TN Corona Spike: மூன்றாவது நாளாக பதிவாகும் உயிரிழப்பு.. வேகமாக பரவும் கொரோனா.. நிலவரம் என்ன? முழு விவரம்..

தமிழ்நாட்டில் மேலும் 432 பேருக்கு கொரோனா தொற்று பாதிப்பு உறுதி செய்யப்பட்டுள்ளது. நேற்றைய தினம் சென்னையை சேர்ந்த ஒருவர் சிகிச்சை பலனின்றி உயிரிழந்துள்ளார். 

கோப்பு புகைப்படம்

தமிழ்நாட்டில் மேலும் 432 பேருக்கு கொரோனா தொற்று பாதிப்பு உறுதி செய்யப்பட்டுள்ளது. நேற்றைய தினம் சென்னையை சேர்ந்த ஒருவர் சிகிச்சை பலனின்றி உயிரிழந்துள்ளார். 

தமிழ்நாட்டில் புதிதாக 432 பேருக்கு கொரோனா தொற்று பாதிப்பு உறுதி செய்யப்பட்டுள்ளது. 243 பேர் கொரோனா தொற்றுக்கான சிகிச்சை பெற்று வீடு திரும்பியுள்ளனர். தொடர்ந்து மூன்றாவது நாளாக உயிரிழப்பு பதிவாகி வருகிறது. மேலும் ஒருவர் சிகிச்சை பலனின்றி உயிரிழந்துள்ளார்.  தொற்று பாதிப்பு அதிகரித்து வரும் நிலையில் தமிழ்நாட்டில் 2,489 பேர் கொரோனாக்கான சிகிச்சை பெற்று வருகின்றனர். நேற்றைய நிலவரப்படி ஓமன் நாட்டிலிருந்து வந்த 3 பேருக்கும், தாய்லாந்து மற்றும் சிங்கப்பூரிலிருந்து வந்த 2 பேர் என மொத்தம் 5 வெளிநாட்டு பயணிகளுக்கு கொரோனா தொற்று உறுதி செய்யப்பட்டுள்ளது. 5,093 ஆர்டிபிசிஆர் மாதிரிகள் பரிசோதிக்கப்பட்டு அதில் 432 மாதிரிகளில் தொற்று உறுதி செய்யப்பட்டது. கடந்த வாரம் நாள் ஒன்றுக்கு 3000 ஆர்டிபிசிஆர் பரிசோதனை நடத்தப்பட்டு வந்த நிலையில் தற்போது 5000 ஆக உயர்த்தப்பட்டுள்ளது. இதுவரை தமிழ்நாட்டில் 36,00,237 பேர் கொரோனா தொற்றால் பாதிக்கப்பட்டுள்ளனர்.

தமிழ்நாட்டில் அதிகபட்சமாக சென்னையில் 117 பேருக்கு புதிதாக தொற்று பாதிப்பு உறுதி செய்யப்பட்டுள்ளது. சென்னையில் மொத்தம் 777 பேர் கொரோனா தொற்றால் பாதிக்கப்பட்டுள்ளனர். தமிழ்நாட்டில் தொற்று பரவும் சதவீதம் மெதுவாக உயர்ந்து வருகிறது. மார்ச் மாதம் தொற்று சதவீதம் 10% கீழ் இருந்த நிலையில், செங்கல்பட்டில் 12.2%, கோவை – 11.5%, கன்னியாகுமரி – 10.9 %, சேலம் – 10.3 %,  காஞ்சிபுரம் – 10%, சென்னை - 9.7% என பதிவு செய்யப்பட்டுள்ளது. நேற்று தமிழ்நாட்டில் சென்னையை சேர்ந்த 96 வயது முதியவர் நோய் தொற்றால் பாதிக்கப்பட்டு 10-ஆம் தேதி தனியார் மருத்துவமனையில் அனுமதிக்கப்பட்டுள்ளார். அவர் நேற்றைய தினம் சிகிச்சை பலனின்றி உயிரிழந்தார். விமான நிலையம் மட்டுமல்லாமல் ரயில் நிலையம் மற்றும் துறைமுகங்களிலும் பரிசோதனைகள் மேற்கொள்ளப்பட்டு வருகிறது.

இந்தியாவில் ஒமிக்ரான் வைகை கொரோனா வைரஸ் வேகமாக பரவி வருகிறது. Xbb 1.16 மற்றும் ba2 என்ற புதிய வைரஸ் பரவ தொடங்கியுள்ளது. இந்த வைரஸ் தொற்றால் பாதிப்புகள் அதிகம் இல்லை என்றாலும் மக்கள் பாதுகாப்பாக இருக்க பொது இடங்களில் முகக்கவசம் அணிய அறிவுறுத்தப்பட்டுள்ளது. மேலும் கொரோனா தொற்று அதிகரித்தால் முகக்கவசம் கட்டாயமாக்கப்படும் என சுகாதார துறை அமைச்சர் மா. சுப்பிரமணியன் தமிழ்நாடு சட்டப்பேரவையில் கொரோனா மீதான கவன ஈர்ப்பு தீர்மானத்திற்கு பதிலளித்தபோது தெரிவித்தார்.