Rinku Singh: அரசியல்வாதியை கரம் பிடிக்கிறார் கிரிக்கெட் வீரர் ரிங்கு சிங்.. அட யாருப்பா அது?

கிரிக்கெட்டில் அதிரடி ஆட்டத்துக்கு பேர் போன ரிங்கு சிங், சமாஜ்வாதி கட்சி எம்.பி. பிரியா சரோஜை திருமணம் செய்ய உள்ளதாக தகவல்கள் வெளியாகியுள்ளன.

ரிங்கு சிங் - பிரியா சரோஜ்

Source : Twitter

இந்திய கிரிக்கெட் வீரர் ரிங்கு சிங், சமாஜ்வாதி கட்சி எம்.பி. பிரியா சரோஜை திருமணம் செய்ய உள்ளதாக தகவல்கள் வெளியாகியுள்ளன. கடந்தாண்டு நடந்த மக்களவை தேர்தலில் வென்று, இளம் வயதில் மக்களவைக்கு தேர்வான பிரியா சரோஜ், கிரிக்கெட்டில் அதிரடி ஆட்டத்துக்கு பேர் போன ரிங்கு சிங் ஆகிய இருவருமே உத்தரப் பிரதேசத்தை சேர்ந்தவர்கள். இவர்களின் திருமணம் குறித்து இன்னும் அதிகாரப்பூர்வ தகவல் வெளியாகவில்லை.

கிரிக்கெட் உலகின் தலைசிறந்த ஃபினிஷராக திகழ்பவர் தோனி. தோனியின் ஓய்வுக்கு பிறகு இந்திய அணிக்கு அப்படியொரு பினிஷர் இதுவரை கிடைக்கவில்லை என்ற ஏக்கம் இருந்து வந்தது. அந்த ஏக்கத்தை தீர்த்து வைத்தவர் ரிங்கு சிங்.

ரிங்கு சிங்குக்கு விரைவில் திருமணம்?

நெருக்கடியான நேரத்தில் கடைசி ஓவரில் 5 சிக்ஸர்கள் தேவை என்ற நிலையில் 5 சிக்ஸர்களை அடுத்தடுத்து விளாசி ஒட்டுமொத்த கிரிக்கெட் ரசிகர்களையும் திரும்பி பார்க்க வைத்தவர். கடந்த 2018 ஆம் ஆண்டு, ஐபிஎல் போட்டிகளில் அறிமுகமான ரிங்கு சிங், தற்போது கொல்கத்தா அணிக்காக விளையாடிவருகிறார்.

இவரின் ஆட்டத்தை பார்த்து, முன்னாள் கிரிக்கெட் வீரர்கள் தொடங்கி பல்வேறு தரப்பினர், இவரை பாராட்டி வருகின்றனர். கடந்தாண்டு நடந்த டி20 உலகக் கோப்பை போட்டியில் கூட இந்திய அணியின் மாற்று வீரராக இருந்தார்.

இந்த நிலையில், நாட்டின் இளம் பெண் எம்.பி.க்களில் ஒருவரான பிரியா சரோஜை, ரிங்கு சிங் திருமணம் செய்து கொள்ள உள்ளதாக தகவல்கள் வெளியாகியுள்ளன. சமீபத்தில், இவர்களுக்கு நிச்சயதார்த்தம் நடந்ததாகக் கூறப்படுகிறது. ஆனால், திருமண தேதி இன்னும் முடிவாகவில்லை.

யார் இந்த பிரியா சரோஜ்?

மச்சாலி ஷஹர் தொகுதி எம்.பி.யான பிரியா சரோஜ், சமாஜ்வாதி கட்சியை சேர்ந்தவர். மூன்று முறை எம்.பி.யாகவும், தற்போது எம்.எல்.ஏ.வாகவும் உள்ள துபானி சரோஜின் மகள்தான் பிரியா சரோஜ். அரசியலுக்கு வருவதற்கு முன், வழக்கறிஞராக இருந்துள்ளார்.

கடந்த 2024ஆம் ஆண்டு, முதல்முறையாக மக்களவைத் தேர்தலில் போட்டியிட்ட பிரியா சரோஜ், பாஜக வேட்பாளர் பி.பி. சரோஜை 35,850 வாக்குகள் வித்தியாசத்தில் தோற்கடித்து, நாடாளுமன்ற உறுப்பினரானார். மக்களவைக்கு தேர்ந்தெடுக்கப்பட்ட இரண்டாவது இளம் எம்பி என்ற பெருமையும் இவரையே சாரும். டெல்லி பல்கலைக்கழகத்தில் BA பட்டமும், நொய்டாவில் உள்ள அமிட்டி பல்கலைக்கழகத்தில் LLB பட்டமும் பெற்றுள்ளார்.