Vaping vs Smoking: சிகரெட்டை விட 'வேப்பிங்' பாதுகாப்பானதா? - இளைஞர்களே உஷார்..தெரியாமல் கூட இதை செய்யாதீங்க!

புகைப்பிடித்தல், வேப்பிங் இரண்டுக்கும் இடையிலான ஒரே வித்தியாசம், அவை உடலைச் சேதப்படுத்தும் விதம் மட்டுமே. இதனைப் பற்றி விரிவாகப் பார்ப்போம்.

வேப்பிங்

புகைப்பிடிக்கும் பழக்கத்தை கைவிட்டு வேப்பிங் (Vaping) முறைக்கு மாறினால் உடல்நலத்திற்கு எந்தப் பாதிப்பும் இல்லை என்று பலரும் தவறாகக் கருதுகின்றனர். புகைப்பிடித்தலும், வேப்பிங்கும் வெவ்வேறு முறைகளாக இருந்தாலும், இரண்டுமே உடலுக்குப் பெரும் தீங்கினை விளைவிப்பவை என்பதுதான் நிதர்சனம். இந்த இரண்டுக்கும் இடையிலான ஒரே வித்தியாசம், அவை உடலைச் சேதப்படுத்தும் விதம் மட்டுமே. இதனைப் பற்றி விரிவாகப் பார்ப்போம்.

புகைப்பிடித்தல் என்றால் என்ன?

புகையிலையை எரிப்பதன் மூலம் வெளிவரும் புகையை சுவாசிப்பதே புகைப்பிடித்தல் ஆகும். சிகரெட், பீடி மற்றும் சுருட்டு போன்றவை இந்த வகையின்கீழ் வருகின்றன. புகையிலையை எரிக்கும்போது சுமார் 4,000-க்கும் மேற்பட்ட வேதிப்பொருட்கள் வெளியாகின்றன. இதில் 70-க்கும் மேற்பட்ட வேதிப்பொருட்கள் புற்றுநோயை உண்டாக்கும் காரத்தன்மை கொண்டவை என்பது குறிப்பிடத்தக்கது.

வேப்பிங் என்றால் என்ன?

மின்சாரத்தால் இயங்கும் ஒரு கருவியின் மூலம் திரவத்தை வெப்பப்படுத்தி, அதை நீராவியாக சுவாசிக்கும் முறையே வேப்பிங் எனப்படுகிறது. இந்தத் திரவத்தில் நிகோடின், சுவையூட்டும் வேதிப்பொருட்கள் மற்றும் புரோப்பிலீன் கிளைக்கால் போன்றவை கலந்திருக்கும். இதில் புகை வருவதில்லை என்பதால் இது பாதுகாப்பானது என்று பலரும் நினைக்கிறார்கள். ஆனால், இந்த நீராவியிலும் உடலுக்குக் கேடு விளைவிக்கும் நச்சு வேதிப்பொருட்கள் நிறைந்துள்ளன.

உடல்நலப் பாதிப்புகள்

புகையிலை எரியும்போது வெளியாகும் தார் (Tar) மற்றும் கார்பன் மோனாக்சைடு நேரடியாக நுரையீரலைப் பாதிக்கின்றன. இது நீண்ட காலப்போக்கில் நுரையீரல் புற்றுநோய் மற்றும் சிஓபிடி (COPD) போன்ற கொடிய நோய்களுக்கு வழிவகுக்கிறது. மேலும், ரத்த நாளங்கள் கடினமாவதால் மாரடைப்பு ஏற்படும் அபாயமும் அதிகரிக்கிறது. அதேவேளையில், வேப்பிங் முறையில் தார் இல்லாவிட்டாலும், அதில் உள்ள வேதிப்பொருட்கள் நுரையீரலின் உட்புறத்தைச் சேதப்படுத்துகின்றன. வேப்பிங் செய்வதால் 'EVALI' எனப்படும் ஒரு குறிப்பிட்ட வகை நோய் ஏற்படுவதை மருத்துவ நிபுணர்கள் உறுதிப்படுத்தியுள்ளனர். மேலும், இதில் உள்ள நிகோடின் ரத்த அழுத்தத்தை உயர்த்தி, இதயத் துடிப்பை வேகமாக்குவதால் குறுகிய காலத்திலேயே இதயப் பாதிப்புகள் ஏற்பட வாய்ப்புள்ளது.

மூளை வளர்ச்சியும் அடிமையாதலும்

புகைப்பிடித்தல் மற்றும் வேப்பிங் ஆகிய இரண்டுமே நிகோடின் மூலமாக மூளையைப் பாதிக்கின்றன. குறிப்பாக வேப்பிங் முறையில் நிகோடின் அளவு அதிகமாக இருக்க வாய்ப்புள்ளதால், இது இளைஞர்களின் மூளை வளர்ச்சியைப் பெரிதும் பாதிக்கிறது. கவர்ச்சிகரமான வாசனை மற்றும் விளம்பரங்களால் இளைஞர்கள் எளிதில் இதற்கு அடிமையாகி விடுகின்றனர். நிகோடின் இருப்பதால், இதில் இருந்து மீள்வது என்பது சவாலான ஒன்றாகவே மாறுகிறது.

மருத்துவ நிபுணர்களின் கருத்து

புகைப்பிடித்தலை விட வேப்பிங் குறைவான பாதிப்பைக் கொண்டிருக்கலாம், ஆனால் அது ஒருபோதும் பாதுகாப்பானது அல்ல என்பதே மருத்துவர்களின் கருத்தாக உள்ளது. வேப்பிங் முறை அறிமுகமாகி சில காலமே ஆவதால், அதன் நீண்ட காலப் பாதிப்புகள் வரும் ஆண்டுகளில் இன்னும் அதிகமாகத் தெரியவரலாம். எனவே, புகைப்பிடிப்பதை நிறுத்த வேப்பிங் ஒரு சரியான வழிமுறை அல்ல. ஒருவர் புகைப் பழக்கத்திலிருந்து விடுபட விரும்பினால், மருத்துவர்களின் ஆலோசனைப்படி நிகோடின் பேட்ச்கள் மற்றும் முறையான ஆலோசனைகளைப் பெறுவதே சிறந்தது.

இந்தியாவில் சட்ட விதிகள்

இந்தியாவில் பொது இடங்களில் புகைப்பிடிக்கத் தடை விதிக்கப்பட்டுள்ளது, ஆனால் தனிப்பட்ட பயன்பாடு அனுமதிக்கப்படுகிறது. இருப்பினும், 2019-ம் ஆண்டு முதல் இந்தியாவில் வேப்பிங் முறைக்கு முழுமையான தடை விதிக்கப்பட்டுள்ளது. இதன் உற்பத்தி, விற்பனை மற்றும் இறக்குமதி அனைத்தும் சட்டவிரோதமானது. முதல்முறை விதியை மீறுபவர்களுக்கு 1 லட்சம் ரூபாய் அபராதம் அல்லது சிறைத்தண்டனை விதிக்கப்பட வாய்ப்புள்ளது.

குறிப்பு: இக்கட்டுரையில் உள்ள தகவல்கள் நிபுணர்களால் பகிரப்பட்டவை மற்றும் பொதுவான விழிப்புணர்விற்காக மட்டுமே வழங்கப்பட்டுள்ளன. இவை முறையான மருத்துவ ஆலோசனைக்கோ அல்லது சிகிச்சைகோ மாற்றாகாது. உடல்நலம் சார்ந்த சந்தேகங்களுக்கு எப்போதும் தகுதியுள்ள மருத்துவரை அணுகுவது அவசியமாகும்.