மீனவர் வலையில் சிக்கிய இளைஞர் உடல்! சீர்காழியில் பரபரப்பு...

மயிலாடுதுறை மாவட்டம் சீர்காழி அருகே துபாயில் இருந்து விடுமுறையில் வந்த இளைஞர், நண்பர்களுடன் சவுடு மண் குவாரி குளித்த போது நீரில் மூழ்கி உயிரிழந்த சம்பவம் பெரும் சேதத்தை ஏற்படுத்தியுள்ளது.

மணல் குவாரியில் மூழ்கி உயிரிழந்த இளைஞர்

Source : ABP

சீர்காழி: மயிலாடுதுறை மாவட்டம் சீர்காழி அருகே தோண்டப்பட்டுள்ள சவுடு மண் குவாரிகள் உயிர்ப்பலிகளை வாங்கும் அபாயகரமான இடங்களாக மாறி வருகின்றன. அந்த வகையில், சவுடு மண் குவாரியில் தேங்கியிருந்த நீரில் குளிக்கச் சென்ற இளைஞர் ஒருவர் நீரில் மூழ்கி உயிரிழந்த சம்பவம் அப்பகுதியில் பெரும் அதிர்ச்சியையும் சோகத்தையும் ஏற்படுத்தியுள்ளது.

விடுமுறையில் வந்த இளைஞருக்கு நேர்ந்த கதி

மயிலாடுதுறை மாவட்டம், சீர்காழி வட்டம் பாதரக்குடி கிராமத்தைச் சேர்ந்தவர் 28 வயதான பிரித்விராஜ். இவர் கடந்த சில ஆண்டுகளாக ஐக்கிய அரபு அமீரகத்தின் துபாய் நகரில் தனியார் நிறுவனத்தில் பணியாற்றி வந்தார். வெளிநாட்டில் கடினமாக உழைத்து வந்த பிரித்விராஜ், தனது குடும்பத்தினருடன் நேரத்தைச் செலவிடுவதற்காகக் கடந்த ஏழு மாதங்களுக்கு முன்பு விடுமுறையில் சொந்த ஊரான பாதரக்குடிக்குத் திரும்பியுள்ளார். மீண்டும் பணிக்குத் திரும்பத் தயாராகி வந்த நிலையில், அவரது வாழ்வில் விதி வேறு விதமாக விளையாடியுள்ளது.

நடந்தது என்ன?

பிரித்விராஜ் தனது நண்பர்களான முகமது, முரளி உள்ளிட்ட ஐந்து பேருடன் சேர்ந்து பொழுதைப் போக்குவதற்காகச் சீர்காழி அருகே உள்ள கேவரோடை பகுதிக்குச் சென்றுள்ளார். கோடை வெயிலின் தாக்கம் அதிகரித்து வருவதால், அப்பகுதியில் உள்ள பழைய சவுடு மண் குவாரி பள்ளத்தில் தேங்கியிருந்த குளிர்ந்த நீரில் குளிக்க அனைவரும் முடிவு செய்துள்ளனர்.

நண்பர்கள் அனைவரும் உற்சாகமாக நீரில் இறங்கிக் குளித்துக் கொண்டிருந்தனர். அப்போது, எதிர்பாராத விதமாகப் பிரித்விராஜ் கரையில் இருந்து சற்றுத் தொலைவில் இருந்த ஆழமான பகுதிக்குச் சென்றுள்ளார். குவாரிகளில் மண் எடுக்கப்பட்ட விதம் சீரற்றதாக இருக்கும் என்பதால், ஒரு சில அடி தூரத்திலேயே நிலப்பரப்பு திடீரென அதலபாதாளமாக மாறும் அபாயம் உண்டு. இதனை அறியாத பிரித்விராஜ், திடீரென சேற்றில் சிக்கி நீரில் மூழ்கத் தொடங்கினார்.

மீட்புப் பணி

பிரித்விராஜ் நீரில் மூழ்கி மாயமானதைக் கண்ட அவரது நண்பர்கள், அதிர்ச்சியில் உறைந்து போயினர். அவர்கள் உடனடியாக அவரை மீட்க முயன்றும் ஆழம் அதிகமாக இருந்ததால் அவர்களால் அவரை மீட்க முடியவில்லை. இதையடுத்து, அக்கம் பக்கத்தினர் மற்றும் புதுப்பட்டினம் காவல் நிலையத்திற்கும், தீயணைப்புத் துறையினருக்கும் தகவல் தெரிவித்துள்ளனர்.

தகவல் அறிந்ததும் சம்பவ இடத்திற்கு விரைந்து வந்த புதுப்பட்டினம் காவல்துறையினர் மற்றும் சீர்காழி தீயணைப்பு வீரர்கள் மீட்புப் பணியில் தீவிரமாக இறங்கினர். குவாரி பள்ளத்தில் அதிகப்படியான நீரும், அடியில் சகதியும் தேங்கியிருந்ததால் தீயணைப்பு வீரர்களால் உடலை எளிதில் கண்டுபிடிக்க முடியவில்லை. நீண்ட நேரத் தேடலுக்குப் பிறகும் பலன் கிடைக்காத நிலையில், உள்ளூர் மீனவர்களின் உதவி நாடப்பட்டது.

மீனவர் வலையில் சிக்கிய உடல்

மீனவர்கள் கொண்டு வந்த பெரிய வகை வலைகளைக் குவாரி நீரில் வீசி இழுக்கும் பணி மேற்கொள்ளப்பட்டது. சுமார் பல மணி நேரப் போராட்டத்திற்குப் பிறகு, பிரித்விராஜின் உடல் மீனவர்களின் வலையில் சிக்கியது. சடலமாக மீட்கப்பட்ட அவரது உடலைக் கண்டு அங்கிருந்த உறவினர்கள் மற்றும் நண்பர்கள் கதறி அழுதது நெஞ்சை உலுக்குவதாக இருந்தது.

காவல்துறையினர் உடலைக் கைப்பற்றி, பிரேதப் பரிசோதனைக்காகச் சீர்காழி அரசு மருத்துவமனைக்கு அனுப்பி வைத்தனர். இதுகுறித்து புதுப்பட்டினம் காவல்துறையினர் வழக்குப் பதிவு செய்து, அந்த இடத்தில் குவாரி நடத்த அனுமதி உள்ளதா? மற்றும் பாதுகாப்பு முன்னெச்சரிக்கை நடவடிக்கைகள் எடுக்கப்பட்டதா? என்பது குறித்து தீவிர விசாரணை மேற்கொண்டு வருகின்றனர்.

சோகத்தில் ஆழ்ந்த கிராமம் 

வெளிநாட்டில் இருந்து திரும்பி, மீண்டும் பணிக்குச் செல்லவிருந்த வாலிபர், நண்பர்களுடன் விளையாட்டாகக் குளிக்கச் சென்ற இடத்தில் உயிரிழந்த சம்பவம் பாதரக்குடி கிராமத்தையே சோகத்தில் ஆழ்த்தியுள்ளது. பாதுகாப்பற்ற முறையில் விடப்பட்டுள்ள குவாரி பள்ளங்கள் குறித்துப் பொதுமக்களிடையே அச்சம் எழுந்துள்ள நிலையில் மேலும் இதுபோன்ற சம்பவங்கள் நடைபெறாமல் இருக்க அரசு உடனடியாக நடவடிக்கை எடுக்க வேண்டும் என சமூக ஆர்வலர்கள் கோரிக்கை விடுத்துள்ளனர்.