நரிக்குறவர் மாணவர்களுக்கு பல ஆயிரம் செலவில் புத்தகங்கள் வாங்கி தந்த வட்டாட்சியர் - சீர்காழியில் நெகிழ்ச்சி

வெளியுலகமே காணாத நரிக்குறவர் இன மாணவர்களை புத்தகக் கண்காட்சிக்கு அழைத்து சென்றதுடன், அவர்கள் விரும்பிய புத்தகங்களை தனது சொந்த பணத்தில் வாங்கியும் கொடுத்து நெகிழ வைத்துள்ளார் சீர்காழி வட்டாட்சியர். 

மாணவர்களுக்காக வாங்கப்பட்ட புத்தங்கள்

மயிலாடுதுறை மாவட்டம் சீர்காழி அருகே வெளியுலகமே காணாத நரிக்குறவர் இன மாணவர்களை புத்தகக் கண்காட்சிக்கு அழைத்து சென்றதுடன், அவர்கள் விரும்பிய புத்தகங்களை தனது சொந்த பணத்தில் வாங்கியும் கொடுத்து நெகிழ வைத்துள்ள சீர்காழி வட்டாட்சியருக்கு பாராட்டுக்கள் குவியும் வருகிறது. மயிலாடுதுறை மாவட்டத்தில் அரசு சார்பில் புத்தகத் திருவிழா கடந்த பிப்ரவரி 2 -ம் தேதி தொடங்கி தற்போது நடைபெற்று வருகிறது.  வருகிற பிப்ரவரி 12 ஆம் தேதி வரை நடைபெறும் இந்த புத்தக கண்காட்சியை பெருந்திரளான பொதுமக்களும், பள்ளி, கல்லூரி மாணவ, மாணவிகளும் நாள்தோறும் கண்டும், புத்தகங்களை வாங்கியும் மகிழ்ந்து வருகின்றனர்.

இந்நிலையில் மயிலாடுதுறை மாவட்டம்  சீர்காழி அருகே அரசூர் பகுதியில் நரிக்குறவர் இனத்தைச் சேர்ந்தகள் வசித்து வருகின்றனர். இந்த சூழலில் அவரவர்களின் பள்ளியில் குழந்தைகள் பள்ளியை கடந்து வெளியுலக அறியாமல் இருந்து வருகின்றனர். இந்த செய்தி அறிந்த சீர்காழி வட்டாட்சியர் இளங்கோவன், மாணவர்களின் கல்வித் தரத்தை உயர்த்தும் எண்ணத்தில் அனைவரையும் புத்தகக் கண்காட்சிக்கு அழைத்து செல்ல முடிவு செய்துள்ளார். அதற்காக தனது சொந்த பணத்தில் இரண்டு வேன்களை வாடகைக்கு எடுத்து, அதில் 50 -க்கும் மேற்பட்ட மாணவ - மாணவிகள் மற்றும் அவர்களின் பெற்றோர்களை அழைத்துக்கொண்டு மயிலாடுதுறை தருமபுரம் ஆதீனம் கலை - அறிவியல் கல்லூரியில் நடைபெறும் புத்தக கண்காட்சிக்கு அழைத்து சென்றுள்ளார்.

அங்கு சென்ற அவர்கள் அனைத்து புத்தக அரங்குகளையும், அறிவியல் சார்ந்த நிகழ்வுகளையும் கண்டு மிகவும் வியப்பில் ஆழ்ந்தனர். அதோடு மட்டுமின்றி புத்தக கண்காட்சி கண்டு மகிழ்ச்சியை திளைத்திருந்த மாணவர்களுக்கு, அவர்கள் கேட்ட அனைத்து நூல்களையும் தனது சொந்த பணத்திலேயே பல ஆயிரங்கள் செலவு செய்து வாங்கி கொடுத்து அசத்தியுள்ளார் வட்டாட்சியர் இளங்கோவன். இதனை அடுத்து அந்த புத்தகங்களை சீர்காழி கோட்டாட்சியர் அர்ச்சனா தனது கரங்களால் புத்தகங்களை வழங்கினார். வெளியுலகம் அறியாத இந்த மாணவர்களின் கனவுகளை நினைவாக்கியத்துடன் அவர்களுக்கு தாயன்போடு வேண்டிய புத்தகங்களையும் வாங்கி கொடுத்ததை மாணவர்களின் பெற்றோர்கள் பெரிதும் பாராட்டினர். 

நீண்ட நேரம் ஒவ்வொரு அரங்குக்கும் சென்று மாணவர்களை மெதுவாக புத்தகங்களை வாசிக்க வைத்து அவர்களுக்கு தேவையான உணவு பொருட்களையும், வாங்கி கொடுத்து உண்மையிலேயே அவர்களின் கனவு நாயகனாக மாறி இருக்கிறார் வட்டாட்சியர் இளங்கோவன். வட்டாட்சியரின் இந்த அற்புதமான செயலை கண்டு அங்கிருந்து மாவட்ட ஆட்சியர், மாவட்ட வருவாய் அலுவலர், நிகழ்ச்சியின் சிறப்பு விருந்தினர்கள், தமிழ் ஆர்வலர்கள் என அனைவரும் வாழ்த்து தெரிவித்தனர். வாழ்க்கையில் ஒரு முறையாவது இதுபோன்ற இடங்களுக்கு சென்று விட மாட்டோமா என்ற அந்த மாணவர்கள் எண்ணத்தில் குத்துவிளக்கு ஏற்றி வைத்த வட்டாட்சியருக்கு பல தரப்பில் இருந்தும் பாராட்டுக்கள் குவிந்து வருகிறது.