் தண்ணீர் செல்வதால், நவலை, பெரமாண்டப்பட்டி, தொட்டம்பட்டி, எம்.வெளாம்பட்டி, கீழ்மொரப்பூர் உள்ளிட்ட  பகுதியில் உள்ள விவசாயிகள் மிகுந்த மகிழ்ச்சி அடைந்துள்ளனர். இதனால் திருவண்ணாமலை மாவட்டத்தில் உள்ள சாத்தனூர் அணையின் நீர்மட்டம் உயர தொடங்கியுள்ளது. மேலும் தருமபுரி, கிருஷ்ணகிரி, திருவண்ணாமலை, விழுப்புரம், கடலூர் ஆகிய 5 மாவட்ட மக்களுக்கு பொதுப்பணித்துறை வெள்ள அபாய எச்சரிக்கை விடுத்துள்ளனர். மேலும் திர் திறப்பு அதிகரிக்க வாய்ப்புள்ளதால், ஆற்றில் பொதுமக்கள் இறங்கவே, கால்நடைகளை மேய்ச்சலுக்கு கொண்டை வர கூடாது என அறிவுறுத்தப்பட்டுள்ளது.