விடுமுறைக்கு பின் கூடும் சட்டசபை... 2 முக்கிய துறைகளின் மானியக் கோரிக்கை மீது இன்று விவாதம்!

Tamil Nadu Assembly Updates: "தமிழக சட்டசபையில் நடப்பு கூட்டத்தொடரின், மானியக் கோரிக்கை மீதான விவாதம், இன்று முதல் தொடங்க உள்ளது."

தமிழ்நாடு சட்டமன்ற பட்ஜெட் கூட்டத்தொடர்

Source : ABP

தமிழக சட்டசபையில் நடப்பு கூட்டத்தொடரின் முக்கிய கட்டமாக, மானியக் கோரிக்கைகள் மீதான விவாதம் இன்று முதல் தொடங்குகிறது. தமிழக வெற்றி கழகம் ஆட்சியைப் பிடித்ததைத் தொடர்ந்து நடைபெறும் முதல் பட்ஜெட் கூட்டத்தொடர் இம்மாதம் 5-ம் தேதி தொடங்கியது. அன்றைய தினம் 2026 – 27-ம் நிதியாண்டிற்கான பொது பட்ஜெட்டை நிதி அமைச்சர் மரியவில்சனும், அதற்கு மறுநாள் காலையில் வேளாண் பட்ஜெட்டை வேளாண் துறை அமைச்சர் வினோத்தும் தாக்கல் செய்தனர்.

பட்ஜெட் மீதான விவாதமும் பதில்களும்

கடந்த 7-ம் தேதி முதல் 11-ம் தேதி வரை இரு பட்ஜெட்டுகள் மீதும் சட்டமன்றத்தில் விரிவான விவாதம் நடைபெற்றது. அப்போது எதிர்க்கட்சியினர், தேர்தல் வாக்குறுதிகள் எதுவும் பட்ஜெட்டில் இடம்பெறவில்லை என்பது உள்ளிட்ட பல்வேறு குற்றச்சாட்டுகளை முன்வைத்தனர். தொடர்ந்து 12-ம் தேதி நடந்த கூட்டத்தில் எதிர்க்கட்சியினரின் இந்தக் குற்றச்சாட்டுகளுக்கு அமைச்சர்கள் மரியவில்சன் மற்றும் வினோத் ஆகியோர் முறைப்படி பதில் அளித்து உரையாற்றினர்.

விடுமுறைக்குப் பின் கூடும் சட்டசபை

கடந்த 13-ம் தேதி முதல் நேற்று வரை அரசு விடுமுறை உட்பட பல்வேறு காரணங்களால் சட்டமன்ற கூட்டத்தொடருக்கு விடுமுறை அளிக்கப்பட்டிருந்தது. இந்நிலையில், நான்கு நாட்கள் இடைவெளிக்குப் பிறகு சட்டசபை இன்று மீண்டும் கூடுகிறது. இன்றைய கூட்டத்தில் வருவாய் மற்றும் பேரிடர் மேலாண்மைத் துறை, மருத்துவம் மற்றும் மக்கள் நல்வாழ்வுத் துறை ஆகியவற்றின் மானியக் கோரிக்கைகள் மீது விவாதம் நடைபெற உள்ளது.

முக்கிய அறிவிப்புகள் மற்றும் அமைச்சர்களின் பதில்

இன்றைய விவாதத்தில் ஆளுங்கட்சி மற்றும் எதிர்க்கட்சி சட்டமன்ற உறுப்பினர்கள் பங்கேற்றுப் பேசுகின்றனர். விவாதத்தின் முடிவில் சம்பந்தப்பட்ட துறை அமைச்சர்களான செங்கோட்டையன் மற்றும் அருண்ராஜ் ஆகியோர் உறுப்பினர்களின் கேள்விகளுக்குப் பதிலளித்து, தங்களது துறைகள் சார்ந்த புதிய முக்கிய அறிவிப்புகளை வெளியிடவுள்ளனர்.

துறைப் பொறுப்புகளின் கூடுதல் விவரம்

முதலமைச்சரின் கட்டுப்பாட்டில் உள்ள துறைகளில், மாற்றுத் திறனாளிகள் துறையில் பதவி உயர்வு மற்றும் கருணை அடிப்படையில் பணி நியமனம் தொடர்பான கோப்புகளைக் கவனிக்கும் பொறுப்பு சமூக நலத்துறை அமைச்சர் ஜெகதீஸ்வரியிடம் வழங்கப்பட்டுள்ளது. அதேபோல், நகராட்சி நிர்வாகம் மற்றும் குடிநீர் வழங்கல் துறை தொடர்பான கோப்புகளைப் பள்ளிக்கல்வித்துறை அமைச்சர் ராஜ்மோகன் கவனிப்பார் என்று ஏற்கனவே அறிவிக்கப்பட்டுள்ளதால், அந்தத் துறைகளுக்கான மானியக் கோரிக்கை விவாதங்களுக்கும் அவர்களே பதிலளிப்பார்கள் என எதிர்பார்க்கப்படுகிறது.