Vidamuyarchi: அப்டேட் தராதது ஒரு குத்தமா? லைகா நிறுவனத்தை வெளுத்து வாங்கும் நெட்டிசன்ஸ்!

அஜித்குமார் நடித்து வரும் விடாமுயற்சி படத்தின் எந்தவொரு அப்டேட்டும் வெளியாகாத நிலையில், தயாரிப்பு நிறுவனமான லைகா நிறுவனத்தை எக்ஸ் தளத்தில் விமர்சித்து வருகின்றனர்.

லைகா ப்ரொடக்‌ஷன்ஸ் - விடாமுயற்சி

Source : twitter

தமிழ் திரையுலகின் மிகவுமு் முக்கியமான தயாரிப்பு நிறுவனங்களில் ஒன்று லைகா ப்ரொடக்ஷன்ஸ் நிறுவனம். சுபாஷ்கரனின் லைகா நிறுவனம் விஜய் நடித்த கத்தி படம் மூலமாக தமிழில் அறிமுகமானது. பின்னர், கைதி நம்பர் 150, எமன், கோலமாவு கோகிலா, 2.0, காப்பான், தர்பார், பொன்னியின் செல்வன், சந்திரமுகி 2, இந்தியன் 2, வேட்டையன் என பல படங்களை தயாரித்துள்ளனர்.

விடாமுயற்சி

தற்போது லைகா ப்ரொடக்‌ஷன்ஸ் நிறுவனத்தின் தயாரிப்பில் விடாமுயற்சி மற்றும் எம்புரான் படம் உள்ளது. அஜித்குமார் நடிக்கும் விடாமுயற்சி படமும், மோகன்லால் நடிக்கும் லூசிபர் படத்தின் இரண்டாம் பாகமான எம்புரான் படமும் மிகப்பெரிய பட்ஜெட்டில் உருவாகி வருகிறது.

துணிவு படம் நடித்துக்கொண்டிருக்கும்போதே அஜித்குமார் லைகா ப்ரொடக்‌ஷன்ஸ் தயாரிப்பில் நடிப்பதற்கு ஒப்பந்தம் ஆனார். கடந்த 2023ம் ஆண்டு விக்னேஷ்சிவன் இயக்கத்தில் படப்பிடிப்பு தொடங்க இருப்பதாக திட்டமிட்டிருந்த நிலையில் கதையில் போதிய திருப்தி இல்லாத காரணத்தால் விக்னேஷ் சிவனுக்கு பதிலாக மகிழ் திருமேனி ஒப்பந்தமானார்.

நோ அப்டேட்:

பல சிக்கல்களுக்கு பிறகு படப்பிடிப்பு தொடங்கிய நிலையில் அஜர்பைஜான், துபாய் ஆகிய வெளிநாடுகளில் படப்பிடிப்பு நடந்தது. சுமார் இரண்டு ஆண்டு காலத்தை நெருங்கும் நிலையில் விடாமுயற்சி என்ற தலைப்பும், விடாமுயற்சி படத்தின் இரண்டு, மூன்று போஸ்டர்களும் மட்டுமே வெளியாகியுள்ளது. இது அஜித் ரசிகர்கள் மத்தியில் ஏமாற்றத்தையே ஏற்படுத்தியுள்ளது. இந்த படத்திற்கு பிறகு தொடங்கப்பட்ட அஜித்தின் குட் பேட் அக்லி படத்தின் படப்பிடிப்பு தீவிரமாக நடைபெற்று வருகிறது.

விடாமுயற்சி படம் தீபாவளிக்கு ரிலீஸ் ஆகும் என்று எதிர்பார்த்த நிலையில், தீபாவளி வெளியீடாக வேட்டையனை ரிலீஸ் செய்தது லைகா நிறுவனம். விடாமுயற்சி படம் வெளியீடு தள்ளிக்கொண்டே செல்வதால் பொங்கல் வெளியீடாக வரும் என்று அறிவிக்கப்பட்ட குட் பேட் அக்லி படத்தின் ரிலீசும் ஒத்தி வைக்கப்பட்டுள்ளது.

Worst Production House Lyca:

எந்தவொரு அப்டேட்டும் இல்லாத சூழலில் தற்போது எக்ஸ் தளத்தில் லைகா நிறுவனத்தை விமர்சித்து ஹேஷ்டேக் ட்ரெண்டாகி வருகிறது. #WorstProductionHouseLyca என்ற பெயரில் லைகா தயாரிப்பு நிறுவனத்தை விமர்சித்து பதிவிட்டு வருகின்றனர்.

இரண்டு ஆண்டுகளை நெருங்கும் சூழலில் டீசர், பாடல்கள் என்ற எந்த அறிவிப்பும் இல்லாமல் மிகவும் அமைதியாக இருப்பதால் இவ்வாறு விமர்சித்து வருகின்றனர். மகிழ் திருமேனி இயக்கி வரும் இந்த படம் இறுதிக்கட்டத்தில் உள்ளது. இந்த படத்தில் அஜித்திற்கு ஜோடியாக த்ரிஷா நடிக்கிறார். அர்ஜூன் முக்கிய வேடத்தில் நடிக்கிறார். ஆரவ், ரெஜினா உள்ளிட்டோர் முக்கிய வேடத்தில் நடிக்கின்றனர்.

விடாமுயற்சி படம் பொங்கல் வெளியீடாக வரும் என்று ரசிகர்கள் எதிர்பார்க்கின்றனர்.