திங்கட்கிழமை (மார்ச் 30) மயிலாடுதுறையில் சாலை மறியல் போராட்டம் - காரணம் என்ன? முழு விவரம் உள்ளே!

மயிலாடுதுறையில் புதிய பேருந்து நிலையத் திறப்பால் ஏற்பட்டுள்ள போக்குவரத்து குளறுபடிகளை சரி செய்ய வலியுறுத்தி மார்ச் 30-ல் விவசாய சங்கத்தினர் சாலை மறியல் போராட்டத்தை அறிவித்துள்ளனர்.

ஆலோசனை கூட்டம்

Source : ABP

மயிலாடுதுறை: மயிலாடுதுறை நகரில் போக்குவரத்து நெரிசலைக் குறைப்பதற்காகக் கொண்டு வரப்பட்ட புதிய பேருந்து நிலையத் திட்டம், முறையான திட்டமிடல் இன்றி அவசர கதியில் நடைமுறைப்படுத்தப்பட்டதால் பொதுமக்களின் இயல்பு வாழ்க்கை கடுமையாகப் பாதிக்கப்பட்டுள்ளது. இதனை கண்டித்தும், பழைய பேருந்து நிலையத்தை மீண்டும் பழைய முறையில் செயல்பாட்டிற்கு கொண்டு வர வலியுறுத்தியும் வரும் திங்கட்கிழமை (மார்ச் 30) பெரும் போராட்டத்திற்கு விவசாய சங்கங்கள் அழைப்பு விடுத்துள்ளன.

திட்டமிடல் இல்லாத மாற்றத்தால் ஸ்தம்பித்த மயிலாடுதுறை

மயிலாடுதுறை நகரின் மையப்பகுதியில் அமைந்துள்ள காமராஜர் பேருந்து நிலையம் மற்றும் நகர பூங்கா பேருந்து நிலையம் ஆகிய இரண்டும் நீண்டகாலமாக மக்களின் போக்குவரத்துத் தேவையைப் பூர்த்தி செய்து வந்தன. அதிகரித்து வரும் வாகனப் பெருக்கம் மற்றும் இடநெருக்கடியைக் கருத்தில் கொண்டு, நகருக்கு வெளியே மணக்குடி பகுதியில் நவீன வசதிகளுடன் கூடிய புதிய பேருந்து நிலையம் அமைக்கப்பட்டது. இந்த புதிய பேருந்து நிலையம் அண்மையில் திறக்கப்பட்டு பயன்பாட்டுக்கு வந்தது.

ஆனால், இந்தப் பேருந்து நிலையத்தை முக்கிய சாலைகளுடன் இணைக்கும் புறவழிச்சாலை (Bypass Road) பணிகள் இன்னும் முழுமையாக நிறைவடையவில்லை. இச்சூழலில், எவ்வித முன்னறிவிப்பும் இன்றி நகர பூங்கா பேருந்து நிலையம் திடீரென மூடப்பட்டது மக்களிடையே பெரும் அதிர்ச்சியை ஏற்படுத்தியுள்ளது.

பயணிகளின் அவதி: மாணவர்கள் மற்றும் தொழிலாளர்கள் பாதிப்பு

நகரப் பேருந்து நிலையம் மூடப்பட்டதால், புறநகர் பேருந்துகள் எந்தப் பாதையில் செல்கின்றன, எங்கு நிறுத்தப்படுகின்றன என்பது குறித்து முறையான அறிவிப்பு ஏதும் மாவட்ட நிர்வாகம் சார்பில் வெளியிடப்படவில்லை. இதனால் பள்ளி மற்றும் கல்லூரிக்குச் செல்லும் மாணவ, மாணவிகள் பேருந்து நிறுத்தங்களை அறியாமல் மணிக்கணக்கில் காத்திருக்கும் அவலம் ஏற்பட்டுள்ளது.

போக்குவரத்து நெரிசல்: புறநகர் பேருந்துகள் பேருந்து நிலையத்திற்கு வெளியில் பிரதான சாலைகளின் ஓரத்திலேயே பயணிகளை இறக்கிவிட்டுச் செல்கின்றன. இதனால் நகரின் முக்கிய சந்திப்புகளில் தினமும் கடுமையான போக்குவரத்து நெரிசல் ஏற்பட்டு வாகனங்கள் ஊர்ந்து செல்லும் நிலை உருவாகியுள்ளது.

