Coimbatore: சிறுமிகளுக்கு பாலியல் தொல்லை.. ஓய்வுபெற்ற ஆசிரியர் உட்பட இரண்டு பேர் போக்சோவில் கைது

இரு வேறு சம்பவங்களில் சிறுமிகளுக்கு பாலியல் தொல்லை கொடுத்த ஓய்வு பெற்ற ஆசிரியர் மற்றும் அரசுப் பள்ளி ஆசிரியர் கைது செய்யப்பட்டுள்ளனர்.

கோப்பு படம்

கோவை அருகே இரு வேறு சம்பவங்களில் சிறுமிகளுக்கு பாலியல் தொல்லை கொடுத்த ஓய்வு பெற்ற ஆசிரியர் மற்றும் அரசுப் பள்ளி ஆசிரியர் கைது செய்யப்பட்டுள்ளனர்.

கோவை மாவட்டம் பொள்ளாச்சி நகர்ப்புற பகுதியை சேர்ந்தவர் எபினேசர். 77 வயதான இவர், ஓய்வு பெற்ற அரசு பள்ளி ஆசிரியர். அதே பகுதியை சேர்ந்த ஆறு வயது சிறுமி ஒருவரின் தந்தையும், எபினேசரும் சிறு வயது முதல் குடும்ப நண்பர்களாக இருந்துள்ளனர். இந்நிலையில் நேற்று காலை சிறுமியின் தந்தையும், தாயும் பொருட்கள் வாங்க கடைக்கு சென்றனர். சிறுமி மட்டும் வீட்டில் தனியாக இருந்துள்ளார். அப்போது சிறுமியின் வீட்டிற்கு சென்ற எபினேசர் சிறுமியை பாலியல் வன்கொடுமை செய்துள்ளார். கடைக்கு சென்று விட்டு திரும்பி வந்த பெற்றோர் சிறுமி அழுது கொண்டிருப்பதைக் கண்டு விசாரித்த போது, எபினேசர் சிறுமி தனக்கு நேர்ந்த கொடுமையை பொற்றோரிடம் தெரிவித்துள்ளார். 

இதையடுத்து சிறுமியின் பெற்றோர் எபினேசர் வீட்டுக்குச் சென்று கேட்ட போது, எபினேசர் முறையாக பதிலளிக்காததால் பெற்றோர் வாக்குவாதத்தில் ஈடுபட்டுள்ளனர். பின்னர் சிறுமியின் பெற்றோர் பொள்ளாச்சி அனைத்து மகளிர் காவல் நிலையத்தில் எபினேசர் மீது புகார் அளித்ததன் பேரில்,  காவல் துறையினர் விசாரணையில் எபினேசர் சிறுமியை பாலியல் வன்கொடுமை செய்தது தெரியவந்தது. இதனைத் தொடர்ந்து எபினேசர் மீது போக்சோ வழக்கு பதிவு செய்த அனைத்து மகளிர் காவல் துறையினர், கைது செய்து நீதிமன்ற காவலில் சிறையில் அடைத்தனர்.

இதேபோல கோவை மாவட்டம் அன்னூர் பகுதியை சேர்ந்தவர் 10 வயது மாணவி. இவர் அப்பகுதியில் உள்ள அரசுப் பள்ளியில் 5 ஆம் வகுப்பு பயின்று வருகிறார்.இந்த நிலையில் அதே பள்ளியை சேர்ந்த ஆசிரியர் மாணிக்க சுந்தரம் (47) என்பவர்  மாணவிக்கு பாலியல் தொல்லை கொடுத்ததாக கூறப்படுகிறது. இது குறித்து பாதிக்கப்பட்ட மாணவி பள்ளியின் தலைமையாசிரியரிடம் தெரிவித்துள்ளார். இதனையடுத்து தலைமையாசிரியர் அன்னூர் காவல் நிலையத்தில் புகார் அளித்துள்ளார். இந்த புகாரின் பேரில் வழக்குப் பதிவு செய்து காவல் துறையினர் விசாரணை மேற்கொண்டனர். விசாரணையில் மாணவிக்கு ஆசிரியர் பாலியல் தொல்லை கொடுத்தது தெரிய வந்துள்ளது. இதனையடுத்து அன்னூர் காவல் துறையினர் போக்சோ சட்டத்தின் கீழ் அரசுப் பள்ளி ஆசிரியர் மாணிக்க சுந்தரத்தை கைது செய்து, நீதிமன்றத்தில் ஆஜர்படுத்தி சிறையில் அடைத்தனர். இந்த சம்பவம் அப்பகுதியில் அதிர்ச்சியை ஏற்படுத்தி உள்ளது.

மேலும் செய்திகளை அறிய :ABP நாடு செய்திகளை Google News -ல் பின் தொடர இங்கே கிளிக் செய்யவும்

பேஸ்புக் பக்கத்தில் தொடர

ட்விட்டர் பக்கத்தில் தொடர

யூடிபில் வீடியோக்களை காண