நீதிமன்ற அவமதிப்பு வழக்கு: இந்து சமய அறநிலையத்துறை ஆணையருக்கு அபராதம் - சென்னை உயர் நீதிமன்றம் அதிரடி

இந்து சமய அறநிலையத்துறை ஆணையருக்கு, நீதிமன்ற அவமதிப்பு வழக்கில், ஒரு லட்சம் ரூபாய் அபராதம் விதித்து சென்னை உயர்நீதிமன்றம் உத்தரவு பிறப்பித்துள்ளது.

சென்னை உயர் நீதிமன்றம்

இந்து சமய அறநிலையத்துறை ஆணையருக்கு, நீதிமன்ற அவமதிப்பு வழக்கில், ஒரு லட்சம் ரூபாய் அபராதம் விதித்து சென்னை உயர்நீதிமன்றம் உத்தரவு பிறப்பித்துள்ளது.

சென்னை சூளையில் அமைந்துள்ள சொக்கவேல் சுப்பிரமணியர் கோயிலுக்கு சொந்தமான சொத்துக்களை குத்தகைக்கு எடுத்தவர்கள், நீண்ட காலம் வாடகை செலுத்தாமல் இருப்பதாக குற்றச்சாட்டு எழுந்தது. இதையடுத்து, சென்னையைச் சேர்ந்த சுகுமார் என்பவர் உயர் நீதிமன்றத்தில் வழக்கு தொடர்ந்தார்.

கோயிலுக்கு சொந்தமான சொத்துக்களை குத்தகைக்கு எடுத்தவர்களுக்கு எதிராக அறநிலையத்துறை சட்டத்தின் கீழ் நடவடிக்கை தொடங்கப்பட்டுள்ளதாக வழக்கு விசாரணையின்போது அறநிலையத்துறை தரப்பில் தெரிவிக்கப்பட்டது. 

இதையடுத்து, நடவடிக்கையை விரைவுபடுத்த கடந்த 2021ஆம் ஆண்டு ஜூன் மாதம் நீதிபதி உத்தரவிட்டிருந்தார். இந்த உத்தரவை அமல்படுத்தவில்லை என்று சுகுமார் நீதிமன்ற அவமதிப்பு வழக்கை தாக்கல் செய்தார்.

நீதிமன்ற அவமதிப்பு வழக்கு நீதிபதி அனிதா சுமந்த் முன் விசாரணைக்கு வந்தது. அப்போது, அறநிலையத்துறை உதவி ஆணையர் தாக்கல் செய்த அறிக்கையில், "கோயில் சொத்தை குத்தகைக்கு எடுத்திருந்தவர்களுக்கு எதிராக விசாரணை தொடங்கப்பட்டுள்ளது. உயர் நீதிமன்ற உத்தரவை அவமதிக்கும் எண்ணம் எதுவும் இல்லை" என்று தெரிவிக்கப்பட்டிருந்தது.

பின்னர், வழக்கை விசாரித்த நீதிபதி, "நீதிமன்ற உத்தரவை அமல்படுத்துவதற்கு ஏற்பட்ட கால தாமதத்திற்கான காரணங்களை உதவி ஆணையர் தனது அறிக்கையில் தெரிவிக்கவில்லை. நீதிமன்ற உத்தரவை அமல்படுத்தாதது குறித்து உதவி ஆணையர் வருத்தம் தெரிவிக்காத நடவடிக்கையை ஏற்றுக் கொள்ள முடியாது.

இந்து சமய அறநிலையத்துறை ஆணையருக்கு ஒரு லட்சம் ரூபாயும், உதவி ஆணையர் மற்றும் இணை ஆணையர்களுக்கு தலா 50 ஆயிரம் ரூபாயும் அபராதம் விதித்து உத்தரவிட்டுள்ளார்.

இந்த அபராத தொகையை இரண்டு வாரங்களில் சென்னை அடையாறு புற்றுநோய் மருத்துவமனைக்கு வழங்க வேண்டும்" என்றும் நீதிபதி பிறப்பித்த உத்தரவில் குறிப்பிட்டுள்ளார்.

நீதிமன்ற அவமதிப்பு வழக்கில் இந்து சமய அறநிலையத்துறை ஆணையருக்கு அபராதம் விதித்துவிட்டு அதை சென்னை புற்றுநோய் மருத்துவமனைக்கு அளிக்க உத்தரவிட்டிருப்பது முக்கியமான தீர்ப்பாக பார்க்கப்படுகிறது. 

சமீப காலமாக, இதேபோன்ற பல தீர்ப்புகள் வழங்கப்பட்டுள்ளன. குறிப்பாக, சமீபத்தில் சீமை கருவேல மரத்தை அகற்ற நீதிமன்றம் குற்றம்சாட்டப்பட்டவர்களுக்கு உத்தரவிட்டிருந்தது. 

மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்

ABP நாடு செய்திகளை சமூக வலைத்தள பக்கங்களிலும் பின் தொடரலாம்

பேஸ்புக் பக்கத்தில் தொடர

ட்விட்டர் பக்கத்தில் தொடர

யூட்யூபில் வீடியோக்களை காண