Udhayanidhi Stalin: முதல் நீ.. முடிவும் நீ.. உதயநிதியின் முதல் மற்றும் கடைசி படத்தில் நடிகர் வடிவேலு..!

நடிகராக தனது திரை வாழ்க்கையை ஆதவன் படத்தில் நடிகர் வடிவேலுவுடன் தொடங்கி மாமன்னன் படத்தில் முடித்துள்ளார்.

ஆதவன் மற்றும் மாமன்னன் படத்தில் நடிகர் வடிவேலு மற்றும் உதயநிதி

தமிழ் சினிமாவில் தற்போது மிகப்பெரிய பேச்சாக இருப்பது மாமன்னன் திரைப்படம் தான். அதற்கு முக்கிய காரணம், தமிழ்நாடு அமைச்சரவையில் அமைச்சராக உள்ள விளையாட்டு மற்றும் இளைஞர் நலன் மேம்பாட்டுத்துறை அமைச்சர் உதயநிதி கதாநாயகனாக நடித்து வெளிவருகிறது என்பது தான். மேலும், பரியேறும் பெருமாள், கர்ணன் உள்ளிட்ட படங்களை இயக்கி தனி முத்திரை பதித்த மாரி செல்வராஜ் இயக்கத்தில் இப்படம் உருவாகியுள்ளது. அதேபோல், எப்போதும் நகைச்சுவை நடிகராகவே நாம் பார்த்து பழக்கப்பட்ட வைகைப்புயல் வடிவேலு இப்படத்தில் முக்கிய கதாப்பாத்திரத்தில் நடித்துள்ளார். வில்லனாக ஃபஹத் ஃபாசில் மற்றும் கதாநாயகியாக கீர்த்தி சுரேஷ் என்ற  பெரும் நட்சத்திரப் பட்டாளமே இந்தப் படத்தில் நடித்துள்ளது. படத்துக்கு இசைப்புயல் ஏ.ஆர். ரகுமான் இசை அமைத்துள்ளார் யுகபாரதி பாடல்கள் எழுதியுள்ளார். 

இந்த படத்தில் உதயநிதி நடிக்க ஒப்பந்தம் செய்யப்பட்ட பின்னர், நடிகர் கமல்ஹாசனின் ராஜ்கமல் புரொடெக்‌ஷன்ஸ் தயாரிப்பில் ஒரு படத்தில் நடிக்கப்போவதாக அதிகாரப்பூர்வ அறிவிப்புகள் வெளியாகின. ஆனால் அதன் பின்னர், உதயநிதி ஸ்டாலினுக்கு அமைச்சர் பொறுப்பு வழங்கப்பட்டதால், பணிசுமை காரணமாக ராஜ்கமல் புரொடெக்‌ஷன்ஸ் தயாரிப்பில் நடிக்கவிருந்த படத்தில் இருந்து உதயநிதி விலகினார். 

இதனால் இயக்குநர் மாரி செல்வராஜ் இயக்கத்தில் உருவாகியுள்ள மாமன்னன் படம் தான் உதயநிதி நடிக்கவுள்ள கடைசி படம் என அறிவிக்கப்பட்டது. இதனாலும் இந்த படத்தின் மீது எதிர்பார்ப்பு அதிகரித்தது. உதயநிதியின் திரை வாழ்க்கை என்பது, கடந்த 2009ஆம் ஆண்டு இயக்குநர் கே.எஸ். ரவிக்குமார் இயக்கத்தில் நடிகர் சூர்யா நடிப்பில் வெளியான ஆதவன் படத்தில், உதயநிதி சிறிய காதாப்பாத்திரத்தில் நடிகர் வைகைப் புயல் வடிவேலுவுடன் தோன்றியிருப்பார். அதன் பின்னர் இயக்குநர் எம்.ராஜேஸ் இயக்கத்தில் ”ஒரு கல் ஒரு கண்ணாடி” படத்தில் கதாநாகனாக அறிமுகமானார். 

அதைத்தொடர்ந்து மாமன்னன் படம் வரை இதுவரை 18 படங்களில் நடித்துள்ளார். இதில் ஆதவன் மற்றும் வணக்கம் சென்னை படத்தில் கேமியோ கதாப்பாத்திரங்களில் நடித்திருப்பார். தற்போது மாமன்னன் படத்துடன் திரை வாழ்க்கையில் இருந்து முற்றிலும் விலகுவதாக உதயநிதி அறிவித்துள்ளதால், உதயநிதி ஆதவன் படத்தி தோன்றிய காட்சியில் வடிவேலுவுடன் இருப்பதைப்போல், இறுதிப் படத்திலும் நடிகர் வடிவேலுவுடன் நடித்துள்ளார். இதனை சினிமா ரசிகர்கள் இது குறித்து ஆர்வமாக பேசி வருகின்றனர். மேலும், உதயநிதி நடித்த படங்களில் அவரது நடிப்புக்கு பெயர் வாங்கித் தந்த படங்களாக, மனிதன், நெஞ்சுக்கு நீதி மற்றும் மாமன்னன் படங்கள் அமைந்துள்ளன. அதேபோல், உதயநிதியின் ரசிகர்கள் அவர் தொடர்ந்து படங்களில் நடிக்க வேண்டும் என கோரிக்கை வைத்து வருகின்றனர்.