Trichy Airport: தங்க கடத்தல் கூடாரமாக மாறிய திருச்சி விமான நிலையம் - சமூக ஆர்வலர்கள் குற்றச்சாட்டு

திருச்சி விமான நிலையத்தில் அதிகரிக்கும் தங்கம் கடத்தல் , கண்டுகொள்ளாத சுங்கதுறை அதிகாரிகள் - சமூக ஆர்வலர்கள் குற்றச்சாட்டு

திருச்சி விமானநிலையத்தில் தங்கம் கடத்தல்

திருச்சி விமான நிலையத்திற்கு பல்வேறு நாடுகளில் இருந்து விமானங்கள் இயக்கப்பட்டு வருகின்றன. அவ்வாறு இயக்கப்படும் விமானங்களில் தங்கம் கடத்தி வருவதை தடுப்பதற்கான நடவடிக்கைகளை சுங்கத்துறை அதிகாரிகள் மேற்கொண்டு வருகின்றனர். கடந்த வாரம் ரூ.71 லட்சம் மதிப்பிலான கடத்தல் தங்கம் பறிமுதல் செய்யப்பட்டது குறிப்பிடத்தக்கது. மேலும் கடந்த 2 நாட்களுக்கு முன்பு சுமார் ரூ.35 லட்சம் மதிப்பிலான கடத்தல் தங்கம் பறிமுதல் செய்யப்பட்டது. இந்த நிலையில் மலேசிய தலைநகர் கோலாலம்பூரில் இருந்து ஏர் ஏசியா விமானம் நேற்று முன்தினம் நள்ளிரவு 12 மணியளவில் திருச்சி வந்தது. இந்த விமானத்தில் வந்த பயணிகளை சுங்கத்துறை அதிகாரிகள் சோதனை செய்தனர். அப்போது 2 பயணிகளின் நடவடிக்கையில் சந்தேகம் அடைந்த சுங்கத்துறை அதிகாரிகள், அவர்களை தனியே அழைத்து சென்று சோதனை செய்து, விசாரணை நடத்தினர்.

மேலும் அவர்களில் ஒருவரான மலேசியாவை சேர்ந்த ஹோவ் என் பிங்க்(வயது 35) என்பவர் தனது டிராவல் பேக்கில் மறைத்து ரூ.30 லட்சத்து 69 ஆயிரம் மதிப்பிலான 508 கிராம் தங்கத்தை கடத்தி வந்தது தெரியவந்தது. இதேபோல் மற்றொருவரான மலேசியாவை சேர்ந்த மணிவண்ணன்(23) தனது டிராவல் பேக்கில் மறைத்து ரூ.30 லட்சத்து 87 ஆயிரம் மதிப்பிலான 509 கிராம் தங்கத்தை கடத்தி வந்தது தெரியவந்தது. அவர்களிடம் இருந்து தங்கத்தை பறிமுதல் செய்த சுங்கத்துறை அதிகாரிகள், 2 பேரிடமும் தொடர் விசாரணை மேற்கொண்டு வருகின்றனர். நேற்று ஒரே நாளில் திருச்சி விமான நிலையத்தில் ரூ.61 லட்சத்து 56 ஆயிரம் மதிப்பிலான ஒரு கிலோவுக்கும் மேற்பட்ட தங்கம் பறிமுதல் செய்யப்பட்டுள்ளது குறிப்பிடத்தக்கது. மேலும் இந்த சம்பவம் குறித்து சமூக ஆர்வலர்கள் கூறியது.. சுங்கத்துறை அதிகாரிகள் ஒத்துழைப்பு இல்லாமல் ஒரு பிட் தங்கத்தைக்கூட கடத்திவர முடியாது. ஆனால், திருச்சி விமான நிலையத்தில் கிலோ கணக்கில் தங்கத்தைக் கடத்திவருகிறார்கள். இது எப்படிச் சாத்தியம் என கேள்வி எழுப்பினர். மேலும் பல சிறப்புகளைக்கொண்ட விமான நிலையம், தற்போது தங்கம் கடத்திவரும் கூடாரமாக மாறியிருக்கிறது. திருச்சி பன்னாட்டு விமான நிலையத்திலிருந்து மலேசியா, சிங்கப்பூர், துபாய் உள்ளிட்ட வெளிநாடுகளுக்கு விமானச் சேவைகள் நாள்தோறும் இயக்கப்பட்டு வருகின்றன.

குறிப்பாக ஒவ்வொரு விமான நிலையத்திலும் அதிநுட்பமான ஸ்கேனர் இருக்கிறது. அது மனித உடலிலுள்ள நரம்புகள் முதல் தசைகள் வரையிலும் ஸ்கேன் செய்யும் வல்லமைகொண்டது.ஆனால், இங்கு கிலோ கணக்கில் தங்கம் சர்வ சாதாரணமாக வெளியே வருகிறது என்றால் எப்படிச் சாத்தியம்? கஸ்டம்ஸ் அதிகாரிகளின் தொடர்பு இல்லாமல் கடத்தல் தங்கம் வெளியே வர வாய்ப்பே இல்லை. இதுவும் பிரச்னைகள் நடந்த பிறகுதான் நமக்குத் தெரியவருகிறது. இதுபோல் எத்தனை கிலோ தங்கம் வெளியே சென்றது என்று தெரியவில்லை. தங்கத்தைக் கடத்தி வருவதற்குத் திருச்சியில் பெரிய நெட்வொர்க் இருக்கிறது. என தெரிவித்தனர்.