’மின்வெட்டு என பொய் பிரச்சாரம் செய்யப்படுகிறது’ - அமைச்சர் செந்தில் பாலாஜி குற்றச்சாட்டு

"மின் வெட்டு என பொய் பிரச்சாரத்தை மேற்கொள்கிறார்கள். பாதிப்பு உள்ள பகுதியை தெரிவித்தால் உடனடியாக மின்சாரம் வினியோகம் அளிக்கப்படும்‌."

அமைச்சர் செந்தில் பாலாஜி ஆய்வு

கோவை உக்கடம் அருகேயுள்ள வாலாங்குளத்தில் வடிகால் அமைப்பு மற்றும் ஸ்மார்ட் சிட்டி பணிகளை  மின்சாரத் துறை அமைச்சர் செந்தில் பாலாஜி ஆய்வு செய்தார். மேலும் மழை நீரால் பாதிக்கப்பட்ட இடங்களில் அவர் ஆய்வு மேற்கொண்டார். அப்போது கோவை மாவட்ட ஆட்சியர் சமீரன், மாநகராட்சி ஆணையர் இராஜ கோபால் சுன்காரா உள்ளிட்டோர் உடனிருந்தனர். இதனைத் தொடர்ந்து கோவை இரயில் நிலையத்தில் மெகா தடுப்பூசி முகாமை அமைச்சர் செந்தில் பாலாஜி தொடங்கி வைத்தார்.  ஆய்வுக்கு  பிறகு அமைச்சர் செந்தில் பாலாஜி செய்தியாளர்களுக்கு  பேட்டியளித்தார். அப்போது பேசிய அவர், "கோவை மாவட்டத்தில் வட கிழக்கு பருவ மழையால் 27 குளங்களில் 26 குளங்கள் நிரம்பி உள்ளது. மீதமுள்ள ஒரு குளம் 50 சதவீதம் நிரம்பியுள்ளது. மழையின் அளவு அதிகளவில் பெய்துள்ளது. வாலாங்குளம் நிரம்பிச் செல்லும் போது, நீர் செல்லும் பாதை குறுகலாக உள்ளது. அது சரி செய்யப்படும்.

31 பகுதிகளில் மழைநீர் தேங்கியுள்ளது. 7 பள்ளிகளில் மழைநீர் சூழ்ந்துள்ளது. மழை நீரை அகற்றும் பணிகள் நடைபெற்று வருகிறது. மழையால் பாதிப்பு இல்லாத அளவில் மாவட்ட நிர்வாகம் தகுந்த ஏற்பாடுகளை செய்துள்ளது. பருவமழையை எதிர்கொள்ள முன்னெச்சரிக்கை நடவடிக்கை எடுக்கப்பட்டுள்ளது. மின் வெட்டு என பொய் பிரச்சாரத்தை மேற்கொள்கிறார்கள். பாதிப்பு உள்ள பகுதியை தெரிவித்தால் உடனடியாக மின்சாரம் வினியோகம் அளிக்கப்படும்‌.

150 இடங்களில் மக்கள் சபை கூட்டம் நடத்தி மக்களிடம் மனுக்களை பெற்றுள்ளோம். விரைந்து நடவடிக்கை மேற்க்கொள்ள பணி செய்து வருகிறோம். கோவை மாநகராட்சியில் சாலைகள் மிக மோசமாக உள்ளது. சிறப்பு நிதிகளை பெற்று சாலைகளை மேற்க்கொள்ள இருக்கிறோம். வட கிழக்கு பருவ மழைக்கு அனைத்து துறைகளுடன் ஆலோசித்து முன்னெச்சரிக்கை நடவடிக்கைகள் எடுக்கப்பட்டுள்ளது" என அவர் தெரிவித்தார்.

இதனைத் தொடர்ந்து சுங்கம் பகுதியில் சூப்பர் சக்கரா வாகனம் மூலம் கழிவு நீர் அகற்றும்  பணிகளை அமைச்சர் செந்தில் பாலாஜி பார்வையிட்டார். பின்னர் கப்பலோட்டிய தமிழன் வ.உ.சிதம்பரனாரின் 85 வது நினைவு தினத்தையொட்டி கோவை மத்திய சிறை வளாகத்தில் உள்ள திருவருவ சிலை மற்றும் அவர் இழுத்த செக்கிற்கு அமைச்சர் செந்தில் பாலாஜி மாலை அணிவித்து மரியாதை செலுத்தினார்.

மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்

 

ABP நாடு செய்திகளை சமூக வலைத்தள பக்கங்களிலும் பின் தொடரலாம்

 

பேஸ்புக் பக்கத்தில் தொடர

 

ட்விட்டர் பக்கத்தில் தொடர

 

யூடிபில் வீடியோக்களை காண