திண்டுக்கல்: பழிக்குப்பழியாக நடந்த கொலை சம்பவம்: 8 பேருக்கு ஆயுள் தண்டனை விதிப்பு
பழிக்குப்பழியாக நடந்த இந்த கொலை சம்பவத்தில் 8 பேருக்கு ஆயுள் தண்டனை விதித்து திண்டுக்கல் கூடுதல் மாவட்ட நீதிமன்றம் பரபரப்பு தீர்ப்பளித்துள்ளது.
திண்டுக்கல் முத்தழகுப்பட்டியை சேர்ந்தவர் செபஸ்தியார் (46). சுமை தூக்கும் கூலி தொழிலாளியாக இருந்து வந்துள்ளார். அதே பகுதியை சேர்ந்த மற்றொரு சுமை தூக்கும் கூலி தொழிலாளி பிரகாஷ். கடந்த 2006-ம் ஆண்டு சுமை தூக்குவதில் இருவருக்குமிடையே இடையே தகராறு ஏற்பட்டுள்ளது. இதில் பிரகாஷ் கொலை செய்யப்பட்டார். இந்த வழக்கில் செபஸ்தியார் கைது செய்யப்பட்டு நீதிமன்றத்தில் ஆஜர்படுத்தப்பட்டார்.
அவருக்கு ஆயுள்தண்டனை விதித்து திண்டுக்கல் கோர்ட்டு தீர்ப்பளித்தது. பின்னர் ஐகோர்ட்டில் மேல்முறையீடு செய்து 2012-ம் ஆண்டு செபஸ்தியார் விடுதலையானார். ஆனால் பிரகாஷ் தரப்பினர் தன்னை கொலை செய்துவிடுவார்களோ? என அஞ்சிய அவர் மதுரைக்கு சென்று தலைமறைவாக இருந்தார். அவ்வப்போது முத்தழகுப்பட்டிக்கு வந்து தனது குடும்பத்தினரை பார்த்து சென்றுள்ளார்.
இந்தநிலையில் கடந்த 2014-ம் ஆண்டு மே மாதம் 5-ந் தேதி தனது மகளின் திருமண ஏற்பாடுகளை செய்வதற்காக முத்தழகுப்பட்டிக்கு வந்த அவரை சந்தியாகப்பர் கோவில் பின்புறம் வழிமறித்து 10 பேர் கொண்ட மர்ம கும்பல் அரிவாளால் வெட்டி சாய்த்தது. இதுகுறித்து திண்டுக்கல் தெற்கு போலீசார் வழக்குப்பதிவு செய்து முத்தழகுப்பட்டியை சேர்ந்த அந்தோணி விமல்ராஜ் (33), சின்னப்பன்ராஜ் (37), அருள் ஆரோக்கியதாஸ் (40), தங்கம் (62), ஜஸ்டின்தாஸ் (28), ஜான்சன் பிரபாகரன் (30), அனுமந்தராயன்கோட்டையை சேர்ந்த தாமரைக்கண்ணன் (29), விக்னேஷ் இன்பராஜ் (39) உள்பட 10 பேரை கைது செய்தனர்.
மேலும், அவர்கள் மீது திண்டுக்கல் கூடுதல் மாவட்ட நீதிமன்றத்தில் வழக்கும் தொடர்ந்தனர். பல்வேறு கட்டங்களாக இந்த வழக்கு விசாரணை நடந்து வந்தது. அரசு தரப்பில் வழக்கறிஞர் சூசை ராபர்ட் வாதாடினார். எதிர்தரப்பினர் சார்பில் வழக்கறிஞர் அசோகன், செல்வராஜ் உள்பட 5 பேர் வழக்கை நடத்தினர். 8 ஆண்டுகளாக நடந்து வந்த இந்த வழக்கில் நேற்று தீர்ப்பு கூறப்பட்டது.
Sunny Leone: பண மோசடி வழக்கு...கேரள உயர்நீதிமன்றத்தை நாடிய சன்னி லியோன்.. முழு விவரமும் இங்கே..
அதில் குற்றம் சாட்டப்பட்ட அந்தோணி விமல்ராஜ் உள்பட 8 பேருக்கு ஆயுள் தண்டனை, தலா ரூ.10 ஆயிரம் அபராதமாக விதித்து நீதிபதி சரவணன் உத்தரவிட்டார். மேலும் இந்த வழக்கில் கைதான சின்னக்காளை (60), குழந்தை தெரசு (65) ஆகியோர் மீது சுமத்தப்பட்ட குற்றச்சாட்டுக்கு தகுந்த ஆதாரம் இல்லாததால் 2 பேரையும் நீதிமன்றம் விடுதலை செய்தது. குழந்தை தெரசுவின் கணவர் தான், 2006-ம் ஆண்டு கொலை செய்யப்பட்ட பிரகாஷ் என்பது குறிப்பிடத்தக்கது. எனவே பழிக்குப்பழியாக நடந்த இந்த கொலை சம்பவத்தில் 8 பேருக்கு ஆயுள் தண்டனை விதித்து திண்டுக்கல் கூடுதல் மாவட்ட நீதிமன்றம் பரபரப்பு தீர்ப்பளித்துள்ளது.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
