Congress President Elections: காங்கிரஸ் தலைவர் தேர்தல்...போட்டியிலிருந்து விலகிய கெலாட்...மூன்றாவது நபரை களமிறக்குகிறதா தலைமை?

காங்கிரஸ் தலைவர் தேர்தல் போட்டியிலிருந்து விலகியுள்ளதாக ராஜஸ்தான் முதலமைச்சரும் அக்கட்சியின் மூத்த தலைவருமான அசோக் கெலாட் தெரிவித்துள்ளார்.

கோப்புப்படம்

காங்கிரஸ் தலைவர் தேர்தல் போட்டியிலிருந்து விலகியுள்ளதாக ராஜஸ்தான் முதலமைச்சரும் அக்கட்சியின் மூத்த தலைவருமான அசோக் கெலாட் தெரிவித்துள்ளார்.

கெலாட்டுக்கு ஆதரவான எம்எல்ஏக்கள், ராஜஸ்தானில் தலைமைக்கு எதிரான நிலைபாட்டை எடுத்த நிலையில், அதற்கு தார்மீக பொறுப்பை ஏற்று இந்த முடிவை எடுத்துள்ளதாகவும் ராஜஸ்தானில் ஏற்பட்ட நெருக்கடிக்காக சோனியா காந்தியிடம் மன்னிப்பு கோரியுள்ளதாகவும் தெளிவுப்படுத்தியுள்ளார். டெல்லியில் சோனியை காந்தியை சந்தித்ததை அடுத்து, கெலாட் செய்தியாளர்களிடம் இந்த தகவலை பகிர்ந்துள்ளார்.

மேலும் பேசிய அவர், "அவர் முதலமைச்சராக நீடிப்பாரா என்பதை சோனியா காந்தி தான் முடிவு செய்ய வேண்டும்" எனக் குறிப்பிட்டுள்ளார். மன்னிப்பு கோரியதன் மூலம் முதலமைச்சர் பதவியை அசோக் கெலாட் தற்போதைக்கு தக்க வைத்துள்ளார். காங்கிரஸ் கட்சியின் தலைவர் பதவிக்கு அசோக் கெலாட் போட்டியிடுவதாக இருந்தது. ஆனால், ஒருவருக்கு ஒரு பதவி என்ற விதியின் காரணமாக முதலமைச்சர் பதவியை அவர் ராஜினாமா செய்ய வேண்டிய சூழலுக்கு தள்ளப்பட்டார். 

ராகுல் காந்தியின் வலியுறுத்தல்படி, காங்கிரஸ் தலைவராக தேர்வு செய்யப்படுவதற்கு முன்பு, முதலமைச்சர் பதவியை ராஜினாமா செய்ய கெலாட் ஒப்புகொண்டதாகக் கூறப்படுகிறது.

இதனால், அடுத்த முதலமைச்சர் யார் என்ற கேள்வி தொடர் இழுபறியை ஏற்படுத்தியது. இதற்கு மத்தியில், காங்கிரஸ் கட்சியின் மூத்த தலைவர்களான மல்லிகார்ஜுன கார்கே, அஜய் மக்கான் தலைமையில் ராஜஸ்தானில் எம்எல்ஏக்கள் கூட்டம் நடைபெறவிருந்தது. அதிகார மாற்றம் குறித்த அறிவிப்பு கெலாட் வீட்டில் ஞாயிற்றுக்கிழமை அன்று அறிவிக்கப்படவிருந்தது.

ஆனால், கெலாட் ஆதரவாளர்கள், அக்கூட்டத்திற்கு செல்லவில்லை. 20 முதல் 25 எம்எல்ஏக்கள் மட்டுமே கெலாட்டின் வீட்டிற்கு சென்றனர். பெரும்பாலான காங்கிரஸ் எம்எல்ஏக்கள் கெலாட்டுக்கு நெருக்கமான அமைச்சரான சாந்தி தாரிவாலின் வீட்டில் நடந்த வேறொரு கூட்டத்தில் கலந்து கொண்டனர். அந்த கூட்டத்திற்குப் பிறகு, அவர்கள் சிறப்புப் பேருந்தில் சபாநாயகரின் வீட்டிற்குச் சென்று, கெலாட்டுக்கு பதிலாக சச்சின் பைலட்டை முதலமைச்சராக மாற்றினால் ராஜினாமா செய்வோம் என்று மிரட்டினர்.

