கல்வி கட்டணம் செலுத்தாததால் பள்ளியில் அனுமதி மறுப்பு - சேலம் மாவட்ட ஆட்சியரிடம் மாணவி புகார்

’’ஏற்கனவே காக்காபாளையம் காவல் நிலையத்தில் இருதரப்பினரும் அளித்த புகாரின் பேரில் வழக்குப் பதிவு செய்யப்பட்டுள்ளது’’

பெற்றோருடன் மனு அளிக்க வந்த மாணவி

சேலம் மாவட்டம் இளம்பிள்ளை பகுதியை சேர்ந்த விவசாயி மோகன் என்பவரின் மகள் இதே பகுதியில் உள்ள தனியார் பள்ளியில் 10 ஆம் வகுப்பு பயின்று வருகிறார். இந்த நிலையில் நீண்ட நாட்களுக்கு பிறகு தமிழகத்தில் பள்ளிகள் திறக்கப்பட்டதால், இன்று வழக்கம்போல் பள்ளிக்கு சென்ற மாணவியை பள்ளிக்குள் அனுமதிக்காமல் வெளியே அனுப்பி விட்டதாக கூறி, பாதிக்கப்பட்ட மாணவி பள்ளி சீருடையுடன் பெற்றோரை அழைத்து வந்து சேலம் மாவட்ட ஆட்சியர் அலுவலகத்தில் புகார் மனு அளித்தார்.

சில நாட்களுக்கு முன்பு பள்ளி கட்டணம் செலுத்தவில்லை என்று கூறி, அடித்து அவமானப்படுத்தி வெளியே நிறுத்தியதால் தகவலறிந்து மாணவியின் பெற்றோர் நேரில் சென்று கேட்டுள்ளனர். அப்போது இருதரப்பினருக்கும் இடையே கடும் வாக்குவாதம் ஏற்பட்டதாக கூறப்படுகிறது. இது தொடர்பாக ஏற்கனவே காக்காபாளையம் காவல் நிலையத்தில் இருதரப்பினரும் அளித்த புகாரின் பேரில் வழக்குப் பதிவு செய்யப்பட்டுள்ளது. இந்த நிலையில் இன்று பள்ளிக்குள் அனுமதிக்காமல் வெளியேற்றியதாக மாணவி சேலம் மாவட்ட ஆட்சியரிடம் புகார் அளித்துள்ளார். 

சம்பந்தப்பட்ட பள்ளி நிர்வாகம் வார வேலை நாட்களில் காலை 9 மணி முதல் இரவு 11 மணி வரை வகுப்புகள் நடத்துவதாகவும், விடுமுறை நாட்களான சனி மற்றும் ஞாயிற்றுக்கிழமைகளிலும் கூடுதல் நேரத்தில் வகுப்புகளை நடத்துவதாகவும் கூறும் மாணவியின் தந்தை மோகன், இதற்காக பள்ளியில் இருந்து வழங்கப்பட்ட ஒப்புதல் கடிதத்தில் பெற்றோர் கையெழுத்திட வேண்டும் என்று கட்டாயப் படுத்தியதாகவும், இதனால் உரிய பாதுகாப்பு இல்லை என்று கூறி கையெழுத்திட மறுத்ததாகவும் கூறுகிறார். இதன் காரணமாகவே பழிவாங்கும் நடவடிக்கையாக தன் மகளை பள்ளியில் இருந்து பள்ளியில் இருந்து வெளியேறியதாகவும் மாணவியின் தந்தை மோகன் குற்றம்சாட்டியுள்ளார்.

இது தொடர்பாக பள்ளி நிர்வாகத்திடம் தொடர்பு கொண்டு கேட்டபோது, தங்கள் பள்ளியில் சம்பந்தப்பட்ட மாணவி மற்றும் அவரது சகோதரர் என இரண்டு பேர் படிப்பதாகவும், இதுவரை அவர்கள் பள்ளி கட்டணம் செலுத்த சொல்லி கேட்டதாக கூறப்படுகிறது. இதனால் கடந்த சில நாட்களுக்கு முன்பு மாணவியின் பெற்றோர் தகராறில் ஈடுபட்டனர். இதுகுறித்து காவல் நிலையத்தில் பள்ளி நிர்வாகம் சார்பாக புகார் அளிக்கப்பட்டு சமரச பேச்சு வார்த்தைக்கும் மாணவியின் பெற்றோர் வந்ததாகவும், ஆனால் அதன்பின் பெற்றோர் தரப்பிலிருந்து எந்தவித தகவலும் இல்லை என்று கூறினர். மேலும் இன்று பள்ளிகள் மீண்டும் திறக்கப்பட்டது இடத்தில் படித்து வந்த மாணவி உறவினர் ஒருவரோடு வந்ததாகவும், பெற்றோரை அழைத்து வரும்படி கூறி அனுப்பினோம் ஆனால் அவர் மீண்டும் பள்ளிக்கு வராமல் மாவட்ட ஆட்சியர் அலுவலகத்திற்கு வந்துள்ளார் என்றும் விளக்கமளித்தனர்.