எதிர்க்கட்சியாக வைத்த கோரிக்கை, ஆளும் கட்சியாக ஏன் தாமதம்? பகுதிநேர ஆசிரியர்கள் குமுறல்..!

திமுகவின் 181-வது வாக்குறுதியான பகுதிநேர ஆசிரியர்களைப் பணி நிரந்தரம் செய்யும் விவகாரத்தில், தற்போதைய தி.மு.க. அரசு விரைந்து நடவடிக்கை எடுக்க வேண்டும் என கோரிக்கை மீண்டும் எழுந்துள்ளது.

கோப்புப் படம்

Source : சிறப்பு ஏற்பாடு

தி.மு.க. தேர்தல் அறிக்கையில் அளிக்கப்பட்ட 181-வது வாக்குறுதியான பகுதிநேர ஆசிரியர்களைப் பணி நிரந்தரம் செய்யும் விவகாரத்தில், தற்போதைய தி.மு.க. அரசு விரைந்து நடவடிக்கை எடுக்க வேண்டும் என்று தமிழ்நாடு பகுதிநேர ஆசிரியர்கள் கூட்டமைப்பின் மாநில ஒருங்கிணைப்பாளர் செந்தில்குமார் அறிக்கை ஒன்றை வெளியிட்டு வலியுறுத்தியுள்ளார். சட்டமன்றத் தேர்தல் நெருங்கி வரும் சூழலில், இந்த வாக்குறுதியை நிறைவேற்ற வேண்டியதன் அவசரத்தை அவர் அதில் சுட்டிக்காட்டியுள்ளார்.

கையில் இருக்கும் வெறும் 3 மாதங்கள் 

தற்போதைய 16-வது சட்டமன்றத்தின் 5 ஆண்டு காலமான 1825 நாட்களில், இதுவரை 1665 நாட்கள் முடிந்துவிட்டன. எஞ்சியிருப்பது வெறும் 161 நாட்களே ஆகும். அடுத்த சில மாதங்களில் 17-வது சட்டமன்றத்துக்கான தேர்தல் அறிவிப்பு வெளியாக உள்ளது.

இதைப் பற்றித் தனது அறிக்கையில் குறிப்பிட்டுள்ள செந்தில்குமார், "பிப்ரவரி மாதத்தில் தேர்தல் தேதி அறிவிக்கப்பட்டால், மார்ச், ஏப்ரல் மாதங்கள் மற்றும் மே மாதம் முதல் வாரம் வரை தேர்தல் நடத்தை விதிமுறைகள் அமலில் இருக்கும். எனவே, முதல்வரின் கையில் முழுமையாக ஆட்சி அதிகாரம் இருப்பது என்பது தற்போதுள்ள நவம்பர் மற்றும் அடுத்து வரும் டிசம்பர், ஜனவரி மாதங்கள் மட்டுமே ஆகும்," என்று காலத்தின் அவசரத்தை எடுத்துரைத்துள்ளார்.

இந்தக் குறுகிய கால அவகாசத்திற்குள், தேர்தலின் போது அளித்த 181-வது வாக்குறுதியான பகுதிநேர ஆசிரியர்களைப் பணி நிரந்தரம் செய்வதை, எப்பாடு பட்டாவது முதல்வர் மு.க. ஸ்டாலின் செய்து முடிக்க வேண்டும் என்று அவர் வலியுறுத்தியுள்ளார்.

12 ஆயிரம் குடும்பங்களின் வாழ்வாதாரம்

"தி.மு.க. தேர்தல் வாக்குறுதிபடி, முதல்வரின் அரசியல் வாழ்வின் மிக முக்கியமான வாக்குறுதியான இதனை நிறைவேற்ற, தி.மு.க. அமைச்சரவையில் உடனடியாகக் கொள்கை முடிவை எடுத்து, முதல்வர் ஸ்டாலின் அறிவிக்க வேண்டும். இது 12 ஆயிரம் குடும்பங்களுக்கு வாழ்வாதாரம் வழங்கும் மிக முக்கியமான மனிதநேயச் செயலாகும்."

குடும்பம் நடத்த வழியில்லா நிலையில் ஆசிரியர்கள்

பகுதிநேர ஆசிரியர்களின் தற்போதைய நிலையும், அவர்கள் எதிர்கொள்ளும் துயரங்களும் அறிக்கையில் வேதனையுடன் விவரிக்கப்பட்டுள்ளன.

