ஆண்களை முந்திய பெண்கள்! திருவாரூர் பட்டமளிப்பு விழாவில் வியந்து பாராட்டிய குடியரசு துணைத் தலைவர்!

திருவாரூர் தமிழ்நாடு மத்தியப் பல்கலைக்கழக 11-வது பட்டமளிப்பு விழாவில் குடியரசு துணைத் தலைவர் சி. பி. ராதாகிருஷ்ணன் பங்கேற்று, 1,103 மாணவர்களுக்குப் பட்டங்களை வழங்கினார்.

திருவாரூர் தமிழ்நாடு மத்தியப் பல்கலைக்கழகம் பட்டமளிப்பு விழா

Source : abp

திருவாரூர்: தமிழ்நாடு மத்தியப் பல்கலைக்கழகத்தின் 11-வது பட்டமளிப்பு விழா திருவாரூரில் மிக விமரிசையாக நடைபெற்றது.  இந்த பட்டமளிப்பு விழாவில் இந்தியாவின் குடியரசு துணைத் தலைவர் சி. பி. ராதாகிருஷ்ணன் சிறப்பு விருந்தினராகக் கலந்துகொண்டு, பட்டம் பெற்ற இளம் சாதனையாளர்களுக்குப் பட்டங்களை வழங்கிச் சிறப்புரையாற்றினார்.

கல்வி என்பது வெறும் மதிப்பெண்களையும் தேர்வுகளையும் கடந்து, மனிதனுக்குச் சுயசிந்தனையையும், சமூகப் பொறுப்பையும், படைப்பாற்றலையும் வளர்ப்பதாக இருக்க வேண்டும் என்பதைத் தமது உரையின் மையக்கருத்தாக அவர் வலியுறுத்தினார். ஆன்மிகமும் கலையும் கல்வியும் சங்கமிக்கும் வரலாற்றுச் சிறப்புமிக்க திருவாரூர் மண்ணில் இந்த விழா நடைபெறுவது, பண்பாடும் அறிவும் இணைந்து வளர வேண்டியதன் அவசியத்தைப் பறைசாற்றுவதாக அமைகிறது என்றார்.

விழா சிறப்புகள் மற்றும் சாதனைப் பட்டியல்

இம்முறை நடைபெற்ற பட்டமளிப்பு விழாவில் மொத்தம் 1,103 மாணவர்கள் பல்வேறு துறை சார்ந்த பட்டங்களைப் பெற்றனர். இதில் குறிப்பிடத்தக்க சிறப்பம்சமாக, பட்டம் பெற்ற மொத்த மாணவர்களில் 616 பேர் பெண் கல்வியாளர்கள் ஆவர். மேலும், கல்வியில் மிகச் சிறந்த தேர்ச்சியை வெளிப்படுத்தித் தங்கப் பதக்கம் வென்ற 50 சாதனையாளர்களில் 37 பேர் பெண்கள் என்பது குறிப்பிடத்தக்கது. உயர்கல்வியில் பெண்களின் பங்களிப்பும் சாதனையும் தொடர்ந்து அதிகரித்து வருவதை இந்தத் தரவுகள் தெளிவாகக் காட்டுகின்றன. 

இந்நிகழ்வில் தமிழ்நாடு ஆளுநர் ராஜேந்திர விஸ்வநாத் அர்லேகர், நாகை தொகுதி நாடாளுமன்ற உறுப்பினர் செல்வராஜ், பல்கலைக்கழக வேந்தர் பேராசிரியர் ஜி. பத்மநாபன், துணைவேந்தர் சுலோச்சனா சேகர் உள்ளிட்ட முக்கியப் பிரமுகர்களும், பேராசிரியர்களும், பெற்றோர்களும் பெருந்திரளாகக் கலந்துகொண்டு மாணவர்களை வாழ்த்தினர்.

மாறிவரும் உலகமும் வாழ்நாள் கற்றலின் அவசியமும்

விழாவில் மாணவர்களிடையே உரையாற்றிய குடியரசு துணைத் தலைவர், நாம் வாழும் தற்போதைய உலகம் மிக வேகமான மாற்றங்களைச் சந்தித்து வருகிறது என்று குறிப்பிட்டார். செயற்கை நுண்ணறிவுத் தொழில்நுட்பம் தொழில்துறைகளின் செயல்பாடுகளையே முற்றிலும் மறுவரையறை செய்து வருகிறது. மற்றொருபுறம் காலநிலை மாற்றம் மனிதகுலத்தின் வளர்ச்சி சார்ந்த அணுகுமுறையை மீண்டும் பரிசீலிக்க வேண்டிய கட்டாயத்திற்குத் தள்ளியுள்ளது.

சுகாதாரம், உயிரித் தொழில்நுட்பம், டிஜிட்டல் முறைகள் ஆகியவற்றில் ஏற்பட்டு வரும் பிரம்மாண்ட வளர்ச்சி எண்ணற்ற வாய்ப்புகளை உருவாக்கித் தருகிறது. இத்தகைய நவீன சவால்களை எதிர்கொள்ளப் வெறும் ஏட்டுச்சுரைக்காய் அறிவு மட்டும் போதாது. வாழ்நாள் முழுவதும் புதிய விஷயங்களைக் கற்றுக்கொள்ளும் மனப்பக்குவமும், மாற்றங்களைச் சுமையாவைக் கருதாமல் நம்பிக்கையுடன் ஏற்றுக்கொள்ளும் பண்பும், சிக்கலான பிரச்சினைகளுக்குப் கூட்டுத் தீர்வுகளைக் காணும் அணுகுமுறையுமே எதிர்கால வெற்றிக்கான முதன்மைச் சூத்திரங்கள் ஆகும்.