விவசாய சங்கங்களின் அவசர ஆலோசனைக் கூட்டம்

பொதுமக்களின் இந்தப் போராட்ட நிலையை முன்னிறுத்தி, விவசாய சங்கங்களின் கூட்டமைப்பு சார்பில் மயிலாடுதுறை நகரப் பூங்காவில் அவசர ஆலோசனைக் கூட்டம் நடைபெற்றது. இந்தக் கூட்டத்திற்கு ஒருங்கிணைப்பாளரும் இயற்கை விவசாயியுமான ராமலிங்கம் தலைமை தாங்கினார்.

தமிழர் தேசிய முன்னணி பொறுப்பாளர் பேராசிரியர் முரளிதரன், தமிழ்நாடு விவசாயிகள் சங்கம் மாவட்ட துணைச் செயலாளர் மேகநாதன், டெல்டா பாசன விவசாயிகள் சங்கம் தலைவர் அன்பழகன், கரும்பு விவசாயிகள் சங்கம் மாவட்டச் செயலாளர் முருகன் உள்ளிட்ட பலர் இதில் கலந்து கொண்டு இப்பிரச்சினை குறித்து கருத்துகளை தெரிவித்தனர். 

நிர்வாகத்திற்கு கண்டனம் மற்றும் கோரிக்கைகள்

கூட்டத்தில் உரையாற்றிய நிர்வாகிகள், மாவட்ட நிர்வாகத்தின் ஒருதலைப்பட்சமான முடிவைக் கடுமையாகச் சாடினர்.

"புறவழிச்சாலை பணிகள் 50 சதவீதம் கூட முடிவடையாத நிலையில், புதிய பேருந்து நிலையத்திற்குப் பேருந்துகளை மாற்றியது முதிர்ச்சியற்ற செயல். சாலை வசதிகள் மற்றும் இணைப்புச் சாலைகள் முழுமையாகச் சீரமைக்கப்படும் வரை, பழைய பேருந்து நிலையமே புறநகர் பேருந்துகளுக்கு மையமாக இருக்க வேண்டும்" என வலியுறுத்தினர். முறையான அறிவிப்பின்றி பேருந்து நிலையத்தை மூடி, மக்களை அலைக்கழிக்கும் மாவட்ட நிர்வாகத்திற்கு இந்தக் கூட்டத்தில் ஒருமனதாகக் கண்டனம் தெரிவிக்கப்பட்டது.

மார்ச் 30: சாலை மறியல் போராட்டம்

ஆலோசனைக் கூட்டத்தின் முடிவில் எடுக்கப்பட்ட முக்கிய முடிவுகள் குறித்து ஒருங்கிணைப்பாளர் ராமலிங்கம் செய்தியாளர்களிடம் பேசுகையில்:

"மக்களின் அடிப்படைத் தேவையை உணராமல் நிர்வாகம் செயல்படுகிறது. சாலை வசதிகள் முழுமையாகச் சீரமைக்கப்படும் வரை, பழைய பேருந்து நிலையத்திலிருந்து வழக்கம்போல் புறநகர் பேருந்துகளை இயக்க வேண்டும். இதனை வலியுறுத்தி, வரும் திங்கட்கிழமை (மார்ச் 30-ஆம் தேதி) மயிலாடுதுறையில் பிரம்மாண்டமான சாலை மறியல் போராட்டம் நடத்தப்படும். இதில் விவசாயிகள், பொதுமக்கள் மற்றும் மாணவர்கள் பெருந்திரளாகக் கலந்துகொள்வார்கள்," என எச்சரிக்கை விடுத்தார்.

இந்த அறிவிப்பால் மயிலாடுதுறையில் பரபரப்பான சூழல் நிலவுகிறது. மாவட்ட நிர்வாகம் போராட்டத்திற்கு முன்பாக பேச்சுவார்த்தை நடத்தி சுமூகத் தீர்வு காணுமா அல்லது போராட்டம் வலுப்பெறுமா என்பதைப் பொறுத்திருந்துதான் பார்க்க வேண்டும்.