மயிலாடுதுறையில் காற்றுடன் கனமழை: வேரோடு சாய்ந்த 50 ஆண்டு பழமையான மரம்.. ஸ்தம்பித்த போக்குவரத்து..
மயிலாடுதுறையில் காற்றுடன் பெய்த கனமழையால் 50 ஆண்டு பழமையான மரம் வேரோடு சாய்ந்து போக்குவரத்து பாதிப்பை ஏற்படுத்தியது.
மயிலாடுதுறை: மயிலாடுதுறை மாவட்டத்தில் கடந்த சில நாட்களாக பகல் நேரங்களில் கடுமையான வெயில் வாட்டி வதைத்து வருகிறது. வெயிலின் தாக்கம் அதிகமாக இருக்கும் அதே வேளையில், இரவில் அவ்வப்போது லேசான மழை பெய்து பொதுமக்களுக்கு சற்று ஆறுதல் அளித்து வந்தது. இந்நிலையில், வழக்கம் போல இன்றைய தினமும் காலை முதல் பகல் முழுதும் வெயிலின் வீச்சு மிகக் கடுமையாக நிலவியது. வெப்பத்தின் தாக்கத்தால் பொதுமக்கள் மற்றும் வாகன ஓட்டிகள் பெரும் சிரமத்திற்கு ஆளாகி வந்தனர். இருப்பினும், மாலை பொழுதில் வானிலை திடீரென மாற்றமடைந்து, நகரின் பல்வேறு இடங்களில் மேகமூட்டத்துடன் கூடிய மழை தொடங்கத் தொடங்கியது.
மாவட்டத்தின் பல்வேறு இடங்களில் கொட்டி தீர்த்த கன மழை
மாலையில் தொடங்கிய இந்த திடீர் மழை மயிலாடுதுறை நகரம் மட்டுமின்றி, மாவட்டத்தின் சுற்றுவட்டாரப் பகுதிகளான குத்தாலம், மங்கைநல்லூர், செம்பனார்கோவில், ஆக்கூர், திருக்கடையூர் மற்றும் தரங்கம்பாடி உள்ளிட்ட அனைத்து பிரதான இடங்களிலும் பரவலாகப் பெய்தது. குறிப்பாக, மயிலாடுதுறை நகரப் பகுதியில் பலத்த காற்றுடன் கூடிய கனமழை சுமார் அரை மணி நேரத்திற்கும் மேலாக நீடித்தது. இந்த திடீர் மழை காரணமாகச் வெப்பம் தணிந்து குளிர்ந்த சூழல் நிலவியபோதிலும், நகரின் முக்கிய தாழ்வான பகுதிகளில் மழைநீர் தேங்கத் தொடங்கியது.
வேரோடு சாய்ந்த பழமையான மரம்
அரை மணி நேரம் நீடித்த இந்த காற்றுடன் கூடிய மழைக்கு, மயிலாடுதுறையிலிருந்து கும்பகோணம் செல்லும் பிரதான சாலையில் அமைந்திருந்த தனியார் இடத்தின் ஓரத்தில் நின்றிருந்த சுமார் 50 ஆண்டுகள் பழமையான தூங்குமூஞ்சி மரம் தாக்குப் பிடிக்க முடியாமல் திடீரென வேரோடு சரிந்து விழுந்தது. ராட்சத மரத்தின் கிளைகள் மற்றும் அதன் பிரமாண்டமான உடல் பகுதி பிரதான சாலையை முற்றிலுமாக வீழ்ந்ததால், அப்பகுதியில் போக்குவரத்து முடங்கியது. கும்பகோணம் செல்லும் பிரதான வழித்தடம் என்பதால் சாலையில் இருபுறமும் வாகனங்கள் செல்ல முடியாமல் நீண்ட வரிசையில் அணிவகுத்து நின்றன.
முடுக்கப்பட்ட சீரமைப்புப் பணிகள்
சம்பவம் குறித்து தகவலறிந்த உடனடியாகப் மின்சாரத் துறையினர் மற்றும் தீயணைப்புத் துறையினர் விரைந்து சம்பவ இடத்திற்கு வந்தடைந்தனர். அசம்பாவிதங்கள் ஏதும் ஏற்படாமல் தடுக்கும் வகையில், முதற்கட்டமாக அப்பகுதிக்கான மின் இணைப்பு உடனடி நடவடிக்கையாகத் துண்டிக்கப்பட்டது. அதன்பின்னர், மின்சாரத் துறையினரும் மீட்புக் குழுவினரும் ஜேசிபி எந்திரங்களின் உதவியோடு சாலையில் விழுந்து கிடந்த மரத்தின் பெரிய கிளைகளை அப்புறப்படுத்தும் பணியில் தீவிரமாக ஈடுபட்டனர். மரத்தை வெட்டி அகற்றி, சாலையைச் சீரமைக்கும் பணிகள் போர்க்கால அடிப்படையில் செய்தனர்.
மாணவர்கள் மற்றும் பொதுமக்கள் அவதி
மழை பெய்த நேரம் பள்ளி மற்றும் கல்லூரிகள் முடியும் மாலை நேரமாக அமைந்ததால், வீட்டிற்குப் புறப்பட்ட மாணவ மாணவிகள் மற்றும் பணிகளை முடித்துத் திரும்பிய பொதுமக்கள் கடும் அவதிக்கு உள்ளாயினர். கும்பகோணம் சாலையில் ஏற்பட்ட கடுமையான போக்குவரத்து நெரிசல் காரணமாகக் பேருந்துகள் மற்றும் இருசக்கர வாகனங்கள் மாற்றுப் பாதைகளில் திருப்பி விடப்பட்டன. திடீரென பெய்த கனமழையும், அதனால் ஏற்பட்ட மர வீழ்ச்சியும் மயிலாடுதுறையில் சில மணி நேரம் பெரும் பரபரப்பையும் பொதுமக்களுக்குச் சிரமத்தையும் ஏற்படுத்தியது.
தலைப்பு செய்திகள்
ட்ரெண்டிங் செய்திகள்
