AIADMK: அதிமுகவில் ஒற்றைத்தலைமை கன்ஃபார்ம்...! நீதிமன்றத்தில் நடந்த காரசார விவாதம் இதுதான்..!

நீதிமன்றத்தில் இன்று 3 மணி நேரமாக  ஈபிஎஸ், ஓபிஎஸ் தரப்பிடையே நடந்த காரசார விவாதம், அதன் பின்னர் நீதிபதி அளித்த தீர்ப்பு, நாளை நடக்க இருக்கும் பொதுக்குழு கூட்டம் குறித்து அலசுகிறது இந்தக்கட்டுரை.

பொதுக்குழு கூட்டம்

நீதிமன்றத்தில் இன்று 3 மணி நேரமாக  ஈபிஎஸ், ஓபிஎஸ் தரப்பிடையே நடந்த காரசார விவாதம், அதன் பின்னர் நீதிபதி அளித்த தீர்ப்பு, நாளை நடக்க இருக்கும் பொதுக்குழு கூட்டம் குறித்து அலசுகிறது இந்தக்கட்டுரை.

நாளை வானகரத்தில் நடக்க இருக்கும் அதிமுக பொதுக்குழு கூட்டத்திற்கு தடை கேட்டு ஓபிஎஸ் தரப்பு சென்னை உயர்நீதிமன்றத்தில் வழக்கு தொடர்ந்தது. அந்த வழக்கு மீதான விசாரணை நீதிபதி கிருஷ்ணன் ராமசாமி முன்னிலையில் இன்று நடந்தது.   

ஓபிஎஸ் தரப்பு வாதம்

இந்த விசாரணையில், ஓபிஎஸ் தரப்பு “பொதுக்குழு நடத்தலாம். ஆனால் ஒற்றைத் தலைமை குறித்து தீர்மானம் கொண்டுவரக்கூடாது. பொதுக்குழுவை வழக்கமான முறையில் நடத்த எங்களுக்கு ஆட்சேபனை இல்லை. ஆனால் தலைமையை மாற்றும் திருத்தங்களை செய்யக்கூடாது.” என்று வாதிட்டது. 

23 தீர்மானங்களுக்கு ஒப்புதல் 

மேலும், “ கடந்த டிசம்பரில் உட்கட்சித் தேர்தல் நடந்து ஒருமனதாக ஒருங்கிணைப்பாளர் பதவி உருவாக்கப்பட்டது. அதை தேர்தல் ஆணையம் ஏற்றுள்ளது. அந்தப்பதவிக்கு 5 ஆண்டுகள் பதவிக்காலம் உள்ளது. 23 வரைவு தீமானங்களுடன் கட்சி அலுவலகத்தில் இருந்து மின்னஞ்சல் வந்தது. அந்த தீர்மானங்களுக்கு ஒப்புதல் கொடுக்கப்பட்டுள்ளது. அந்த தீர்மானங்களை தவிர்த்து வேறு எந்த அஜெண்டாவையும் அனுமதிக்க முடியாது.

23 வரைவு தீர்மானங்களின் நகல் உயர்நீதிமன்றத்தில் சமர்ப்பிக்கப்பட்டுள்ளது. ஓ.பி.எஸ். ஒப்புதல் அளித்துள்ள வரைவு தீர்மானங்களில் ஒற்றைத் தலைமை தீர்மானம் இல்லை. இந்த 23 தீர்மானங்களைத் தவிர வேறு புதிதாக தீர்மானங்களை சேர்க்கக்கூடாது. அதிமுக விதிகளுக்கு எதிராக செயல்பட மாட்டேன் எனவும் ஓ.பி.எஸ் சார்பில் உத்தரவாதம் அளிக்கப்பட்டது. 

எடப்பாடி தரப்பு வாதம்: 

2017ல் பொதுக்குழு தீர்மானம் மூலம்தான் அதிமுக கட்சி விதிகள் திருத்தப்பட்டன என்று ஈ.பி.எஸ். தரப்பு வாதிட்டது. 

எடப்பாடி தரப்பு வாதத்தில், “ ஒருங்கிணைப்பாளர், இணை ஒருங்கிணைப்பாளரை விட பொது குழுவுக்கே அதிக அதிகாரம் உள்ளது. பொதுக்குழுவிற்கு ஒருங்கிணைப்பாளர், இணை ஒருங்கிணைப்பாளர் இணைந்தே அழைப்பு விடுத்துள்ளனர். பொதுக்குழுவில் எந்த முடிவும் எடுக்கப்படலாம். இது நடக்கும், நடக்காது என உத்தரவாதமாக சொல்ல முடியாது. எந்த விதியையும் சேர்க்கவோ, நீக்கவோ பொதுக்குழுவால் முடியும், அதற்கு மட்டுமே அதிகாரம் உள்ளது. கொள்கை உருவாக்குவது உள்ளிட்ட அனைத்துக்கும் பொதுக்குழுவுக்கே அதிகாரம் உள்ளது.

