வழக்குகளை கையாள பயிற்சி அளிப்பதே முதல் வேலை: விலங்கு வதை வழக்குகளுக்காக தமிழ்நாடு அரசு நியமித்த எஸ்பி!
விலங்குகள் துன்புறுத்தல் வழக்குகளை எவ்வாறு கையாள்வது என்பது குறித்து காவல்துறையினருக்கு விழிப்புணர்வு மற்றும் பயிற்சி அளிப்பதே தனது முதல் படியாக இருக்கும் என்று டி. சண்முகப்பிரியா கூறினார்.
விலங்கு வதை வழக்குகளில் தொடர்புடையவர்கள் மீது வழக்குப்பதிவு செய்வதற்கான குறிப்பிடத்தக்க நடவடிக்கையாக, தமிழ்நாடு அரசு ஒரு எஸ்பியை மாநில நோடல் அதிகாரியாக நியமித்துள்ளது.
விலங்குகள் வதை வழக்குகள்
வெளிநாடு வாழ் இந்தியர் பிரிவுத் தலைவராக உள்ள டி.சண்முக பிரியா, எஸ்.பி. மாநிலத்தின் நோடல் அதிகாரியாக தற்போது பொறுப்பேற்கிறார். பதிவு செய்யப்படும் அனைத்து புகார்கள் மற்றும் வழக்குகளை விசாரிக்க அவர் பிரிவு அதிகாரிகளை நியமிப்பார் என்று தெரிவிக்கப்பட்டுள்ளது. இது போன்ற பிரச்சனைகளில் பணிபுரியும் விலங்கு ஆர்வலர்கள் மற்றும் அதிகாரிகளுக்கு இந்த நியமனம் பெரும் மகிழ்ச்சியை அளித்துள்ளது.
விலங்குகள் துன்புறுத்தல் அதிகரித்து வருவதால், இதுபோன்ற வழக்குகளை எவ்வாறு கையாள்வது என்பது குறித்து காவல்துறையினருக்கு விழிப்புணர்வு மற்றும் பயிற்சி அளிப்பதே தனது முதல் படியாக இருக்கும் என்று டி சண்முக பிரியா கூறினார்.
கண்டுகொள்ளப்படாத வழக்குகள்
இந்திய தண்டனைச் சட்டம் சம்பந்தப்பட்டவர்களுக்கு தண்டனையை அனுமதித்த போதிலும், இந்த வழக்குகளில் காவல்துறையின் நடவடிக்கை மற்றும் ஈடுபாடு இல்லாதது மிகவும் பொதுவான புகார்களில் ஒன்றாக உள்ளது. உதாரணமாக, சமீபத்தில் வேலூரில் கால்நடை மருத்துவர் ஒருவர் வளர்ப்பு நாயைக் கொன்றார், ஆனால் போலீசார் எஃப்ஐஆர் பதிவு செய்ய மறுத்துவிட்டனர், எனவே நாயின் உடலை பிரேத பரிசோதனை செய்ய முடியவில்லை. மற்றொரு வழக்கில், ஸ்ரீபெரும்புதூரில் உள்ள ரிசார்ட்டுக்குள் 5 நாய்கள் நாட்டுத் துப்பாக்கியால் சுட்டுக் கொல்லப்பட்டன. மற்றொரு வழக்கில் தெரு நாய்களுக்கு உணவளித்த மாணவியின் பெற்றோரை உள்ளூர் போலீசார் கைது செய்து சிறையில் அடைத்தனர்.
இதுவே முதல்முறை
இந்த நிலையில், இந்த நியமனம் குறித்து இந்திய விலங்குகள் நல வாரியத்தின் உறுப்பினர் ஸ்ருதி வினோத் ராஜ் கூறுகையில், விலங்குகள் துன்புறுத்தல் வழக்குகளுக்கு இதுபோன்ற உதவி வழங்கப்படுவது இதுவே முதல் முறை. "நாங்கள் ஸ்டேஷனுக்குச் செல்லும்போது, அவர்கள் மற்ற குற்றங்கள் மற்றும் சட்டம் ஒழுங்கு பிரச்சினைகளில் பிசியாக இருப்பதால், விலங்குகள் வன்கொடுமை வழக்குகளை அவர்கள் பொதுவாக பெரிதாகக் கருதுவதில்லை. கடந்த மூன்று மாதங்களில் மட்டும் வாரியம் 56 வழக்குகளைப் பெற்றுள்ளது, அவற்றில் சுமார் 24 வழக்குகளுக்கு காவல்துறை உதவி தேவைப்படுகிறது. இருப்பினும், இரண்டு அல்லது மூன்று வழக்குகளில் மட்டுமே போலீசார் குற்றவாளிகளை பதிவு செய்தனர். விலங்குகள் நலம் தொடர்பாக உயர் நீதிமன்றம் மற்றும் உச்ச நீதிமன்றங்களில் இருந்து பல விலங்கு சட்டங்கள் மற்றும் முக்கிய தீர்ப்புகள் உள்ளன, அவை இங்குள்ள காவல்துறையினருக்குத் தெரியாது," என்றார்.
சட்டங்கள் குறித்து பயிற்சி அளிப்போம்
இதுகுறித்து நியமிக்கப்பட்ட அதிகாரி சண்முகப்ரியா கூறுகையில், "தெரு நாய்கள் மற்றும் பூனைகள் தனியார் நிறுவனங்களால் கொல்லப்படுவதாலும், விலங்குகளை காயப்படுத்துதல் போன்றவற்றிலும் நடவடிக்கை எடுக்க அதிகாரிகளுக்கு பயிற்சி அளிக்க வேண்டும். 1960 ஆம் ஆண்டின் விலங்குகள் வதை தடுப்புச் சட்டம் மற்றும் இந்திய தண்டனைச் சட்டத்தின் 428 மற்றும் 429 போன்ற பல்வேறு பிரிவுளை முதலில் அதிகாரிகளுக்கு கற்றுக்கொடுக்க வேண்டும்," என்றார். விலங்கு ஆர்வலர்களின் கூற்றுப்படி, "தமிழநாடு அரசு ஒரு முக்கியமான நடவடிக்கை எடுத்துள்ளது. ஏனெனில் பெரும்பாலான ஆய்வுகள் விலங்குகளை துன்புறுத்துபவர்கள் பெரும்பாலும் பெண்கள் மற்றும் குழந்தைகளுக்கு எதிரான பிற குற்றங்களைச் செய்கிறார்கள் என்பதைக் காட்டுகிறது", என்றார். மறுபுறம், ஸ்ருதி, எல்லா வழக்குகளையும் போலீசார் விசாரிக்க மாட்டார்கள் என்று கூறினார். "புகார்கள் சரிபார்க்கப்பட்டு, முழுமையான விசாரணைக்குப் பிறகு, குற்றவாளிகளைப் பதிவு செய்ய காவல்துறையைத் தொடர்புகொள்வார்கள்," என்று அவர் கூறினார்.
தலைப்பு செய்திகள்
ட்ரெண்டிங் செய்திகள்
