![metaverse](https://cdn.abplive.com/imagebank/metaverse-top.png)
Salem Book fair: சேலம் புத்தகக் கண்காட்சி: இரண்டாம் நாளில் குவிந்த கூட்டம்... புத்தகம் வாங்க பள்ளி மாணவர்கள் ஆர்வம்
இரண்டாம் நாளான இன்று காலை முதலை பள்ளி மாணவர்கள் மற்றும் சேலம் மாவட்டத்தில் உள்ள புத்தக ஆர்வலர்கள் பலர் சேலம் புத்தக கண்காட்சிகளை பார்வையிட்டனர்.
![Salem Book fair: சேலம் புத்தகக் கண்காட்சி: இரண்டாம் நாளில் குவிந்த கூட்டம்... புத்தகம் வாங்க பள்ளி மாணவர்கள் ஆர்வம் Salem Book Fair is being discovered by school students and the public with great interest. Salem Book fair: சேலம் புத்தகக் கண்காட்சி: இரண்டாம் நாளில் குவிந்த கூட்டம்... புத்தகம் வாங்க பள்ளி மாணவர்கள் ஆர்வம்](https://feeds.abplive.com/onecms/images/uploaded-images/2022/11/21/b8429e4a80ae87f0d70525a03d5b81511669030301785189_original.jpg?impolicy=abp_cdn&imwidth=1200&height=675)
சேலம் மாவட்ட நிர்வாகம் சார்பில் புதிய பேருந்து நிலையம் அருகே உள்ள மாநகராட்சி திடலில் சேலம் புத்தகத் திருவிழா அமைக்கப்பட்டுள்ளது. இந்த புத்தக கண்காட்சியில் 210 அரங்குகள் அமைக்கப்பட்டுள்ளது. சுமார் 100 பதிப்பகங்கள் மூலம் ஒரு லட்சத்திற்கும் மேற்பட்ட புத்தகங்கள் இங்கு காட்சிப்படுத்தப்பட்டுள்ளது. இந்த புத்தக கண்காட்சி நேற்று துவங்கி வரும் 30 ஆம் தேதி வரை நடைபெற உள்ளது. இந்த புத்தக கண்காட்சியை நகராட்சி நிர்வாக துறை அமைச்சர் கே.என்.நேரு நேற்று ரிப்பன் வெட்டி துவக்கி வைத்து புத்தக அரங்குகளை பார்வையிட்டார். புத்தகக் கண்காட்சியை பார்க்க வரும் பள்ளி, கல்லூரி மாணவர்கள் மற்றும் பொதுமக்களுக்கு தேவையான அடிப்படை வசதிகள் என்னென்ன ஏற்படுத்தப்பட்டுள்ளது என்பது குறித்து அதிகாரிகளிடம் அவர் கேட்டறிந்தார்.
இரண்டாம் நாளான இன்று காலை முதலை பள்ளி மாணவர்கள் மற்றும் சேலம் மாவட்டத்தில் உள்ள புத்தக ஆர்வலர்கள் பலர் சேலம் புத்தக கண்காட்சிகளை பார்வையிட்டனர். பள்ளியில் வகுப்பு பாடங்களை தவிர்த்து இன்று ஒரு நாள் கல்வி சுற்றுலா போல் சேலம் புத்தகக் கண்காட்சிக்கு அழைத்து வந்தது புது அனுபவமாக உள்ளது என பள்ளி மாணவர்கள் கூறினர். குறிப்பாக இன்று ஒரே நாளில் ஐயாயிரத்திற்கும் மேற்பட்டோர் புத்தக கண்காட்சியினை பார்வையிட வந்துள்ளதாக கூறப்படுகிறது. சேலம் மாவட்டம் மட்டுமின்றி தர்மபுரி, கிருஷ்ணகிரி, நாமக்கல் மற்றும் கள்ளக்குறிச்சி ஆகிய மாவட்டங்களில் இருந்தும் புத்தக ஆர்வலர்கள் சேலத்திற்கு படையெடுத்து வருகின்றனர். சேலம் புத்தக கண்காட்சியில் இளைஞர்கள் அதிக அளவில் புத்தகங்களை வாங்குவதற்கு ஆர்வம் காட்டி வருவதாக கூறப்படுகிறது. குறிப்பாக தமிழர்களின் வரலாற்றை குறிக்கும் பொன்னியின் செல்வன், வேள்பாரி, ராமாயணம், மகாபாரதம் போன்ற பல்வேறு புத்தகங்களுக்கு இளைஞர்கள் ஆர்வம் காட்டி வருகின்றனர்.
இந்த புத்தக கண்காட்சியில் தமிழர்களின் வரலாறு, இலக்கியம் மற்றும் இலக்கணம் போன்ற புத்தகங்கள், வரலாற்று சிறப்புமிக்க நூல்கள், சிறுகதை புத்தகங்கள், சிறுவர்கள் படிக்கக்கூடிய கார்ட்டூன் புத்தகங்கள், ஆங்கில கதை புத்தகங்கள், யோகா மற்றும் மருத்துவ புத்தகங்கள் அதிக அளவில் பொதுமக்கள் வாங்கி செல்கின்றனர்.
சேலம் மாவட்ட நிர்வாகம் சார்பில் தினசரி கலை பண்பாடு கலாச்சாரம் சார்ந்த கலை நிகழ்ச்சிகளும், தலைசிறந்த பேச்சாளர்களின் கருத்தரங்கமும் நடத்த ஏற்பாடு செய்யப்பட்டுள்ளது. இதன் ஒரு பகுதியாக இன்று சேலம் மாவட்டத்தில் உள்ள பல்வேறு பள்ளிகளைச் சார்ந்த மாணவ, மாணவிகளை புத்தக கண்காட்சியை பார்வையிட ஏற்பாடுகள் செய்தனர்.
மேலும், சேலம் புத்தக கண்காட்சிக்கு வரும் மாணவர்கள் மற்றும் பொதுமக்கள் இங்கேயே அமர்ந்து புத்தகங்கள் வாசித்து பயன்பெறும் வகையில் வாசிப்பு அரங்குகளும் ஒலி, ஒளி அரங்குகளும் அமைக்கப்பட்டுள்ளது. இந்த புத்தக கண்காட்சியை முன்னிட்டு கண்காட்சி அரங்கம் அமைக்கப்பட்டுள்ள இந்த பகுதி சைலன்ட் சோனாக அறிவிக்கப்பட்டுள்ளது. அதாவது நான்கு ரோடு சந்திப்பு முதல் ஐந்து ரோடு சந்திப்பு வரை செல்லும் அனைத்து வாகனங்களும் ஒலி எழுப்ப தடை விதிக்கப்பட்டுள்ளது. சேலம் மாவட்ட உத்தரவை மீறி வாகன ஓட்டிகள் குறிப்பிட்ட இப் பகுதியில் ஒளியை எழுப்பினால் வாகன ஓட்டிகள் மீது அபராதம் விதிக்கப்படும் என போக்குவரத்து காவல்துறையினர் எச்சரிக்கை விடுத்துள்ளனர்.
தலைப்பு செய்திகள்
ட்ரெண்டிங் செய்திகள்
![metaverse](https://cdn.abplive.com/imagebank/metaverse-mid.png)
![வினய் லால்](https://cdn.abplive.com/imagebank/editor.png)