உயர்கல்வித் துறையின் நவீன வளர்ச்சி

இந்தியாவில் கடந்த பன்னிரண்டு ஆண்டுகளில் உயர்கல்வித் துறை அடைந்துள்ள பிரம்மாண்டமான விரிவாக்கத்தை குடியரசு துணைத் தலைவர் விரிவாகச் சுட்டிக்காட்டினார். 2014-ஆம் ஆண்டிற்குப் பிறகு நாட்டில் 16 இந்திய தகவல் தொழில்நுட்ப நிறுவனங்கள், 8 மத்தியப் பல்கலைக்கழகங்கள், 8 இந்திய மேலாண்மை நிறுவனங்கள், 7 இந்திய தொழில்நுட்பக் கழகங்கள், 2 இந்திய அறிவியல் கல்வி மற்றும் ஆராய்ச்சி நிறுவனங்கள், 1 தேசிய தொழில்நுட்ப நிறுவனம் மற்றும் 12 புதிய எய்ம்ஸ் மருத்துவமனைகள் உருவாக்கப்பட்டுள்ளன. இந்த அடிப்படைக் கட்டமைப்பு வளர்ச்சி இந்தியக் கல்வியின் தரத்தை உலகளவில் உயர்த்தியுள்ளது.

மேலும், பெண்களின் உயர்கல்விச் சேர்க்கை கடந்த பதினொரு ஆண்டுகளில் 42 சதவீதத்திற்கும் அதிகமாக உயர்ந்துள்ளதைச் சுட்டிக்காட்டிய அவர், தாம் செல்லும் பல்வேறு பல்கலைக்கழகப் பட்டமளிப்பு விழாக்களில் ஆண்களைவிடப் பெண்களே அதிக அளவில் பதக்கங்களையும் பட்டங்களையும் தட்டிச் செல்வது நாட்டின் மிகச் சிறந்த சமூக முன்னேற்றத்திற்குச் சான்றாக உள்ளது என்று மகிழ்ச்சி தெரிவித்தார்.

தேர்வு சீர்திருத்தமும் போதைப்பொருள் ஒழிப்புக்கான அறைகூவலும்

சமீபத்தில் நாடாளுமன்றத்தில் நிறைவேற்றப்பட்ட பொதுத் தேர்வுகள் திருத்த மசோதா குறித்துப் பேசிய அவர், கல்வி அமைப்பில் நேர்மையையும் வெளிப்படைத்தன்மையையும் பேணுவது மிகவும் அவசியமானது என்றார். சமூகத்தில் உள்ள தீய சக்திகள் தண்டிக்கப்பட்டால் மட்டுமே நல்லவர்களின் நலன்களும், திறமையான மாணவர்களின் எதிர்காலமும் பாதுகாப்பாக இருக்கும். அதேபோன்று, இன்றைய இளைய தலைமுறையின் எதிர்காலத்திற்குப் பெரும் அச்சுறுத்தலாக உருவெடுத்துள்ள போதைப்பொருள் பழக்கத்தை முற்றிலும் ஒழிக்க வேண்டும் என்று அவர் கடுமையான எச்சரிக்கை விடுத்தார்.

போதைப்பொருள் விற்பனையாளர்கள் மற்றும் கடத்தல்காரர்கள் மீது காவல்துறையும் பாதுகாப்பு அமைப்புகளும் எவ்விதத் தயக்கமுமின்றி மிகக் கடுமையான சட்ட நடவடிக்கைகளை எடுக்க வேண்டும். போதையற்ற ஆரோக்கியமான சமுதாயத்தை உருவாக்க மாணவர்கள் தங்களை விலக்கிக் கொள்வதுடன், தங்கள் நண்பர்களையும் இந்தப் பாதையிலிருந்து மீட்க முழு ஒத்துழைப்பு நல்க வேண்டும்.

வளர்ச்சியடைந்த பாரதம் 2047 மற்றும் இளைஞர்களின் பங்கு

சுதந்திர இந்தியாவின் நூற்றாண்டை எட்டும் 'வளர்ச்சியடைந்த பாரதம் 2047' என்ற தொலைநோக்கு இலக்கை அடைவதில் இன்றைய இளைஞர்களின் ஆற்றலும், தலைமைத்துவமும், படைப்பாற்றலும் மிக முக்கியமான தூண்களாக விளங்கும். வகுப்பறைகளை விட்டு வெளியேறும் மாணவர்கள் தங்கள் வாழ்நாள் முழுவதும் கற்றலைத் தொடர வேண்டும். எந்தத் துறையில் காலடி எடுத்து வைத்தாலும் 'தேசமே முதன்மை' என்ற உயரிய சிந்தனையை மனதில்கொண்டு செயல்பட வேண்டும். வெறும் நுகர்வோராகவோ அல்லது மற்றவர்களைப் பின்பற்றுபவர்களாகவோ முடங்கிவிடாமல், புதிய அறிவை உருவாக்கும் புத்தாக்கவாதிகளாகவும், சமுதாயத்தை வழிநடத்தும் தலைவர்களாகவும் உருவெடுக்க வேண்டும் என்று கூறி, பட்டம் பெற்ற அனைத்து மாணவர்களுக்கும் தமது மனமார்ந்த வாழ்த்துகளைத் தெரிவித்துக் கொண்டார்.