தலைவராக கெலாட் தேர்வு செய்யப்பட்டால், அவரின் ஆதரவாளர் ஒருவருக்கு முதலமைச்சர் பதவி செல்ல வேண்டும் என அவர் விரும்பியதாகக் கூறப்படுகிறது.

காங்கிரஸ் மேலிடம், இளம் தலைவர் சச்சின் பைலட்டுக்கு முதலமைச்சர் பதவியை அளிக்க திட்டமிட்டிருந்தனர். முதலமைச்சர் பதவியை சச்சின் பைலட்டுக்கு அளித்தால் ராஜினாமா செய்து விடுவோம் என கெலாட்டுக்கு ஆதரவாக உள்ள 90 எம்எல்ஏக்கள் மிரட்டல் விடுத்தனர். இதற்கு பின்னணியில் கெலாட் இருந்ததாகவும் அரசியல் வட்டாரங்களில் தகவல் வெளியானது.

ராாகுல் காந்தியின் இந்திய ஒற்றுமை நடைபயணத்திற்கு நடுவில் கட்சிக்கு தர்மசங்கடத்தை ஏற்படுத்திய அசோக் கெலாட் மீது காங்கிரஸ் தலைமை கடும் கோபத்தில் உள்ளதாக கூறப்படுகிறது. கெலாட், முதலமைச்சர் பதவியை விட்டுக்கொடுக்க மறுத்தது தலைமைக்கு எரிச்சலை ஏற்படுத்தியுள்ளதாகவும் காங்கிரஸ் வட்டாரங்கள் தகவல் தெரிவிக்கின்றன.

கெலாட்டுக்கு நெருக்கமான மூன்று அமைச்சர்கள் கட்சியின் உத்தரவுக்கு எதிராக திரண்டிருந்த போதிலும், தனக்கும் இதற்கும் சம்மந்தம் இல்லை என அனைத்து குற்றச்சாட்டுகளுக்கும் மறுப்பு தெரிவித்தார். 

மல்லிகார்ஜுன் கார்கே, திக்விஜய சிங் போன்ற மூத்த தலைவர்களை தலைவர் பதவிக்கான தேர்தலில் போட்டியிட வைக்க காங்கிரஸ் பரிசீலித்து வந்தது.

வேட்பு மனுவை வாங்க வந்த திக் விஜய் சிங் தனது வேட்பு மனுவை நாளை தாக்கல் செய்ய போவதாக தனியார் செய்தி நிறுவனத்திற்கு பேட்டியளித்துள்ளார். அந்த பேட்டியில், ராஜஸ்தான் முதலமைச்சர் பதவியை அசோக் கெலாட் ராஜினாமா செய்ய மறுத்த நிலையில் தான் போட்டியிட போவதாக அறிவித்தார்.

இதனிடையே, காந்தி குடும்பத்தின் மறைமுக ஆதரவோடு மூன்றாவது வேட்பாளர் தலைவர் பதவிக்கான தேர்தலில் போட்டியிடலாம் என தகவல் வெளியாகியுள்ளது. தேர்தலில் போட்டியிடுவதற்கான வேட்பு மனுவை தாக்கல் செய்ய நாளையே கடைசி தினமாகும். தற்போதுவரை, திக் விஜய சிங்கும் சசி தரூரும் தலைவர் பதவிக்கு போட்டியிடுவது உறுதியாகியுள்ளது. இருவரும், நாளை வேட்பு மனு தாக்கல் செய்ய உள்ளனர்.