"வாக்குக் கேட்க வராதீர்கள்!" 20 ஆண்டுகளாக அடிப்படை வசதியின்றி தவிக்கும் மக்கள்! 2026 தேர்தலில் புறக்கணிப்பு முடிவு!

மயிலாடுதுறை நகராட்சியில் 35-வது வார்டில் 20 ஆண்டுகளாக சாலை, மின்சார வசதி உள்ளிட்ட அடிப்படை வசதிகள் செய்து தராததால் வரும் 2026 சட்டமன்றத் தேர்தலை புறக்கணிக்க அப்பகுதி மக்கள் முடிவு செய்துள்ளனர்.

தேர்தல் புறக்கணிப்பு செய்ய முடிவெடுத்த பொதுமக்கள்

Source : ABP

மயிலாடுதுறை: மயிலாடுதுறை நகராட்சிக்கு உட்பட்ட 35-வது வார்டில் உள்ள புது வெள்ளாளன் தெருவாசிகள், இரண்டு தசாப்தங்களாகத் தங்களுக்கு இழைக்கப்படும் அநீதியைக் கண்டித்து, வரும் 2026 சட்டமன்றத் தேர்தலை முற்றிலுமாகப் புறக்கணிக்கப் போவதாக அறிவித்துள்ளனர். அதிகாரிகளின் அலட்சியத்தால் தங்கள் வாழ்வாதாரம் பாதிக்கப்பட்டுள்ளதாகக் கூறி, இப்பகுதி மக்கள் எடுத்துள்ள இந்த அதிரடி முடிவு மாவட்ட நிர்வாகத்திடையே பரபரப்பை ஏற்படுத்தியுள்ளது.

இருபது கால இருண்ட வாழ்க்கை

மயிலாடுதுறை நகராட்சியின் முக்கியப் பகுதிகளில் ஒன்றாகத் திகழும் 35-வது வார்டில் அமைந்துள்ள புது வெள்ளாளன் தெருவில் ஏராளமான குடும்பத்தினர் வசித்து வருகின்றனர். நகரின் மையப்பகுதியை ஒட்டியிருந்தாலும், கடந்த 20 ஆண்டுகளுக்கும் மேலாக இப்பகுதி அடிப்படை வசதிகளான சாலை மற்றும் மின்சார வசதிகள் இன்றி ஒரு தீவு போலவே காட்சியளிக்கிறது.

"நாங்கள் வரி செலுத்தும் குடிமக்களாக இருந்தும், எங்களுக்குரிய அடிப்படை உரிமைகள் மறுக்கப்படுகின்றன. 20 ஆண்டுகளாகியும் ஒரு முறையான தார்ச் சாலையோ அல்லது தெருவிளக்கு வசதியோ இங்கு செய்யப்படவில்லை" என அப்பகுதி மக்கள் வேதனையுடன் தெரிவிக்கின்றனர்.

மழைக்காலத் துயரமும் விஷ ஜந்துக்களின் அச்சுறுத்தலும்

இப்பகுதியில் சாலை வசதி இல்லாததால், லேசான மழை பெய்தாலே தெரு முழுவதும் குளம் போல் தண்ணீர் தேங்கி நிற்கிறது. இதனால் வீடுகளை விட்டு வெளியே வர முடியாமலும், அத்தியாவசியத் தேவைகளுக்காகச் சேற்றில் தவித்தபடி நடக்க வேண்டிய கட்டாயத்திலும் மக்கள் உள்ளனர். மிக முக்கியமாக, தேங்கியுள்ள தண்ணீரில் பாம்பு, தேள், பூரான் போன்ற விஷ ஜந்துக்கள் அடிக்கடி புகுந்து விடுவதாகவும் வேதனை.

இது குறித்து அப்பகுதித் மக்கள் கூறுகையில்:

"எங்கள் குழந்தைகள் விளையாடக் கூட அச்சப்படுகிறார்கள். இரவு நேரங்களில் தெருவிளக்கு இல்லாததால் இருட்டில் விஷ ஜந்துக்கள் நடமாட்டம் தெரிகிறது. எப்போது யாரைக் கடிக்கப்போகிறதோ என்ற பயத்திலேயே ஒவ்வொரு நிமிடத்தையும் கழிக்கிறோம். இது மட்டுமின்றி, தேங்கி நிற்கும் கழிவுநீரால் கொசுக்கள் உற்பத்தியாகி, டெங்கு, மலேரியா போன்ற நோய் தொற்று பரவும் அபாயமும் உள்ளது" என கண்ணீர் மல்கத் தெரிவித்தனர்.

பலனளிக்காத மனுக்களும் அதிகாரிகளின் மெத்தனமும்

இது தொடர்பாக கடந்த பல ஆண்டுகளாக மயிலாடுதுறை நகராட்சி ஆணையர், மாவட்ட ஆட்சியர் மற்றும் மக்கள் பிரதிநிதிகளிடம் நூற்றுக்கணக்கான மனுக்களை மக்கள் அளித்துள்ளனர். ஒவ்வொரு முறையும் "விரைவில் நடவடிக்கை எடுக்கப்படும்" என்ற உறுதிமொழி மட்டுமே வழங்கப்பட்டதே தவிர, களத்தில் எந்த மாற்றமும் நிகழவில்லை. அதிகாரிகளின் இந்தத் தொடர் மெத்தனப் போக்கினால் மக்கள் கடும் அதிருப்தி அடைந்துள்ளனர்.

"வாக்களிக்க மாட்டோம்" 

அரசியல் கட்சிகள் தேர்தல் நேரங்களில் மட்டும் வாக்குக் கேட்டு வருவதாகவும், வெற்றி பெற்ற பின் இந்தப் பக்கம் திரும்பிப் பார்ப்பதில்லை என்றும் மக்கள் குற்றம் சாட்டுகின்றனர். இதன் உச்சகட்டமாக, வரும் 2026 சட்டமன்றத் தேர்தலை முற்றிலுமாகப் புறக்கணிக்கப் போவதாக இப்பகுதி மக்கள் ஒருமனதாகத் தீர்மானம் நிறைவேற்றியுள்ளனர்.

இது குறித்து அப்பகுதியினர் கூறுகையில்;

 * எங்கள் பகுதிக்கு எந்த அடிப்படை வசதியும் செய்து தராத அரசிற்கு நாங்கள் ஏன் வாக்களிக்க வேண்டும்?

 * இந்த முறை வெறும் மனுக்கள் கொடுப்பதோடு நிறுத்தப்போவதில்லை; தேர்தலைப் புறக்கணிப்பதன் மூலம் எங்கள் எதிர்ப்பைப் பதிவு செய்வோம்.

 * வாக்குச் சேகரிக்க எந்த அரசியல் கட்சியினரும் எங்கள் தெருவிற்குள் நுழைய வேண்டாம் எனப் பதாகைகளை வைக்கத் திட்டமிட்டுள்ளோம்.

மயிலாடுதுறை நகரின் ஒரு பகுதியில் மக்கள் இத்தனை ஆண்டுகளாகப் போராட்டமான வாழ்க்கையை வாழ்ந்து வருவதும், அதன் வெளிப்பாடாகத் தேர்தலைப் புறக்கணிக்க முடிவெடுத்திருப்பதும் மாவட்ட நிர்வாகத்திற்கு விடுக்கப்பட்டுள்ள எச்சரிக்கையாகவே பார்க்கப்படுகிறது.