Thirumathi selvam : 11 ஆண்டுகளுக்கு பிறகு இணையும் செல்வம் - நந்தினி... சன் டிவி தரும் சர்ப்ரைஸ்

Thirumathi selvam : திருமதி செல்வம் சீரியலில் இணைந்து நடித்த சஞ்சீவ் - ரிந்தியா ஜோடி, 11 ஆண்டுகளுக்கு பிறகு சன் டிவியின் புதிய சீரியலில் மீண்டும் உறவை புதுப்பிக்கிறது.

சஞ்சீவ் - ரிந்தியா

விகடன் டெலிவிஸ்டாஸ் நிறுவனத்தின் தயாரிப்பில் 2007-ம் ஆண்டு முதல் 2013-ம் ஆண்டு வரை, சன் டிவியில் ஒளிபரப்பான மிகவும் பிரபலமான மெகா தொடர் 'திருமதி செல்வம்'. இந்த சீரியலின் லீட் ரோலில் நடிகர் சஞ்சீவ் மற்றும் 'சேது' பட புகழ் அபிதா நடிக்க கே.ஆர்.வத்சலா, தீபக், வடிவுக்கரசி, பிரியா, சிலோன் மனோகர், சூரி, வி.சி.ஜெயமணி மற்றும் பலர் முக்கிய கதாபாத்திரங்களில் நடித்திருந்தனர். 90ஸ் கிட்ஸ்களின் மிகவும் ஃபேவரட்டான இந்த தொடர் சுமார் 1,360 எபிசோட்கள் ஒளிபரப்பானது. 

திருமதி செல்வம் சீரியலில் நடிகர் சஞ்சீவ் செல்வம் என்ற கதாபாத்திரத்தில் நடித்திருந்தார். அவரின் தோழியாக நடிகை ரிந்தியா, நந்தினி என்ற கதாபாத்திரத்தில் நடித்திருந்தார். செல்வதை ஒரு தலையாக காதலித்து வருவார் நந்தினி. ஆனால் செல்வத்துக்கும் அர்ச்சனாவுக்கு திருமணம் முடிந்த பிறகு தன்னுடைய மனதை மாற்றி கொண்டாலும் அர்ச்சனாவின் அம்மாவாக சிவகாமியாக நடித்த வடிவுக்கரசி, நந்தினியை அவதூறாக பேசியதால் எதிரியாக மாறுவார் நந்தினி. 

திருமதி செல்வம் மூலம் இணைந்து நடித்த சஞ்சீவ் - ரிந்தியா மீண்டும் 11  ஆண்டுகளுக்கு இணைந்து நடிக்க உள்ளனர். சன் டிவியில் விரைவில் ஒளிபரப்பாக இருக்கும் புதிய தொடர் 'லட்சுமி'. இந்த சீரியலின்  ஹீரோவாக நடிகர் சஞ்சீவ் நடிக்க அவருக்கு ஜோடியாக 'தென்றல்' சீரியல் மூலம் பிரபலமான ஸ்ருதி ராஜ் நடிக்கிறார். சில நாட்களாக இந்த சீரியலின் ப்ரோமோ வெளியாகி ரசிகர்களின் ஆர்வத்தை அதிகரித்துள்ளது. குடும்பம் சார்ந்த செண்டிமெண்ட் சீரியலாக இந்த கதை உருவாகியுள்ளதால் இது சின்னத்திரை ரசிகர்கள் மத்தியில் நல்ல ஒரு வரவேற்பை பெரும் என எதிர்பார்க்கப்படுகிறது. 

குடும்பத்திற்காகவும், தங்கைகளின் எதிர்காலத்திற்காகவும் பாடுபடும் பெண்ணாக ஸ்ருதி நடித்துள்ளார். திருமணத்திற்கு பிறகும் தன்னுடைய குடும்பத்தை அவர் தான் பார்த்துக்கொள்ள வேண்டும். அதனால் வரப்போகும் கணவர் ஸ்ருதிக்கு ஆதரவாக இருப்பவராக இருந்தால் மட்டுமே திருமணம் செய்து கொள்வேன் என தன்னுடைய விருப்பத்தை தெரிவிக்கிறார். 

மறுபக்கம் சஞ்சீவுக்கு வரன் தேடும் அவரின் அம்மா வரப்போகும் மருமகள் நிறைய நகையுடனும், மாதத்தின் முதல் நாள் சம்பள பணத்தைக் கொண்டு அவரிடமும் கொடுக்க வேண்டும் என விரும்புகிறார். இப்படி சஞ்சீவ் வீட்டில் இருக்கும் ஒவ்வொருவருக்கும் வீட்டுக்கு வரப்போகும் மருமகள் இப்படி இருக்க வேண்டும், அப்படி இருக்க வேண்டும் என ஒவ்வொருவரும் ஏராளமான எதிர்பார்ப்புகளுடன் இருக்கிறார்கள். 

இவர்கள் இருவரையும் கடவுள் சேர்த்து வைப்பதுபோல, சாமிக்கு சாத்தப்பட்ட மாலை சஞ்சீவ் - ஸ்ருதி இருவரின் கழுத்திலும் ஒன்றாக சேர்ந்து விழுகிறது. இப்படியாக வெளியான ப்ரோமோ ரசிகர்கள் மத்தியில் நல்ல வரவேற்பை பெற்றுள்ளது.