Madurai AIIMS : ’’தற்காலிக இடத்தை தேர்வு செய்தால், மதுரை எய்ம்ஸில், இந்தாண்டே மாணவர் சேர்க்கையை நடத்தலாம்’’ - மத்திய அரசு

மதுரை எய்ம்ஸ் மருத்துவமனைக்காக தற்காலிக இடத்தை தமிழக அரசு தேர்வு செய்தால் நடப்பாண்டிலேயே  50 முதல் 100 மருத்துவ இடங்களுக்கு மாணவர் சேர்க்கையை நடத்தலாம் என மத்திய அரசு தெரிவித்துள்ளது

தோப்பூரில் எய்ம்ஸ் அமைய உள்ள இடம்

மதுரை எய்ம்ஸ் மருத்துவமனைக்காக தற்காலிக இடத்தை தமிழக அரசு தேர்வு செய்தால் நடப்பாண்டிலேயே 50 முதல் 100 மருத்துவ இடங்களை உருவாக்கி மாணவர்களுக்கான சேர்க்கையை நடத்தலாம் என தலைமைச் செயலர் இறையன்புவுக்கு மத்திய சுகாதாரத் துறை செயலர் ராஜேஷ் பூஷன் கடிதம் எழுதியுள்ளார்.

மத்திய சுகாதாரத் துறை செயலர் ராஜேஷ் பூஷன் தமிழக தலைமை செயலருக்கு எழுதியுள்ள கடிதத்தில் மதுரை எய்ம்ஸ் மருத்துவமனைக்கான தற்காலிகமான இடத்தை தமிழக அரசு தேர்வு செய்தால், நடப்பாண்டில் 50 முதல் 100 மருத்துவ மாணவர் சேர்க்கையை நடத்தலாம், அதற்கு தேவையான வசதிகள், வகுப்பறைகள், அலுவலகத்திற்குத் தேவையான இடங்கள் ஆகியவற்றை தமிழ்நாடு அரசு தேர்வு செய்ய வேண்டும் என தெரிவிக்கப்பட்டுள்ளது.

அவ்வாறு தற்காலிகமான இடத்தை தமிழக அரசு தேர்வு செய்து மத்திய அரசிடம் வழங்கினால் மாணவர் சேர்க்கை நடத்துவதற்காக ஆகும் செலவுகள், பேராசிரியர்கள் மற்றும் அலுவலர்கள் தேர்வு, உட்கட்டமைப்பு வசதிகள் போன்ற அனைத்தையும் மத்திய சுகாதாரத்துறை அமைச்சகம் ஏற்றுக்கொள்ளும் எனவும் மத்திய சுகாதாரத்துறை செயலரின் கடிதத்தில் குறிப்பிடப்பட்டுள்ளது.

மதுரை எய்ம்ஸ் மருத்துவமனைக்காக தற்காலிகமான இடத்தில் வெளிப்புற நோயாளிகள் பிரிவு மற்றும் மருத்துவ மாணவர் சேர்க்கையை தொடங்க கோரிய வழக்கு உயர்நீதிமன்ற மதுரைக் கிளையில் விசாரணைக்கு வந்த போது, தமிழக அரசுத்தரப்பில் 50 மருத்துவ மாணவர் சேர்க்கை குறித்து மத்திய அரசிடம் பரிந்துரைத்துள்ளதாகவும், எய்ம்ஸ் நிர்வாகத்தின் முடிவிற்காக காத்திருப்பதாகவும் கூறிய நிலையில் இந்த கடிதம் அனுப்பப்பட்டுள்ளது.