மோகன்லால் - லிஜோ ஜோஸ் கூட்டணி சேர்ந்துள்ள ’மலைக்கோட்டை வாலிபன்’... ஃபர்ஸ்ட் லுக் செய்த சாதனை!

மோகன் லால் ஆக்ரோஷமாக கயிறு ஒன்றைத் தாங்கிப் பிடித்து இழுத்தபடி ஃபர்ஸ்ட்லுக்கில் இருந்த நிலையில், ரசிகர்களின் கவனத்தை ஈர்த்து இணையத்தில் வைரலானது.

மலைக்கோட்டை வாலிபன் மோகன் லால், லிஜோ ஜோஸ் பெல்லிசேரி

பிரபல மலையாள இயக்குநர் லிஜோ ஜோஸ் பெல்லிசேரி இயக்கத்தில் மோகன் லால் நடிக்கும் ’மலைக்கோட்டை வாலிபன்’ படத்தின் ஃபர்ஸ்ட் லுக் போஸ்டர் புதிய சாதனை ஒன்றை படைத்துள்ளது.

லிஜோ ஜோஸ் பெல்லிசேரி

மலையாளத்தில் குறிப்பிடத்தக்க மற்றும் சினிமா ரசிகர்களில் கவனிக்கப்படும் இயக்குநர்களில் ஒருவராக வலம் வருபவர் லிஜோ ஜோஸ் பெல்லிசேரி. 

மலையாள திரையுலகம் தாண்டி இவருக்கென தனி ரசிகர் பட்டாளம் உள்ளது. நாயகன் எனும் மலையாளப் படத்தின் மூலம் மலையாளத் திரையுலகில் அடி எடுத்து வைத்த லிஜோ ஜோஸ் பெல்லிசேரி, பிருத்விராஜ் நடித்த ‘சிட்டி ஆஃப் காட்’, ஃபஹத் ஃபாசில் நடித்த  ‘ஆமென்’ படங்களின் மூலம் பெரும் கவனமீர்த்தார்.

அங்கமாலி டைரிஸ்

தொடர்ந்து 2017ஆம் ஆண்டு இவர் இயக்கிய ‘அங்கமாலி டைரிஸ்’ நாடு முழுவதும் கவனமீர்த்து இவருக்கென தனி சினிமா ரசிகர் பட்டாளத்தைப் பெற்றுத் தந்தது. மேலும் அங்கமாலி டைரிஸ் படம் மலையாள சினிமாவின் கல்க் க்ளாசிக்குகளில் ஒன்றாக தொடர்ந்து கொண்டாடப்பட்டு வருகிறது.

தொடர்ந்து ஈமாயு, ஜல்லிக்கட்டு, சுருளி உள்ளிட்ட படங்களை இயக்கி கவனமீர்த்த லிஜோ ஜோஸ் பெல்லிசேரி, முன்னதாக மலையாள உச்ச நட்சத்திரங்களில் ஒருவரான மம்மூட்டியுடன் இணைந்து ரசிகர்களுக்கு சர்ப்ரைஸ் விருந்து அளித்தார்.

மம்மூட்டியுடன் கூட்டணி

இவர்கள் கூட்டணியில் இந்த ஆண்டு ஜனவரி மாதம் வெளியான நண்பகல் நேரத்து மயக்கம் திரைப்படம், திரையரங்குகளில் எதிர்பார்த்த வரவேற்பைப் பெறாவிட்டாலும் நெட்ஃப்ளிக்ஸ் ஓடிடி தளத்தில் வெளியாகி இணையத்தில் பேசுபொருளாகி பாராட்டுகளைக் குவித்தது.

இந்நிலையில் அடுத்ததாக மற்றொரு மலையாள உச்ச நட்சத்திரமான மோகன்லால் உடன் லிஜோ ஜோஸ் கைக்கோர்த்துள்ளார்.

மோகன்லாலுடன் கூட்டணி

மலைக்கோட்டை வாலிபன் என இந்தப் படத்துக்கு பெயரிடப்பட்டுள்ள நிலையில், சரித்திரப் பின்னணியில் இந்தப் படம் உருவாவதாகவும் தெரிவிக்கப்பட்டுள்ளது. சோனாலி குல்கர்னி உள்ளிட்ட பலர் மோகன்லாலுடன் இந்தப் படத்தில் நடிக்கின்றனர். மலையாளம் தவிர்த்து தமிழ், தெலுங்கு, இந்தி உள்ளிட்ட மொழிகளில் இந்தப் படம் வெளியாகிறது.

இந்நிலையில் முன்னதாக இந்தப் படத்தின் ஃபர்ஸ்ட் லுக் போஸ்டர் இணையத்தில் ஏப்.14 வெளியாகி கவனமீர்த்து லைஸ் அள்ளியது. நடிகர் மோகன் லால் ஆக்ரோஷமாக கயிறு ஒன்றைத் தாங்கிப் பிடித்து இழுத்தபடி இந்த ஃபர்ஸ்ட்லுக்கில் இருந்த நிலையில், ரசிகர்களின் கவனத்தை ஈர்த்து இணையத்தில் வைரலானது.

இந்நிலையில், மலையாளத் திரையுலகில் 24 மணிநேரத்தில் அதிக ரீட்வீட் செய்யப்பட்ட முதல் ஃபர்ஸ்ட் லுக் புகைப்படம் எனும் சாதனையை மலைக்கோட்டை வாலிபன் படைத்துள்ளது. 

24 மணி நேரத்தில் இந்த போஸ்டர் 10.7ஆயிரம் ரீட்வீட்களைப் பெற்றுள்ள நிலையில், இதனை மோகன்லால் ரசிகர்கள் கொண்டாடி வருகின்றனர். கடந்த ஜனவரி மாதம் ராஜஸ்தான் மாநிலம், ஜெய்சால்மரில் இந்தப் படத்தின் படப்பிடிப்பு தொடங்கி நடைபெற்று வருவது குறிப்பிடத்தக்கது.