நாளைய பொதுக்குழுவில் திருத்தம் நடக்கலாம், நடக்காமல் இருக்கலாம்.பொதுக்குழுவில் பெரும்பான்மையான கருத்துக்கு மதிப்பளிப்பதே ஜனநாயகம். அஜெண்டா இல்லாமல்தான் ஏற்கனவே பொதுக்குழுக்கள் நடத்தப்பட்டுள்ளன. பொதுக்குழு தான் கட்சியின் உச்சபட்ச அமைப்பு. ஒருங்கிணைப்பாளரோ, இணை ஒருங்கிணைப்பாளரோ இல்லை. பெரும்பாலான உறுப்பினர்கள் பொதுக்குழுவை கூட்ட வலியுறுத்தியுள்ளனர்.

பொதுக்குழுவை இருவரும் இணைந்து கூட்ட முடியும், பொதுக்குழு முடிவுகள் கட்சியினரை கட்டுப்படுத்தும். எந்த விதியையும், நீக்கவோ, சேர்க்கவோ 2665 உறுப்பினர்களைக் கொண்ட பொதுக்குழுவுக்கு மட்டுமே அதிகாரம் உள்ளது. விதிகளை திருத்த யாரிடமும் அனுமதி பெறவேண்டியதில்லை. தேர்தல் ஆணையத்திடம் தெரிவித்தால் போதுமானது. ஆகையால் நாளை நடைபெறும் அதிமுக பொதுக்குழு கூட்டத்துக்கு தடை விதிக்க கூடாது”  எனத் தெரிவிக்கப்பட்டது. 

அதைத்தொடர்ந்து வாதிட்ட ஓபிஎஸ் தரப்பு , “ எந்த உறுப்பினரும் பொதுக்குழு கூட்டத்தில் குரல் எழுப்பலாம் என்பதற்கான விதிகளை காட்ட வேண்டும். பொதுக்குழுவில் முடிவுகளை காக்கின்ற அறங்காவலர்களாகத்தான் பிற நிர்வாகிகள் செயல்பட முடியும். பொதுக்குழுவில் செயல் திட்டத்தை முன் கூட்டியே தெரிவிக்க வேண்டும். பொதுக்குழுவில் சிலர் விருப்பத்திற்கேற்ப முடிவுகள் எடுக்க கூடாது” என்று  வாதிடப்பட்டது. 

 

இரு தரப்பு வாதங்களையும் கேட்ட நீதிபதி பொதுக்குழு நடத்த தடைக்கேட்ட வழக்குகளில் எந்த முகாந்திரமும் இல்லாத காரணத்தால் மனுக்களை தள்ளுபடி செய்து பொதுக்குழு கூட்டம் நடத்த அனுமதியளித்தது. இதனையடுத்து ஈபிஎஸ் தரப்பு வழக்கறிஞர் பாலமுருகன் செய்தியாளர்களுக்கு பேட்டியளித்தார்.

அவர் பேசும் போது, “ “அதிமுக சார்பில் நாளை நடக்க இருக்கும் பொதுக்குழு கூட்டத்திற்கு எந்தத் தடையும் இல்லை என்று நீதிமன்றம் உத்தரவிட்டுள்ளது. இன்று சண்முகம், பழனிசாமி மகன் சுரேன், ராம் குமார் ஆதித்தன், தணிகாச்சலம் ஆகியோர் சென்னை உயர்நீதிமன்றத்தில் நாளை நடக்க இருக்கும் பொதுக்குழு கூட்டத்திற்கு தடை கேட்டு வழக்கு தொடர்ந்தனர்.  

 

அந்த மனுவை விசாரித்த நீதிபதி கிருஷ்ணன் ராமசாமி இந்த மூன்று வழக்குகளில் எந்த முகாந்திரமும் இல்லை என்று கூறி தள்ளுபடி செய்ததோடு நாளை பொதுக்குழு நடத்தலாம் என்று உத்தரவிட்டுள்ளார். மேலும் 23 ஆவது உரிமையியல் நீதிமன்றத்தில் பாலக்கிருஷ்ணன் என்பவர் இடைக்கால மனுவை தாக்கல் செய்திருந்தார்.

அந்த மனுவும் தள்ளுபடி செய்யப்பட்டது. அதிமுக தரப்பில் முன்னாள் வழக்கறிஞர் ஜெனரல் விஜயநாரயணன் ஆஜராகி பொதுக்குழு நடைபெறுவது இயல்பான செயல், இந்த கூட்டத்தில் பங்கு கொள்ள முறையாக அழைப்பு விடுக்கப்பட்டுள்ளது என்று வாதிட்டார். அதனை ஏற்றுக்கொண்ட நீதிபதி நாளை பொதுக்குழுவிற்கு எந்த வித தடையில்லை என்று உத்தரவிட்டார்.” என்று பேசினார்.  

இந்நிலையில் இபிஎஸ் தரப்பு கூறிவந்தபடி நாளை நடக்கவிருக்கும் பொதுக்குழு கூட்டத்தில் ஒற்றைத்தலைமை தீர்மானம் நிறைவேற்றப்படும் என எதிர்ப்பார்க்கப்படுகிறது. மேலும் கட்சி விதிகளை மாற்றியமைத்து பொதுச்செயலாளராகவும் இபிஎஸ் தேர்ந்தெடுக்கப்படலாம் எனத் தெரிகிறது. என்ன நடக்கும் என்பதை நாளை பொறுத்திருந்துதான் பார்க்க வேண்டும்