TN Rain: கதிகலங்கிய தூத்துக்குடி மாவட்டம்: காயல்பட்டினத்தில் 94 செ.மீ மழை - மற்ற பகுதிகளின் நிலை என்ன?

தூத்துக்குடி மாவட்டத்தில் கடந்த 24 மணி நேரத்தில் 96.4 செ.மீ மழை பெய்துள்ளது.

மழை

தென் மாவட்டங்களில் கனமழை:

குமரிக்கடல் மற்றும் அதனை ஒட்டிய பகுதிகளில் நிலவும் வளிமண்டல சுழற்சி காரணமாக திருநெல்வேலி, தூத்துக்குடி, கன்னியாகுமரி, தென்காசி, விருதுநகர், மதுரை உள்ளிட்ட தென் மாவட்டங்களில் கனமழை பெய்து வருகிறது. குறிப்பாக திருநெல்வேலி, தென்காசி, கன்னியாகுமரி, தூத்துக்குடி மாவட்டங்களில் அனைத்து பகுதிகளிலும் இடைவிடாது 24 மணி நேரத்தையும் தாண்டிஅதிக கனமழை பெய்து வருகிறது. 

இதனால் அனைத்து நீர் நிலைகளும் நிரம்பி மறுகால் பாய்கிறது. மேலும் அணைகளில் இருந்து நீர் திறந்து விடப்பட்டுள்ளதால் திருநெல்வேலி, தூத்துக்குடி மாவட்டங்கள் வெள்ளத்தில் மிதக்கிறது. எங்கு திரும்பினாலும் தண்ணீர் சூழ்ந்து தனித்தீவு போல காட்சியளிப்பதால் பொதுமக்கள் இயல்பு வாழ்க்கை பாதிக்கப்பட்டுள்ளது. மின்சாரம் மற்றும் தொலைத்தொடர்பு சேவையின்றியும் மக்கள் தவித்து வருகின்றனர். குறிப்பாக, தென் மாவட்டங்களில் ஒரு சில இடங்களில் பால் தட்டுப்பாடும் நிலவி வருவதாக கூறப்படுகிறது. 

கதிகலங்கிய காயல்பட்டினம்:

இந்நிலையில், கடந்த 24 மணி நேரத்தில், தூத்துக்குடி மாவட்டம் காயல்பட்டினத்தில் 94.6 செ.மீ மழை பதிவாகி உள்ளது. திருச்செந்தூரில் 68.9 செ.மீ, ஸ்ரீவைகுண்டத்தில் 62.1 செ.மீ, கோவில்பட்டியில் 52.5 செ.மீ, சாத்தான்குளத்தில் 47.1 செ.மீ மழையும் பதிவாகி உள்ளது.  காயல்பட்டினத்தில் ஓராண்டு முழுவதும் பெய்ய வேண்டிய மழை, ஒரே நாளில் கொட்டித்தீர்த்ததுள்ளது.

திருநெல்வேலி நிலவரம்:

அதேபோல, திருநெல்வேலி மாவட்டம் அதிகபட்சமாக மூலக்கரைப்பட்டியில்  61.5 செ.மீ மழை பதிவாகி உள்ளது. மாஞ்சோலையில் 55.2 செ.மீ, ஊத்து பகுதியில் 49.7 செ.மீ, நாலுமுக்கில் 46.9 செ.மீ, பாளையங்கோட்டையில் 44.2 செ.மீ, அம்பாசமுத்திரத்தில் 43 செ.மீ, சேரன்மாதேவியில் 41.2 செ.மீ, கண்ணடியன் அணைக்கட்டில்  40.6 செ.மீ, காக்காச்சியில் 36 செ.மீ மழை பதிவாகி உள்ளது. மேலும், தென்காசி மாவட்டத்தில் 20.68 செ.மீ, கன்னியாகுமரி மாவட்டத்தில்  11.87 செ.மீ மழை பதிவாகி உள்ளது. 

மீட்பு பணிகள் தீவிரம்:

தென் மாவட்டங்கள் வெள்ளத்தால் சூழ்ந்துள்ள நிலையில், முழு வீச்சில் மீட்பு பணிகள் நடைபெற்று வருகிறது.   80க்கும் மேற்பட்ட பைபர் படகுகளில் மீட்பு படையினர் வெள்ளத்தில் சிக்கியவர்களை மீட்டு வருகின்றனர். இந்திய இராணுவம் மற்றும் கடலோர பாதுகாப்பு  படையினரும் மீட்பு மற்றும் நிவாரணப் பணிகளில் ஈடுபடுத்தப்பட உள்ளனர். முன்னெச்சரிக்கை நடவடிக்கையாக, பாததிப்பிற்குள்ளாகக்கூடிய பகுதிகளில் இருந்து பொதுமக்கள் முன்கூட்டியே நிவாரண முகாம்களில் பாதுகாப்பாக தங்க வைக்கப்பட்டுள்ளனர். தற்போதைய நிலவரப்படி, நெல்லையில் 2,723 பேரும், குமரியில் 517 பேரும், தூத்துக்குடியில் 4,056 பேரும், தென்காசியில் 138 பேரும் நிவாரண முகாம்களில் தங்க வைக்கப்பட்டுள்ளனர் என்று தெரிவிக்கப்பட்டுள்ளது. 

உதவி எண்கள் அறிவிப்பு:

நெல்லை, கன்னியாகுமரி, தூத்துக்குடி, தென்காசி மாவட்டங்களில் வெள்ளத்தால் பாதிக்கப்பட்ட மக்களுக்கு உதவ வாட்ஸ் அப் எண்கள் அறிவிக்கப்பட்டுள்ளது.  பொதுமக்கள் 81485 39914 என்ற வாட்ஸ் அப் எண்ணில் தொடர்பு கொண்டு உதவி கேட்கலாம் என்று தமிழ்நாடு அரசு அறிவித்துள்ளது. மேலும், மாவட்ட அவசரகால செயல்பாட்டு மையங்கள் மக்கள் தொடர்பு கொள்ள எண்கள் அறிவிக்கப்பட்டுள்ளது. அதன்படி, திருநெல்வேலிக்கு 1077, 0462 2501012 என்று தெரிவிக்கப்பட்டுள்ளது. அதேபோல, தூத்துக்குடி மாவட்டத்திற்கு 1077, 0461 2340101 என்று அறிவிக்கப்பட்டுள்ளது.