Crime: கணவரை கொலை செய்ய முயற்சித்த துணை நடிகை கைது - பொள்ளாச்சியில் பரபரப்பு

சுந்தரி, கண்ணெதிரே தோன்றினாள் ஆகிய சீரியல் நாடகங்களில் துணை நடிகையாக நடித்துள்ள ரம்யா கணவரை கொலை செய்ய முயற்சித்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.

கைது செய்யப்பட்டவர்கள்

கோவை மாவட்டம் பொள்ளாச்சியில் சீரியல் நடிகை கணவரை கொலை செய்ய நண்பருடன் திட்டம் தீட்டியதாக கணவர் கொடுத்த புகாரின் பேரில் நடிகை மற்றும் நண்பரை காவல் துறையினர் கைது செய்தனர்.

துணை நடிகை:

கோவை மாவட்டம் பொள்ளாச்சி அருகே உள்ள டி. நல்லகவுண்டன் பாளையம் பகுதியை சேர்ந்தவர் ரமேஷ். இவர் அப்பகுதியில் உள்ள குளிர்பான கம்பெனியில் வேலை செய்து வருகிறார். கடந்த ஐந்து வருடங்களுக்கு முன்பு கோவை பீளமேடு பகுதியை சேர்ந்த ரம்யா என்பவரை ரமேஷ் திருமணம் செய்து கொண்டார். இவர்களுக்கு இரண்டு குழந்தைகள் உள்ளன. இதனிடையே கடந்த சில மாதங்கள் முன்பு கணவன் மனைவி இடையே ஏற்பட்ட கருத்து வேறுபாடு காரணமாக, பீளமேடு பகுதியில் உள்ள தனது தாய் வீட்டிற்கு ரம்யா சென்று விட்டார். 

சினிமாவில் நடிக்கும் ஆர்வம் இருந்ததால், கோவை கவுண்டம்பாளையத்தை சேர்ந்த டேனியல் என்கிற சந்திரசேகர் என்பவருடன் ரம்யாவிற்கு பழக்கம் ஏற்பட்டுள்ளது. தற்போது சுந்தரி, கண்ணெதிரே தோன்றினாள் சீரியல் நாடகங்களில் ரம்யா துணை நடிகையாக நடித்து வருகிறார். ரமேஷ் இரண்டு குழந்தைகளை பராமரிக்க முடியாமல் பீளமேடு சென்று ரம்யாவிடம் குழந்தைகளை பார்த்துக் கொள்ளுமாறு கூறியுள்ளார். இதையடுத்து ரம்யா சில தினங்கள் முன்பு பொள்ளாச்சியில் உள்ள ரமேஷ் வீட்டுக்கு வந்து விட்டார். 

கொலை முயற்சி:

இந்நிலையில் ரம்யா தனது நண்பர் டேனியல் என்கிற சந்திரசேகரனிடம் தன் கணவர் குடித்து விட்டு கொடுமை படுத்துவதாகவும் அவரை கொலை செய்ய வேண்டுமெனவும் கூறியுள்ளார். இதையடுத்து சந்திரசேகர் நேற்று முன்தினம் இரவு ரம்யாவும், ரமேஷும் இருசக்கர வாகனத்தில் செல்லும் பொழுது அடையாளம் தெரியாத நபர் இருசக்கர வாகனத்தில் மோதியுள்ளார்.

அப்போது அந்த நபர் மறைத்து வைத்திருந்த ஆக்ஸாபிலைட் மூலம் ரமேஷை கை, கழுத்து, தலை பகுதிகளில் தாக்கி விட்டு தப்பித்து விட்டார். இதையடுத்து மருத்துவமனையில் அனுமதிக்கப்பட்ட ரமேஷ் சிகிச்சை பெற்று வருகிறார். இது குறித்து ரமேஷ் பொள்ளாச்சி தாலுகா காவல் நிலையத்தில் புகார் அளித்தார். இதன் பேரில் காவல் துறையினர் வழக்குப்பதிவு செய்து விசாரணை மேற்கொண்டனர்.

ரம்யாவிடம் விசாரித்த போது சந்தேகம் எழுந்ததால் அவரது மொபைல் போனில் வந்த அழைப்புகள் வைத்து விசாரணை மேற்கொண்டதில் தனது கணவரை கொல்ல நண்பர் மூலம் திட்டம் தீட்டியது தெரியவந்தது. இதையடுத்து ரம்யா மற்றும் சந்திரசேகரன் ஆகியோரை கைது செய்த காவல் துறையினர், மதுக்கரை நீதிமன்றத்தில் ஆஜர் படுத்தி கோவை மத்திய சிறையில் அடைத்தனர். துணை நடிகை கணவரை கொலை செய்ய திட்டம் தீட்டிய வழக்கில் கைது செய்யப்பட்டு இருப்பது பரபரப்பை ஏற்படுத்தியுள்ளது.

மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்

ABP நாடு செய்திகளை சமூக வலைத்தள பக்கங்களிலும் பின் தொடரலாம்

பேஸ்புக் பக்கத்தில் தொடர

ட்விட்டர் பக்கத்தில் தொடர

யூடியூபில் வீடியோக்களை காண