Thozhi Womens Hostel: ஒவ்வொரு மாவட்டத்துக்கும் ஒரு தோழி மகளிர் விடுதி: அமைச்சர் கீதா ஜீவன் அறிவிப்பு

தமிழ்நாட்டில் ஒவ்வொரு மாவட்டத்துக்கும் ஒரு தோழி மகளிர் பணிபுரியும் விடுதி அமைக்க நடவடிக்கை எடுக்கப்பட்டு வருவதாக அமைச்சர் கீதா ஜீவன் அறிவித்துள்ளார்.

தோழி விடுதி

தமிழ்நாட்டில் ஒவ்வொரு மாவட்டத்துக்கும் ஒரு தோழி மகளிர் பணிபுரியும் விடுதி அமைக்க நடவடிக்கை எடுக்கப்பட்டு வருவதாக அமைச்சர் கீதா ஜீவன் அறிவித்துள்ளார்.

சட்டப்பேரவையில் இன்று பேசிய சமூக நலன் மற்றும் மகளிர் உரிமைத்துறை அமைச்சர் கீதா ஜீவன் கூறும்போது, ''பெண்களின் அதிக பணிப் பங்கேற்பை ஊக்குவிக்கும் வகையில் தமிழ்நாட்டில் ஒவ்வொரு மாவட்டத்துக்கும் ஒரு தோழி விடுதி அமைக்க நடவடிக்கை எடுக்கப்பட்டு வருகிறது.

தற்போது சென்னை, விழுப்புரம், வேலூர் , தஞ்சாவூர், பெரம்பலூர் , திருநெல்வேலி, சேலம், திருச்சி, கூடுவாஞ்சேரி ஆகிய பகுதிகளில் தோழி விடுதிகள் நவீனப்படுத்தப்பட்டு, சகல வசதிகளுடன் செயல்பட்டு வருகின்றன.

மேலும் தாம்பரம், திருவண்ணாமலை, ஓசூர், கிருஷ்ணகிரி, பரங்கி மலை (புனித தாமஸ் மவுண்ட்) ஆகிய இடங்களில் தோழி விடுதி கட்டும் பணிகள் நடைபெற்று வருகின்றன. அதேபோல எல்லா மாவட்டங்களிலும் தோழி விடுதிகளை அமைக்க, இடம் தேர்வு செய்து தருமாறு மாவட்ட நிர்வாகத்திடம் கேட்டுக் கொண்டுள்ளோம். முதல்வர் ஸ்டாலினின் அறிவுறுத்தலின்படி, ஒவ்வொரு மாவட்டத்துக்கும் ஒரு தோழி மகளிர் பணிபுரியும் விடுதி அமைக்க நடவடிக்கை எடுக்கப்பட்டு வருகிறது'' என்று அமைச்சர் கீதா ஜீவன் தெரிவித்தார்.

தோழி விடுதிகள்

தமிழ்நாடு அரசின் 'தமிழ்நாடு பணிபுரியும் மகளிர் விடுதிகள் நிறுவனம்' (TAMIL NADU WORKING WOMEN'S HOSTEL CORPORATION Ltd) சார்பில் இந்த முன்னெடுப்பு தொடங்கப்பட்டது. இதன்படி, சென்னை, செங்கல்பட்டு, பெரம்பலூர், சேலம், திருச்சி, திருநெல்வேலி, தஞ்சாவூர், வேலூர், விழுப்புரம் ஆகிய 9 மாவட்டங்களில் 11 மகளிர் விடுதிகள் தொடங்கப்பட்டன. தோழி என்ற பெயரில் (Thozhi Hostel) இந்த விடுதிகள் இயங்கி வருகின்றன. 

ஒரு நாள் வேண்டுமானாலும் தங்கலாம்

வாஷிங் மெஷின், ஏ.சி., ஆர்.ஓ. தண்ணீர் வசதி, ஃப்ரிட்ஜ், இலவச வை- ஃபை வசதி, உணவு, தொலைக்காட்சி, 24 மணி நேர பாதுகாப்பு, பார்க்கிங், எனப் என பல வசதிகள் தோழி விடுதிகளில் உள்ளன. அதேபோல அயர்னிங், கெய்சர் வசதியும் இங்கு உண்டு. இந்த விடுதிகளில் 15 நாட்களுக்குக் குறுகிய காலமாகவும் தங்கிக் கொள்ளலாம். வாடகையோடு, திரும்பப் பெற முடியும் பாதுகாப்புக் கட்டணத்தைச் செலுத்தி, ஒரு நாள் வேண்டுமானாலும் தங்கலாம். 

கூடுதல் தகவலைப் பெற

தோழி விடுதிகளில் சேர விரும்பும் பெண்கள் 9499988009 என்ற தொலைபேசி எண்ணில் தொடர்பு கொண்டு அல்லது techexe@tnwwhcl.in என்ற இ-மெயில் முகவரிக்கு இமெயில் அனுப்பி, கூடுதல் விவரங்களை அறியலாம். 

முழுமையான விவரங்களுக்கு: http://tnwwhcl.in என்ற இணையதளத்தைக் க்ளிக் செய்து, விடுதிகளின் முகவரி, கட்டணம், முன்பதிவு ஆகிய தகவல்களைப் பெறலாம்.

விரிவாக வாசிக்க: Working Womens Hostel: பணிபுரியும் பெண்களுக்காக குறைந்த கட்டணத்தில் அரசு விடுதிகள் தொடக்கம்: என்னென்ன வசதிகள்? முழு விவரம்