மாநாடு பார்த்துவிட்டு தயாரிப்பாளருக்கு போன் செய்த சூப்பர் ஸ்டார்! இது ரஜினியின் ரிவியூ.!

மாநாடு படத்தை பார்த்துவிட்டு நடிகர் ரஜினிகாந்த் படத்தின் தயாரிப்பாளர் சுரேஷ் காமாட்சியை அழைத்து பாராட்டியுள்ளார்.

மாநாடு

மாநாடு படத்தை பார்த்துவிட்டு நடிகர் ரஜினிகாந்த் படத்தின் தயாரிப்பாளர் சுரேஷ் காமாட்சியை அழைத்து பாராட்டியுள்ளார். இதனை அவர் தனது ட்விட்டர் பக்கத்தில் குறிப்பிட்டுள்ளார். அந்தப் பதிவில், “இனிய நாளாக அமைந்துவிட்டது இந்நாள். சூப்பர் ஸ்டாரின் அழைப்பும் பாராட்டும் இந்தப்படத்தின் வெற்றியை உறுதிசெய்திருக்கிறது. நல்லதைத் தேடி பாராட்டும் இம்மனசே இன்னும் உங்களை உச்ச சிம்மாசனத்தில் உயர்த்தி வைத்திருக்கிறது. மிகுந்த பலம் பெற்றோம். ஒட்டுமொத்த படக்குழு சார்பாக நன்றியைத் தெரிவித்துக் கொள்கிறேன்..மிக்க நன்றி சார்” என்று பதிவிட்டுள்ளார்

🙏❤️⁦@rajinikanth⁩ pic.twitter.com/JnBcHZyh3z

— sureshkamatchi (@sureshkamatchi) November 26, 2021

 

முன்னதாக, சிம்பு நடிப்பில் வெங்கட் பிரபு இயக்கியிருக்கும் படம் மாநாடு. சுரேஷ் காமாட்சி தயாரித்திருக்கும் இப்படம் தீபாவளிக்கு வெளியாகும் என அறிவிக்கப்பட்டு பின்னர் 25ஆம் தேதி ரிலீஸ் ஆகுமென அறிவிக்கப்பட்டது. இதற்கிடையே மாநாடு பாடல் வெளியீட்டு விழாவில் பேசிய சிம்பு எனக்கு நிறைய பிரச்சனைகள் கொடுக்கிறார்கள். பிரச்சனைகளை நான் பார்த்துக்கொள்கிறேன் என்னை நீங்கள் பார்த்துக்கொள்ளுங்கள் என உருக்கமாக வேண்டுகோள் வைத்திருந்தார். 

இப்படிப்பட்ட சூழலில், திரையரங்குகள், மார்க்கெட், பள்ளிகள், கல்லூரிகள் உள்ளிட்ட பொது இடங்களுக்குள் நுழைய கொரோனா தடுப்பூசி செலுத்திக்கொண்டதற்கான சான்றிதழ் இருந்தால் மட்டுமே அனுமதி என்ற புதிய விதிமுறையைத் தமிழ்நாடு சுகாதாரத் துறை சமீபத்தில் அமல்படுத்தியது. தமிழ்நாடு அரசின் இந்த அறிவிப்புக்கு மாநாடு திரைப்பட தயாரிப்பாளர் சுரேஷ் காமாட்சி எதிர்ப்பு தெரிவித்தார்.

இந்நிலையில் படம் வெளியாவதற்கு முன் தினம் படத்தின் தயாரிப்பாளர் சுரேஷ் காமாட்சி படம் வெளியாகாது என அறிவித்தார். இது ரசிகர்களிடையே சோகத்தை ஏற்படுத்தியது. மீண்டும் பிரச்னை சரிசெய்யப்பட்டு படம் ரிலீஸ் ஆகும் என சொல்லப்பட்டது. ஆனாலும் காலை 5 மணி காட்சி ரத்து செய்யப்பட்டது. அதனைத் தொடர்ந்து ரிலீஸ் செய்யப்பட்ட தற்போது மக்கள் மத்தியில் ஏகோபித்த வரவேற்பை பெற்று வருகிறது. தமிழ்நாடு அளவில் மட்டும் படம் வெளியான அன்றைய தினம் மட்டும் 6.37 கோடி வசுல் செய்துள்ளதாக கூறப்படுகிறது.

சிங்கப்பூரில் வெளியான புதுப்படங்களில் பாக்ஸ் ஆபிஸ் கலெக்சனில் மாநாடு படம் முதலிடத்தை பிடித்துள்ளதாகவும் மலேசியாவில் வெளியான டாப் 10 படங்களில் மாநாடு படம் 2 வது இடத்தை பிடித்துள்ளதாகவும் சொல்லப்படுகிறது. இதுமட்டுமன்றி தமிழ்நாடு, மலேசியா, சிங்கப்பூர் ஆகிய இடங்களில் நல்ல வரவேற்பை பெற்ற மாநாடு திரைப்படம் கேரளாவிலும் வெளியாகி உள்ளது.