High Court Order :தென்காசி சட்டமன்ற தொகுதியில் பதிவான தபால் வாக்குகள்.. மீண்டும் எண்ண நீதிமன்றம் உத்தரவு

தென்காசி சட்டமன்ற தொகுதியில் பதிவான தபால் வாக்குகளை மீண்டும் எண்ண உயர் நீதிமன்றம் உத்தரவிட்டுள்ளது.

சென்னை உயர் நீதிமன்றம்

தென்காசி சட்டமன்ற தொகுதியில் பதிவான தபால் வாக்குகளை மீண்டும் எண்ண வேண்டும் என்றும், மனுதாரருக்கு வழக்கு செலவாக ரூ.10,000 வழங்க வேண்டும் என்றும் உயர் நீதிமன்றம் உத்தரவிட்டுள்ளது. தென்காசி காங்கிரஸ் சட்டமன்ற உறுப்பினர் பழனிநாடார் வெற்றியை எதிர்த்து அதிமுக வேட்பாளர் செல்வமோகன்தாஸ் பாண்டியன் தொடர்ந்த வழக்கில் உயர்நீதிமன்றம் இவ்வாறு உத்தரவிட்டுள்ளது. 10 நாட்களில் தபால் வாக்குகளை மறு எண்ணிக்கை செய்து முடிவை அறிவிக்க வேண்டும் என்று மாவட்ட ஆட்சியருக்கு நீதிமன்றம் ஆணையிட்டுள்ளது. 

கடந்த 2021-ஆம் ஆண்டு நடந்த சட்டமன்ற தேர்தலில் தென்காசி தொகுதியில் திமுக கூட்டணி கட்சியான காங்கிரஸ்  சார்பில் போட்டியிட்ட  எஸ். பழனி நாடார்,  அதிமுக வேட்பாளர் செல்வ மோகன் தாஸ் பாண்டியனை விட 370 வாக்குகள் அதிகம் பெற்று வெற்றி பெற்றார். பழனி நாடாரின் வெற்றியை எதிர்த்து அதிமுக வேட்பாளர்  செல்வ மோகன்தாஸ் பாண்டியன் சென்னை உயர்நீதிமன்றத்தில் வழக்கு தொடர்ந்திருந்தார்.

அந்த மனுவில் தெரிவிக்கப்பட்டிருந்ததாவது: “பதிவான வாக்குகளுக்கும், அறிவிக்கப்பட்ட வாக்கு எண்ணிக்கைக்கும் இடையில் வித்தியாசம் உள்ளது. குறிப்பாக தபால் வாக்குகளையும், மின்னணு இயந்திரத்தில் பதிவான வாக்குகளில் 28 முதல் 30 சுற்று வரையிலான வாக்குகளை மறு எண்ணிக்கை செய்ய வேண்டும்” எனவும் கோரியிருந்தார். இந்த தேர்தல் வழக்கின் விசாரணை நீதிபதி ஜி.ஜெயச்சந்திரன் முன்பு நடைபெற்றது.  

இவ்வழக்கில் அனைத்து தரப்பு வாதங்களும் நிறைவடைந்த நிலையில் இன்று தீர்ப்பு வழங்கப்பட்டது.   தபால் வாக்குகள் பதிவு செய்தது, எண்ணிக்கையில் குளறுபடிகள் நடந்துள்ளது ஆவணங்கள் மூலம் நிரூபிக்கப்பட்டுள்ளதாக நீதிபதி தெரிவித்தார். தபால் வாக்குகளை மீண்டும் எண்ண வேண்டும் என உத்தரவிட்டுள்ளார். 10 நாட்களில் தபால் வாக்குகளை மீண்டும் எண்ணி முடிவை அறிவிக்க வேண்டும் என தென்காசி மாவட்ட ஆட்சியருக்கு நீதிபதி உத்தரவிட்டுள்ளார். மேலும் மனுதாரருக்கு வழக்கு செலவாக ரூ.10,000 வழங்கவும் நீதிமன்றம் தேர்தல் அதிகாரிக்கு உத்தரவிடப்பட்டது. 

மேலும் படிக்க