No Tension மக்களே ! ஆட்டோ சவாரிக்கு புதிய APP... இனி இஷ்டத்திற்கு காசு வாங்க முடியாது - அரசு அதிரடி

ஆட்டோ சவாரிக்கான ஒழுங்கற்றக் கட்டண நிர்ணயத்தால் அதிக கட்டணம் வசூலிக்கப்படுவதாக எழும் புகார்களைக் குறைக்க புதுச்சேரி அரசு நடவடிக்கை

புதுச்சேரியில் ஆட்டோ சவாரிக்கு புதிய செயலி உருவாக்கம்

Source : ABP NADU

புதுச்சேரி: ஆட்டோ சவாரிக்கான ஒழுங்கற்றக் கட்டண நிர்ணயத்தால் அதிக கட்டணம் வசூலிக்கப்படுவதாக எழும் புகார்களைக் குறைக்க புதுச்சேரி போக்குவரத்துத் துறை ஒரு புதிய மொபைல் செயலியை அறிமுகப்படுத்தவுள்ளதாக தெரிவித்துள்ளது.

புதுச்சேரிக்கு சுற்றுலா வருவோரின் எண்ணிக்கை ஆண்டுதோறும் அதிகரித்து வருகிறது. பாரம்பரிய கட்டடங்கள், அழகிய கடற்கரை, படகு குழாம், அரவிந்தர் ஆசிரமம், மணக்குள விநாயகர் கோவில் தொடங்கி பல்வேறு இடங்களுக்கு சுற்றுலா பயணிகள் வருகின்றனர். தற்போது கிறிஸ்துமஸ், புத்தாண்டு கொண்டாட்டத்துக்காக அதிகளவு சுற்றுலாப் பயணிகள் வருகை தர, விடுதிகளில் முன்பதிவு செய்து வருகின்றனர். இந்தியாவில் சுற்றுலாப் பயணிகள் அதிக தேடப்படும் மாநிலமாக புதுச்சேரி திகழ்கிறது.

இந்நிலையில் ஆஸ்திரேலியா நாட்டினை சேர்ந்த லோன்லி பிளானட் என்ற பயண ஊடக நிறுவனம், 2025ம் ஆண்டிற்கான சிறந்த பயண இடங்களை வரிசைப்படுத்தி வெளியிட்டுள்ளது. லோன்லி பிளானட்டின் பயண வழிகாட்டியில் 30 பிரபலமான இடங்கள், நகரங்கள், நாடுகள் மற்றும் பிராந்தியங்களை சுற்றுலாப் பயணிகள் புத்தாண்டில் கட்டாயம் பார்க்க வேண்டிய இடங்களை குறிப்பிட்டுள்ளது. அதன்படி சிறந்த நகரங்கள் பட்டியலில், பிரான்ஸ் நாட்டின் துலுாஸின் கால்வாய் கரைகள் முதல் இடத்தை பிடித்துள்ளது.அடுத்தபடியாக இந்தியாவில் புதுச்சேரி கடற்கரை 2ம் இடத்தை பிடித்துள்ளது. பல்கேரியாவின் பான்ஸ்கோ 3ம் இடம் பிடித்துள்ளது.

புதுச்சேரிக்கு சுற்றுலாவிற்காக வருபவர்கள் கார்களில் பலர் வந்தாலும், புதுச்சேரிக்குள் வந்தவுடன் வாடகை இருசக்கர வாகனங்களில் வலம் வந்தாலும் ஆட்டோவை நாடுவோர் அதிகமாக உள்ளனர். புதுச்சேரியில் அரசு தரப்பில் போதியளவு வாகன வசதி அதிகம் இல்லை என்பதால் ஆட்டோவின் தேவை இன்றைக்கும் மிக முக்கிய அளவில் இருந்து வருகிறது. அதே நேரத்தில் இந்த ஆட்டோ கட்டணத்தை இஷ்டத்துக்கு பலரும் வசூலிக்கின்றனர்.

இதனால் மக்கள் மற்றும் சுற்றுலா பயணிகள் பாதிக்கப்படுகின்றனர். புதுச்சேரி போக்குவரத்து துறையானது ஆட்டோ கட்டணங்களை சில ஆண்டுகளுக்கு முன்பு வெளியிட்டது. 1.8 கிமீ தொலைவுக்கு குறைந்தபட்சம் ரூ.35 என நிர்ணயித்தது. இதை ஆட்டோ ஓட்டுநர்கள் ஏற்கவில்லை. விலைவாசி உயர்வு, பெட்ரோல் உயர்வை காட்டி அவர்களது இஷ்டத்திற்கு பலரால் கட்டணம் நிர்ணயிக்கப்படுகிறது.

இங்குள்ள எந்த ஆட்டோக்களிலும் மீட்டர் இல்லை. ஆளுக்கு தகுந்தாற்போல் இஷ்டத்துக்கு உயர்த்தி வசூலிக்கின்றனர். கட்டணத்தை போக்குவரத்துத்துறை முறைப்படுத்தினால் பலரும் ஆட்டோவில் பயணிப்போம். பலருக்கும் ஆட்டோ தேவையாக உள்ளது என்று புதுச்சேரிக்குள் வருவோர் தெரிவிக்கின்றனர். உள்ளூர் மக்களின் கருத்தும் இதுவே. ஆட்டோ ஓட்டுநர் கூறுகையில், சரியான கட்டணத்தை அரசு நிர்ணயிக்கவில்லை. நகரப் பகுதியில் இருசக்கர வாகன வாடகை விடும் கடைகள் அதிகமாகவுள்ளன. அதனை அரசு முறைப்படுத்தவில்லை. இதனால் சுற்றுலா பயணிகள், ஆட்டோக்களை தேடுவது குறைந்துள்ளது. இதனால் நாங்களும் பாதிக்கப்படுகிறோம் என்று தெரிவித்தனர்.

இதுபற்றி புதுச்சேரி போக்குவரத்து ஆணையர்  கூறுகையில்,

ஆட்டோ சவாரிக்கான ஒழுங்கற்றக் கட்டண நிர்ணயத்தால் அதிக கட்டணம் வசூலிக்கப்படுவதாக எழும் புகார்களைக் குறைக்க புதுச்சேரி போக்குவரத்துத் துறை ஒரு புதிய மொபைல் செயலியை அறிமுகப்படுத்தவுள்ளதாக தெரிவித்துள்ளது. இந்த மொபைல் செயலியின் மூலம் ஒழுங்கான முறையில் கட்டணம் வசூலிக்கப்படுவதோடு ஆட்டோ ஓட்டுனர்களுக்குச் சமமான ஊதியம் கிடைக்கும் எனத் தெரிவிக்கப்பட்டுள்ளது.

ஆட்டோ கட்டணத்தை முறைப்படுத்த கேரளா, பெங்களூரு மற்றும் கொல்கத்தாவில் உள்ளது போல் ‘APP’  செயலி ஒன்றை உருவாக்கி வருகிறோம். டிசம்பர் 31-ம் தேதிக்குள் இதை அமல்படுத்த முயற்சித்து வருகிறோம். தனியார் இரு சக்கர சேவை வாகனங்களை போக்குவரத்துத் துறையின் உரிய உரிமம் பெறாமல் வாடகைக்கு விட்டால், மோட்டார் வாகன சட்டம் 1089ன் படி வாகனம் பறிமுதல் செய்து குற்ற வழக்கு தொடர்வோம் என்றார்.