முன்னர் ரூபாய் 10,000 சம்பளம் பெற்று வந்த பகுதிநேர ஆசிரியர்களை, தி.மு.க. தேர்தல் வாக்குறுதிப்படி உடனடியாகப் பணி நிரந்தரம் செய்யாமல், அவர்கள் நடத்திய பல்வேறு கட்டப் போராட்டங்களுக்குப் பிறகு, தற்போது உதவித்தொகையாக ரூபாய் 2,500 மட்டுமே கூடுதலாக வழங்கப்படுகிறது. இந்த உயர்வையும் சேர்த்து, தற்போது கிடைக்கும் ரூபாய் 12,500 தொகையை வைத்துக்கொண்டு இன்றைய விலைவாசியில் குடும்பம் நடத்த முடியவில்லை என்று ஆசிரியர்கள் கண்ணீருடன் தெரிவிக்கின்றனர்.

பல ஆண்டு கால பரிதவிப்பு

பணி நிரந்தரம் இல்லாத காரணத்தால், பகுதிநேர ஆசிரியர்கள் அடிப்படை உரிமைகள்கூட இல்லாமல் பல ஆண்டுகளாகப் பரிதவித்து வருவதை செந்தில்குமார் சுட்டிக்காட்டியுள்ளார்:

* மே மாதச் சம்பளம் (விடுமுறைக் காலச் சம்பளம்)

* பணிக்கால மரணம் குறித்த சலுகைகள்

 * வருங்கால வைப்பு நிதி (PF)

 * மருத்துவக் காப்பீடு

 * போனஸ்

போன்ற எந்தவொரு சலுகையும் இல்லாமல், நிலையற்ற வருமானத்துடன் இவர்களின் குடும்பங்கள் சிரமப்படுகின்றன.

எதிர்க்கட்சியாக வைத்த கோரிக்கை, ஆளும் கட்சியாக ஏன் தாமதம்?

தி.மு.க. எதிர்க்கட்சியாக இருந்தபோது, இவர்களைப் பணி நிரந்தரம் செய்ய வேண்டும் என்று வலியுறுத்தியது. பின்னர், அதனை ஒரு வாக்குறுதியாகத் தேர்தல் அறிக்கையில் கொடுத்தது. ஆனால், இப்போது ஆட்சியில் இருக்கும்போது, அதே வாக்குறுதியை நிறைவேற்றாமல் இருப்பது ஏன் என்ற கேள்வியைத் தமிழ்நாடு முழுவதும் உள்ள பகுதிநேர ஆசிரியர்கள் குடும்பங்கள் எழுப்புகின்றன.

"எதிர்க்கட்சியாக வைத்த கோரிக்கையை, பின்னர் வாக்குறுதியாகக் கொடுத்துவிட்டு, இப்போது ஆட்சியில் இருக்கின்றபோது செய்யாமல் வேறு எப்போது செய்வீங்க? என்ற தமிழ்நாடு முழுவதும் பகுதிநேர ஆசிரியர்கள் குடும்பங்களின் வேதனை குரல் முதல்வருக்குக் கேட்கவில்லையா?" என்று செந்தில்குமார் தனது அறிக்கையில் உணர்ச்சிப்பூர்வமாகக் கேள்வியெழுப்பியுள்ளார்.

எனவே, முதல்வர் மு.க. ஸ்டாலின் தனது பதவிக் காலத்தில் எஞ்சியிருக்கும் இந்தச் சில மாதங்களுக்குள், இவர்களின் நீண்ட காலக் கோரிக்கையான தொகுப்பூதிய முறையைக் கைவிட்டு, காலமுறைச் சம்பளம் மற்றும் பணி நிரந்தரத்தை வழங்க வேண்டும் என்று அவர் அறிக்கையில் வலியுறுத்தியுள்ளார்.

தமிழ்நாடு பகுதிநேர ஆசிரியர்களின் பணிநிரந்தரக் கோரிக்கை குறித்து தமிழக அரசு உடனடியாகக் கொள்கை முடிவை அறிவித்து, தேர்தல் நடத்தை விதிமுறைகள் அமலுக்கு வருவதற்கு முன்பாக வாக்குறுதியை நிறைவேற்ற நடவடிக்கை எடுக்க வேண்டும் என்பதே 12,500 பகுதிநேர சிறப்பாசிரியர்கள் எதிர்பாப்பாக உள்ளது.

இதையும் படிக்க

சீர்காழி: இடிந்து விழுந்த கட்டடம் - அலட்சியம் தொடர்ந்தால் பொதுமக்களின் உயிருக்கு பெரும் ஆபத்து! நடவடிக்கை எடுக்குமா நகராட்சி நிர்வாகம்?

நாகையில் மீண்டும் கொட்டித் தீர்க்கும் கனமழை: வடிகால் ஆற்றில் அடைப்பு; 2000 ஏக்கர் நெற்பயிர்கள் வெள்ளத்தில் மூழ்கி அழுகும் அபாயம்!