Karnataka CM Swearing-In Ceremony LIVE: கர்நாடக முதலமைச்சராக பதவியேற்றார் சித்தராமையா

Karnataka CM Swearing-In Ceremony LIVE Updates: கர்நாடக முதலமைச்சராக சித்தராமையா பதவியேற்கும் நிகழ்ச்சியின் தகவல்களை உடனுக்குடன் ஏபிபி நாடு லைவ் ப்ளாக் மூலம் அறிந்து கொள்ளலாம்.

Background

நாடு முழுவதும் பெரிதும் எதிர்பார்க்கப்பட்ட கர்நாடக மாநில தேர்தல் நடந்து முடிந்து முடிவுகள் கடந்த 13ஆம் தேதி வெளியாகியது. காங்கிரஸ் கட்சி பெரிய வெற்றியை பதிவு செய்தது. இதில், 224 சட்டமன்ற தொகுதிகளில், காங்கிரஸ் 135, பாஜக 66, மதசார்பற்ற ஜனதா தளம் 19, மற்றவை 4 தொகுதகளில் வெற்றி பெற்றது.

முதலமைச்சரை தேர்வு செய்வதில் இழுபறி:

காங்கிரஸ், தனிப்பெரும்பான்மை பெற்றாலும், அடுத்த முதலமைச்சரை தேர்வு செய்வதில் தொடர் இழுபறி நீடித்தது. கர்நாடக காங்கிரஸ் தலைவர் சிவக்குமார் மற்றும் முன்னாள் முதலமைச்சர் சித்தராமையா ஆகியோர் இடையே முதலமைச்சர் பதவிக்கு கடும்போட்டி நிலவி வந்தது.

இப்படி இருக்கும் நிலையில், நேற்று முன்தினம் காங்கிரஸ் தலைவர் மல்லிகார்ஜுன கார்கேவை சித்தராமையா மற்றும் சிவக்குமார் தனித்தனியாக சந்தித்து பேசினர். இதனை அடுத்து, நேற்று ராகுல் காந்தியையும் இருவரும் தனித்தனியாக சந்தித்து முதல்வர் பதவி பற்றி பேசியிருந்தனர்.

கட்சியின் பெரும்பாலான எம்எல்ஏக்களின் ஆதரவு, சித்தராமையாவுக்கு இருந்தது. இருப்பினும், காங்கிரஸ் கட்சியின் வெற்றியில் முக்கிய பங்காற்றிய டி.கே.சிவக்குமார் தனக்கு முதலமைச்சர் பதவி வழங்க வேண்டும் என்று வேண்டுகோள் விடுத்ததாக கூறப்படுகிறது. நீண்ட பேச்சுவார்த்தைக்கு பிறகும் முடிவுக்கு வராத பிரச்னைக்கு முற்றுப்புள்ளி வைக்க களத்தில் இறங்கினார் காங்கிரஸ் முன்னாள் தலைவர் சோனியா காந்தி.

காங்கிரஸ் ஃபார்முலா:

இதற்கு பிறகு, முதலமைச்சர் பதவி சித்தராமையாவுக்கு வழங்க முடிவு செய்யப்பட்டது. துணை முதலமைச்சர் பதவியை ஏற்க டி.கே.சிவக்குமார் ஒப்பு கொண்டார். இருப்பினும், முதல் இரண்டு ஆண்டுகள் மட்டும் சித்தராமையா, முதலமைச்சராக தொடர்வார் என்றும் அதன் பிறகு, முதலமைச்சர் பதவி சிவக்குமாருக்கு அளிக்க முடிவு செய்யப்பட்டதாகவும் கூறப்படுகிறது.

ஒரு வழியாக முதலமைச்சர் பதவிக்கான போட்டி முடிவுக்கு வந்த நிலையில், காங்கிரஸ் சட்டப்பேரவை உறுப்பினர்கள் கூட்டம் நடைபெற்றது. அதில், சித்தராமையா, காங்கிரஸ் சட்டப்பேரவை குழு தலைவராக முறைப்படி தேர்வு செய்யப்பட்டார். இதையடுத்து, கர்நாடக ஆளுநர் தாவர் சந்த் கெலாட்டை சந்தித்து ஆட்சி அமைக்க உரிமை கோரினார் சித்தராமையா.

முதலமைச்சர் பதவியேற்பு விழா:

இந்தநிலையில், இன்று பெங்களூருவில் நடைபெறும் பதவியேற்பு விழாவில் முதலமைச்சராக சித்தராமையா, துணை முதலமைச்சராக சிவக்குமாரும் பதவியேற்கின்றனர். மதியம் 12:30 மணிக்கு நடைபெறும் பதவியேற்பு விழாவில் நாட்டின் முக்கிய எதிர்க்கட்சி தலைவர்கள் கலந்து கொள்கின்றனர்.

13:55 PM (IST)  •  20 May 2023

Karnataka CM Swearing-In Ceremony LIVE: விழாவில் பங்கேற்றவர்களுக்கு ராகுல் நன்றி

பதவியேற்பு விழாவில் பங்கேற்ற தலைவர்கள், காங்கிரஸ் தொண்டர்கள் மற்றும் பொதுமக்களுக்கு ராகுல் காந்தி நன்றி தெரிவித்துள்ளார்.

13:54 PM (IST)  •  20 May 2023

Karnataka CM Swearing-In Ceremony LIVE: 5 வாக்குறுதிகள் இன்றே நிறைவேற்றப்படும் - சித்தராமையா

காங்கிரஸ் அளித்த 5 முக்கிய வாக்குறுதிகள் இன்றே நிறைவேற்றப்படும் என்று கர்நாடக முதலமைச்சர் சித்தராமையா தெரிவித்தார்.