Veeran: சூப்பர் ஹீரோ கதைக்களத்துடன் ரிலீசாகும் ‘வீரன்’ .. தமிழில் இதுவரை வெளியான சூப்பர் ஹீரோ படங்களின் நிலை என்ன தெரியுமா?

தமிழ் சினிமாவில் மீண்டும் ஒரு சூப்பர் ஹீரோ படமாக “வீரன்” படம் வெளியாகவுள்ள நிலையில், இதுவரை தமிழ் சினிமாவில் எடுக்கப்பட்ட சூப்பர் ஹீரோ வகையிலான படங்களை காணலாம். 

தமிழ் சினிமாவில் சூப்பர் ஹீரோ படங்கள்

தமிழ் சினிமாவில் மீண்டும் ஒரு சூப்பர் ஹீரோ படமாக “வீரன்” படம் வெளியாகவுள்ள நிலையில், இதுவரை தமிழ் சினிமாவில் எடுக்கப்பட்ட சூப்பர் ஹீரோ வகையிலான படங்களை காணலாம். 

தமிழ் சினிமாவை பொறுத்தவரை கதாநாயகர்கள் என்றாலே சூப்பர் பவர்களை கொண்ட  ஹீரோக்களாக காட்டப்படுவார்கள். அவர்கள் மற்றவர்களை விட பலம் அதிகம், திறமையானவர்கள் என்பது எழுதப்படாத விதி. ஆனால் ஹாலிவுட் படங்களில் வருவது போல சமூகத்தை காப்பாற்றும் சூப்பர் ஹீரோ படமெல்லாம் தமிழ் சினிமாவில் எப்போதாவது தான் வரும். அந்த வகையில் கடந்த காலங்களில் வெளியான படங்களும் அவற்றின் விமர்சனங்களையும் காணலாம்.

கந்தசாமி

சூப்பர் ஹீரோ படங்களுக்கு முன்னோடி என “கந்தசாமி” படத்தை சொல்லலாம். 2009 ஆம் ஆண்டில் வெளியான இப்படத்தில் முதலில் ஜெயம் ரவி நடிப்பதாக இருந்தது. பின்னர் விக்ரம் ஹீரோவாக நடித்தார். தாணு தயாரித்த இப்படத்தை சுசு கணேசன் இயக்கியிருந்தார். மேலும் இந்த படத்தில் ஸ்ரேயா ஹீரோயினாக நடிக்க தேவி ஸ்ரீ பிரசாத் இசையமைத்தார். பணக்காரர்களிடம் இருந்த கருப்பு பணத்தை கொள்ளையடித்து அதனை ஏழை மக்களுக்கு கொடுக்கும் பழைய கதையை சூப்பர் ஹீரோ ஸ்டைலில் பெரும் பொருட்செலவில் உருவாக்கியிருந்தார்கள். ஆனால் படம் பெரிய அளவில் வெற்றி பெறவில்லை. 

முகமூடி 

வித்தியாசமான கதைகளை உணர்வுப்பூர்வமாக இயக்கும் மிஷ்கின் இயக்கத்தில் 2012 ஆம் ஆண்டு வெளியான படம் “முகமூடி”. ஜீவா, பூஜா ஹெக்டே, நரேன், செல்வா,நாசர், கிர்ஷ் கர்னாட், அனுபமா குமார், ஆடுகளம் நரேன் உள்ளிட்ட பலரும் இப்படத்தில் நடித்திருந்தனர். கே இசையமைத்த இப்படம் பெரும் எதிர்பார்ப்புகளுடன் வெளியாகியது. ஆனால் திரைக்கதை சொதப்பிய காரணத்தால் இப்படம் படுதோல்வி அடைந்தது. 

ஹீரோ

அடுத்ததாக சூப்பர் ஹீரோ கேரக்டராக சிவகார்த்திகேயன் மாறினார். 2019 ஆம் ஆண்டில் வெளியான இப்படத்தை பி.எஸ்.மித்ரன் இயக்கினார். கல்யாணி பிரியதர்ஷன் ஹீரோயினாக தமிழில் அறிமுகமாகி இருந்தார். இந்த படம் ரசிகர்களை பெரியளவில் கவரவில்லை. சூப்பர் ஹீரோ படத்தை ஹாலிவுட் ரேஞ்சுக்கு ரசிகர்கள் எதிர்பார்க்கும் நிலையில் திரைக்கதை சொதப்பல்கள் காரணமாக படம் வெற்றியடையவில்லை. 

வீரன்

இந்த வகையில் இசையமைப்பாளரும், நடிகருமான ஹிப்ஹாப் ஆதி நடித்துள்ள படம் “வீரன்”. இந்த படத்தை ‘மரகத நாணயம்’ படத்தை இயக்கிய ஏஆர்கே சரவணன் இயக்கியுள்ளார். இந்த படத்தில் நடிகை ஆதிரா,காளி வெங்கட், முனீஸ்காந்த், வினய் உள்ளிட்ட பலரும் நடித்துள்ளனர். இந்த படம் வரும் ஜூன் 2 ஆம் தேதி வெளியாகி வருகிறது. இந்த படத்தை தமிழ் சினிமாவின் சூப்பர் ஹீரோ படம் என ஹிப்ஹாப் ஆதி குறிப்பிட்டுள்ளார். இந்த படத்தின் ட்ரெய்லர் ரசிகர்களை கவர்ந்துள்ள நிலையில், சூப்பர் ஹீரோ படம் என்றாலே தமிழில் தோல்வி தான் என்ற நிலைமையை மாற்றும் என எதிர்பார்க்கப்படுகிறது.