Rooster fair : ”கிளி மூக்கு, கட்ட மூக்கு, கடி மூக்கு” கண்களை கவர்ந்த சேவல் கண்காட்சி..!

உலக அளவிலான கிளி மூக்கு விசிறிவால் சேவல் கண்காட்சியில் கண்ணைக் கவரும் 300க்கும் மேற்பட்ட சேவல்கள் பங்கேற்பு 

சேவல் கண்காட்சி

Source : ABPLIVE AI

வீடுகளில் வளர்க்கப்படும் விலங்குகள் எப்போதுமே மனித வாழ்வியலில் கலந்ததாகவே உள்ளது. ஆடுகள், மாடுகள், கோழிகள், பறவைகள், பூனைகள், குதிரைகள், நாய்கள் உட்பட பல்வேறு விலங்கினங்கள் வீடுகளில் செல்லப்பிராணிகளாக வளர்க்கப்பட்டு வருகிறது. வீட்டின் செல்லப்பிராணிகளாக வளர்க்கப்படும் விலங்குகளைக்கொண்டு நடைபெறும் போட்டிகளாக குறிப்பாக தென் மாவட்டங்களில் நடைபெறும் சேவல் சண்டை , , ஜல்லிக்கட்டு போட்டி, மாட்டு வண்டி பந்தையம், குதிரை பந்தையம், நாய்களுக்காக நடைபெறும் அழகு போட்டி , விலங்குகளின் திறமைக்கான போட்டிகள் என நடைபெற்று வருகிறது.

அதுமட்டுமல்லாமல் அழிந்து வரும் விலங்குகளை காப்பாற்றும் வகையில் பல்வேறு பகுதிகளில் வளர்ந்து வரும் அழிவின் விழிம்பு நிலையில் உள்ள பறவை வகைகள், விலங்கு வகைகளுக்கான பாதுகாப்பு  நடவடிக்கைகளில் பல்வேறு தரப்பினர் தீவிரமாக செயல்பட்டும் வருகின்றனர்.

அந்த வகையில் தான் திண்டுக்கல் மாவட்டத்தில் உள்ள ஒரு தனியார் தோட்டத்தில் அனைத்து இந்திய சேவல் வளர்ப்பு நண்பர்கள் சங்கம் சார்பில் பத்தாம் ஆண்டு உலக அளவிலான மாபெரும் கிளிமூக்கு விசிறிவால் சேவல் கண்காட்சி ஒருங்கிணைப்பாளர் நெல்சன் தலைமையில் நடைபெற்றது. கண்காட்சியில் தமிழ்நாடு ,கேரளா, கர்நாடகா, ஆந்திர பிரதேஷ், பாண்டிச்சேரி உள்ளிட்ட பல்வேறு மாநிலங்களில் இருந்து 300-க்கும் மேற்பட்ட சேவல்கள் கண்காட்சியில் பங்கேற்றன.

கிளி மூக்கு, கட்ட மூக்கு, கடி மூக்கு, கழுகு மூக்கு, மயில் நூலா, விசிறிவால், நீள வால் போன்ற வகையில் சேர்ந்த சேவல்கள் பங்கேற்றன. சேவலில் தரம் , மூக்கு ,உடல் அமைப்பு, கொண்டை ,உடல் பருமன், உயரம், வால் நீளம், சேவலின் நடை ஆகியவற்றின் அடிப்படையில் பரிசுகள் வழங்கப்பட்டன.

முதல் பரிசாக 10 சேவல்களுக்கு பெரிய ஏர்கூலர்கள், இரண்டாம் பரிசாக சிறிய அளவிலான ஏர்கூலர்கள், 70 சேவல்களுக்கு பெடஸ்டல் பேன்கள்  வழங்கப்பட்டன. கண்காட்சியில் 300-க்கும் மேற்பட்ட சேவல்களை சேவல் வளர்ப்பு உரிமையாளர்கள் கொண்டு வந்திருந்தனர். ரூபாய் 20 ஆயிரத்தில் இருந்து இரண்டரை லட்சம் வரை மதிப்பிலான சேவல்கள் இடம் பிடித்திருந்தன. அனைத்திந்திய சேவல் வளர்ப்பு நண்பர்கள் செயலாளர் பிரபாத், பொருளாளர் உஸ்மான் உள்ளிட்ட நிர்வாகிகள் கண்காட்சிக்கான ஏற்பாடுகளை செய்திருந்தனர்.

இந்த கண்காட்சி குறித்து ஒருங்கிணைப்பாளர்கள் கூறுகையில், இந்த சேவல்கள் அழகுக்காக மட்டுமே வளர்க்கப்படுகின்றது. அழிந்து வரும் இந்த வகையான சேவல்களின் வளர்ப்பை அதிகப்படுத்தும் நோக்கில் இந்த கண்காட்சியை தொடர்ந்து நடத்தி வருகிறோம். இந்த சேவல்களுக்கு கம்பு, கேப்பை, வெள்ளை சோளம், இரும்பு சோளம் ஆகிய தானியங்கள் உணவாக வழங்கி வருகிறோம். மேலும் கால்நடை மருத்துவர் ஆலோசனைப்படி தடுப்பூசி மற்றும் மருந்துகள் சேவல்களுக்கு கொடுத்து வருகிறோம் என தெரிவித்தனர்.

ஆடுகளம் திரைப்படத்தில் நடைபெறும் சேவல் சண்டைகளை பார்த்த பின்னர் சேவல் கண்காண்ட்சிகளுக்கான மவுசும் அதிகரித்து வந்ததோடு, வீட்டில் இளைஞர்கள் காளை மாடுகளை வளர்ப்பதுபோல சேவல்களையும் வாங்கிக் வளர்க்கத் தொடங்கியுள்ளனர்.