சிவகங்கை சிறையில் கைதி தற்கொலை - உள்துறை கூடுதல் செயலர் பதில் தர உத்தரவு
’’எனது கணவர் தாழ்த்தப்பட்ட வகுப்பைச் சேர்ந்தவர் என்பதற்காக சிவகங்கை சிறையில் கடினமான வேலைகள் கொடுத்து சித்திரவதை செய்துள்ளனர்’’
தூத்துக்குடி மாவட்டம், கோவில்பட்டி பகுதியை சேர்ந்த லங்கேஸ்வரி உயர்நீதிமன்ற மதுரைக்கிளையில் மனுவினை தாக்கல் செய்திருந்தார். அதில், "எனது கணவர் கருப்பசாமி (52) 2007ஆம் ஆண்டு பெருமாள் என்பவரை கொலை செய்த வழக்கில் 2008 ஆம் ஆண்டு எனது கணவருக்கு ஆயுள் தண்டனை வழங்கப்பட்டது இதனையடுத்து அவர் மதுரை மத்திய சிறையில் அடைக்கப்பட்டார். 2018ஆம் ஆண்டு சிவகங்கை திறந்த வெளி சிறைக்கு மாற்றப்பட்டார். எனது கணவர் மீது இந்த கொலை குற்றத்தை தவிர வேறு எந்த வழக்கும் இல்லை. மேலும் சிறையில் இருந்த 15 வருடங்களில் எந்த ஒரு குற்றச் செயலிலும் அவர் ஈடுபட்டது இல்லை. எனது கணவர் தாழ்த்தப்பட்ட வகுப்பைச் சேர்ந்தவர் என்பதற்காக சிவகங்கை திறந்தவெளி சிறையில் பல்வேறு கடினமான வேலைகள் கொடுத்துள்ளனர். சிறையில் வைத்து சித்திரவதை செய்துள்ளனர். மேலும் சிறையில் வேலை பார்த்ததற்கான சரியான கூலியும் வழங்காமல் இருந்துள்ளனர்.
இதனால் பல முறை சிவகங்கை திறந்தவெளி சிறையில் இருந்து மதுரை மத்திய சிறைக்கு மாற்றக் கோரி மனு செய்துள்ளார். இந்தநிலையில் 2022 மார்ச் 22ஆம் தேதி எனது கணவர் கருப்பசாமி உடல்நலக்குறைவால் சிவகங்கை அரசு மருத்துவமனையில் அனுமதிக்கப்பட்டுள்ளதாக தெரிவிக்கப்பட்டுள்ளது. அன்று மாலை எனது கணவர் இறந்துவிட்டார். சிவகங்கை திறந்தவெளி சிறையின் காவலர்கள் எனது கணவர் விடுப்பு வழங்கவில்லை என்றால் தற்கொலை செய்து கொள்வதாக மரத்தில் ஏறியதாகவும் அங்கு எதிர்பாராத விதமாக மின்சாரம் தாக்கி மரத்திலேயே தொங்கியதாகவும் தெரிவித்தனர். எனது கணவர் மரணம் குறித்து வழக்கு பதிவு செய்யப்பட்டுள்ளது. ஆனால், எனது கணவர் இறந்த இடத்தின் வீடியோ காட்சிகள், பிரேத பரிசோதனை அறிக்கை மற்றும் வீடியோ எங்களுக்கு வழங்கவில்லை.
எனவே, எனது கணவர் இறந்த இடத்தின் வீடியோ காட்சிகள், பிரேத பரிசோதனை அறிக்கை மற்றும் வீடியோ எங்களுக்கு வழங்கவும், இழப்பீடு வழங்கவும், சம்பந்தப்பட்ட அதிகாரிகள் மீது நடவடிக்கை எடுக்கவும் உத்தரவிட வேண்டும்." என மனுவில் கூறியிருந்தார். இந்த மனு நீதிபதி இளந்திரையன் முன்பு விசாரணைக்கு வந்தது.அப்போது நீதிபதி, 2 வாரத்திற்குள் பிரேத பரிசோதனை வீடியோ மற்றும் அறிக்கையை மனுதாரருக்கு வழங்கவும்,வழக்கு குறித்து உள்துறை கூடுதல் செயலர், தமிழக காவல்துறை தலைவர் ஆகியோர் பதிலளிக்க உத்தரவிட்டு வழக்கு விசாரணையை ஜீன் 5ஆம் தேதிக்கு ஒத்தி வைத்தார்.
தலைப்பு செய்திகள்
ட்ரெண்டிங் செய்திகள்
