Mettur Dam : மேட்டூர் அணையில் இருந்து டெல்டா பாசனத்திற்கு தண்ணீர் திறப்பு! நீர்மட்டம் 120 அடியாக நீடிப்பு!
மேட்டூர் அணையில் இருந்து காவேரி டெல்டா பாசனத்திற்கும் கால்வாய் பாசனத்திற்கும் வினாடிக்கு 19,850 கன அடி வீதம் தண்ணீர் திறப்பு
சேலம்: மேட்டூர் அணையில் இருந்து காவேரி டெல்டா பாசனத்திற்கும் கால்வாய் பாசனத்திற்கும் வினாடிக்கு 19,850 கன அடி வீதம் தண்ணீர் திறக்கப்பட்டு வருகிறது.
மேட்டூர் அணை நீர்வரத்து வினாடிக்கு 19,850 கன அடியாக உள்ளது
தென்மேற்கு பருவமழை காரணமாக கபினி, கிருஷ்ணராஜசாகர் அணைகள் நிரம்பி உபரிநீர் காவிரியில் திறக்கப்பட்டது. கர்நாடக அணைகளின் உபரிநீர் வரத்து காரணமாக மேட்டூர் அணைக்கு நீர்வரத்து அதிகரித்து நடப்பு ஆண்டில் ஜூன் 29ந்தேதி முதல் முறையாகவும், ஜூலை 5ந்தேதி 2வதுமுறையாகவும் ஜூலை 20 ந்தேதி 3வது முறையாகவும் ஜூலை 25ந்தேதி 4வது முறையாகவும் ஆகஸ்ட் 20ம் தேதி 5வது முறையாக மேட்டூர் அணை அடுத்தடுத்து நிரம்பியது. அதன் பிறகு மழை குறைந்த காரணத்தாலும் காவிரி டெல்டா பாசனத்திற்கு தொடரந்து தண்ணீர் திறக்கப்பட்டு வந்ததாலும் அணையின் நீர் மட்டம் மெல்ல குறையத்தொடங்கியது.
மேட்டூர் அணையின் நீர்மட்டம் தொடர்ந்து 120 அடியாக நீடித்து வருகிறது. மேட்டூர் அணைக்கு சனிக்கிழமை காலை 6 மணிக்கு நீர்வரத்து வினாடிக்கு 19,850 கன அடியாக உள்ளது. அணையில் இருந்து காவேரி டெல்டா பாசனத்திற்கும் கால்வாய் பாசனத்திற்கும் வினாடிக்கு 19,850 கன அடி வீதம் தண்ணீர் திறக்கப்பட்டு வருகிறது.
நீர் மின் நிலையங்கள் வழியாக வினாடிக்கு 16,500 கன அடி நீரும், உபரி நீர் போக்கி வழியாக வினாடிக்கு 2500 கன அடி நீரும் திறக்கப்பட்டு வருகிறது. கிழக்கு - மேற்கு கால்வாய் பாசனத்திற்கு மேல்மட்ட மதகு வழியாக வினாடிக்கு 850 கன அடி வீதம் தண்ணீர் திறக்கப்பட்டு வருகிறது. அணையின் நீர்மட்டம் தொடர்ந்து 120 அடியாகவும், நீர் இருப்பு 93.47 டிஎம்சியாகவும் உள்ளது.
ஒகேனக்கல் காவிரியில் பரிசல் இயக்க அனுமதி
நீர்ப்பிடிப்பு பகுதிகளில் மழை தணிந்துள்ளதால், கர்நாடக அணைகளில் இருந்து உபரிநீர் திறப்பும் குறைக்கப்பட்டுள்ளது. இதனால், ஒகேனக்கல் காவிரியில் நேற்று முன்தினம் காலை 32,000 கனஅடியாக இருந்து நீர்வரத்து நேற்று மாலை 20,000 கனஅடியாக குறைந்தது.
நீர்வரத்து குறைந்துள்ளதால், 4 நாட்களுக்கு பின்னர், நேற்று பரிசல் இயக்க அனுமதி அளிக்கப்பட்டது. அதே நேரத்தில், அருவிகளில் குளிக்க விதிக்கப்பட்ட தடை நீடிக்கிறது. மேட்டூர் அணைக்கு நேற்று முன்தினம் காலை, 56,996 கனஅடியாக இருந்த நீர்வரத்து, நேற்று மாலை 19,850 கனஅடியாகவும் குறைந்தது. எனினும் அணையின் நீர்மட்டம் 4வது நாளாக 120 அடியாக நீடிக்கிறது.
தலைப்பு செய்திகள்
ட்ரெண்டிங் செய்திகள்
