கலக்கப்போகுது வின்டேஜ் பேருந்து.! ஒரு நாள் முழுக்க ஊர் சுற்ற வெறும் ரூ.50 தான் டிக்கெட்.! சிறப்பம்சம் என்ன.?

Chennai Vintage bus: சென்னையில் சுற்றுலா பயணிகளை கவரும் வகையில் புதிய திட்டமாக வின்டேஜ் தோற்றத்தில் உள்ள பேருந்துகள் களம் இறக்கப்பட்டுள்ளது. இந்த பேருந்தில் ஒரு நாள் முழுக்க சுற்றிப்பார்க்க கட்டணமும் அறிவிக்கப்பட்டுள்ளது.

Chennai Vintage bus

Source : social media

சென்னையை அலங்கரிக்கும் பழங்கால பேருந்துகள்

சென்னையை சுற்றிப்பார்க்க பல்வேறு சுற்றுலா இடங்கள் பொதுமக்களை பெரிதும் கவர்ந்து வருகிறது. அந்த வகையில் ஏற்கனவே டபுள் டக்கர் பேருந்து அறிமுகம் செய்யப்பட்டுள்ள நிலையில், தற்போது வின்டேஜ் தோற்றத்தில் உள்ள பேருந்துகள் சென்னையில் சுற்றுலா பயணிகளை கவரும் வகையில் அறிமுகம் செய்யப்பட்டுள்ளது. சென்னை உலா என்ற (HOP ON HOP OFF - VINTAGE BUS Services) பேருந்து சேவயை இன்று தொடங்கி வைக்கப்பட்டது.

அந்த வகையில் பொங்கல் பண்டிகையை முன்னிட்டு, நகரின் முதன்மை பொது பேருந்து நிறுவனமான சென்னை மாநகர போக்குவரத்துக் கழகம், ஒரு அற்புதமான நகர-சுற்றுலா அனுபவத்தை வழங்கத் தொடங்குகிறது. சென்னை உலா" பேருந்து "ஹாப்-ஆன் ஹாப்-ஆஃப்" சேவைகளுடன், முதன்முதலில் 5 பேருந்துகள் அறிமுகப்படுத்தப்படுகின்றன. மேலும், அவை சென்னையின் மையப்பகுதியில் உள்ள சின்னமான மற்றும் கலாச்சார ரீதியாக முக்கியத்துவம் வாய்ந்த இடங்களை இணைக்க வடிவமைக்கப்பட்ட வட்டச் சுற்றுப் பாதையில் இயக்கப்படவுள்ளது. இதனால் பண்டிகைக் காலத்தில் நகரின் பாரம்பரிய அடையாளத்தை சென்னைவாழ் மக்கள் மற்றும் பார்வையாளர்கள் கண்டுகளிக்க வாய்ப்பு ஏற்படுத்தப்பட்டுள்ளது.

பழங்கால மற்றும் பாரம்பரியத்துடன் கூடிய 5 பேருந்துகள்

• பழங்கால/பாரம்பரியம்-1980களின் காலகட்ட பேருந்துகள் - சென்னையின் பொதுப் போக்குவரத்து பரிணாமத்தை நினைவு கூறும் வகையில் வடிவமைக்கப்பட்டுள்ளது.
• பயணிகள் குறிப்பிடப்பட்டுள்ள நிறுத்தத்திலும் ஏறவும் இறங்கவும் கூடிய ஹாப்-ஆன் ஹாப்-ஆஃப் (HO-HO) மாதிரி - அணுகல் மற்றும் வசதி உள்ளது.
• குறிப்பாக மகளிர், வயது முதிர்ந்தவர்கள், குழந்தைகள், பள்ளி குழுக்கள் மற்றும் சுற்றுலாப் பயணிகளுக்கு நன்மை பயக்கும்.
• இந்தப் பாரம்பரியப் பேருந்தில், மாற்றுத்திறனாளிகளும் எளிதாகப் பயணிக்கும் வகையில் வடிவமைக்கப்பட்டுள்ளது.

பேருந்துகளில் உள்ள சிறப்பு சேவைகள்:

• சென்னையில் உள்ள முக்கிய வரலாற்று, கலாச்சார மற்றும் பொழுதுபோக்கு அடையாளங்களை இணைக்கும் வகையில் 30 கி.மீ நீளமுள்ள ஒரு வளையமாக இந்தப் பாதை திட்டமிடப்பட்டுள்ளது.
• ஒரே ஒரு பயணச்சீட்டு மூலம் நாள் முழுவதும் பயணம் செய்வதற்குரிய கட்டணம் - ரூ. 50 மட்டுமே.
• சென்ட்ரல் ரயில் நிலையம். எழும்பூர் ரயில் நிலையம், மெரினா கடற்கரை மற்றும் நடத்துனரிடம் இருந்து இதற்குரிய பயணச்சீட்டுகளை பெற்றுக் கொள்ளலாம்.
• மேலும், சென்னை ஒன் செயலி வழியாக மின்னணு பயண சீட்டுகள் பெற்றுக் கொள்ளலாம்.
• மேலும் சொகுசுப் பேருந்து (Deluxe) கட்டணத்தில் மற்ற பேருந்துகளைப் போல இப்பேருந்தில் பயணிக்கலாம்.
• பொங்கல் பண்டிகை காலத்தில் இந்த சேவை ஜனவரி 16-18 காலை 10:00 மணி முதல் இரவு 11:00 மணி வரையிலும் இயக்கப்படும்.
• வார நாட்களில் மாலை 4:00 மணி முதல் இரவு 11:00 மணி வரையிலும்
• வார இறுதி நாட்கள்/பொது விடுமுறை நாட்களில் காலை 10:00 மணி முதல் இரவு 11:00 மணி வரையிலும் இயக்கப்படும்.
• அடுத்தடுத்த பேருந்து சேவை 30 நிமிட இடைவெளியுடன் இருக்கும்.

"சென்னை உலா" பாரம்பரியப் பேருந்து விருப்பமான நிறுத்தத்தில் ஏறி, பிடித்தமான இடத்தில் இறங்கி ரசிக்கலாம். மீண்டும் அடுத்து வரும் "சென்னை உலா" பேருந்தில் உங்கள் பயணத்தைத் தொடரலாம் என சென்னை மாநகர போக்குவரத்து கழகம் தெரிவித்துள்ளது.