John Kokken: நான் ஹீரோவாக நடிக்கும் ஒரே கதை... மகனுடன் ஃபோட்டோ பகிர்ந்த ’வேம்புலி’ ஜான் கொக்கன்!

குழந்தைக்கு கியான் கொக்கன் எனப் பெயரிட்ட ஜான், ”எங்கள் இதயங்களையும் வாழ்வையும் மகிழ்ச்சியால் நிரப்ப குட்டிப் பையன் வந்துவிட்டான்” என நெகிழ்ச்சியுடன் பதிவிட்டிருந்தார்.

மகனுடன் ஜான் கொக்கன்

பிரபல வில்லன் நடிகர் ஜான் கொக்கன் தனது குழந்தையின் புகைப்படத்தை முதன்முறையாக தன் சமூக வலைதளப் பக்கத்தில் பகிர்ந்துள்ளார்.

வேம்புலி:

நடிகர் ஜான் கொக்கன் - நடிகை பூஜா ராமச்சந்திரன் இருவருக்கும் கடந்த ஏப்.29ஆம் தேதி ஆண் குழந்தை பிறந்தது. பாகுபலி தொடங்கி, சார்பட்டா பரம்பரை, துணிவு ஆகிய படங்களில் வில்லனாக நடித்து கவனமீர்த்தவர் மலையாள நடிகர் ஜான் கொக்கன்.

இவரது மனைவி பூஜா தொலைக்காட்சியில் விஜேவாகத் தொடங்கி படிப்படியாக நடிகையாக வளர்ந்து கவனமீர்த்தவர் ஆவார். கடந்த 2019ஆம் ஆண்டு ஜான் கொக்கனும் பூஜாவும் திருமணம் செய்துகொண்ட நிலையில், இருவரும் தொடர்ந்து இணையத்தில் தங்கள்  புகைப்படங்களைப் பதிவிட்டு பலரது ஆதர்ச ஜோடியாக உருவெடுத்தனர்.

ஆண் குழந்தை:

இருவருக்கும் இது இரண்டாம் திருமணம் எனும் நிலையில், பல மனக்கசப்புகளைத் தாண்டி வந்து இருவரும் வாழ்க்கையில் சரியான துணைவரைத் தேர்தெடுத்து மகிழ்ச்சியான வாழ்க்கையை வாழ்ந்து வந்த நிலையில், தாங்கள் பெற்றோராகவிருப்பதாக முன்னதாக ஜான் - பூஜா தம்பதி இணையத்தில் தெரிவித்தனர். 

தொடர்ந்து வளைகாப்பு புகைப்படங்கள், கர்ப்ப கால புகைப்படங்களை இந்த ஜோடி பகிர்ந்து வந்த நிலையில், கடந்த ஏப்.29ஆம் தேதி இவர்களுக்கு ஆண் குழந்தை பிறந்தது. மேலும் தங்கள் குழந்தைக்கு கியான் கொக்கன் எனப் பெயரிட்ட ஜான், “எங்கள் இதயங்களையும் வாழ்வையும் மகிழ்ச்சியால் நிரப்ப குட்டிப் பையன் வந்துவிட்டான்” என நெகிழ்ச்சியுடன் பதிவிட்டிருந்தார்.

ஹீரோ:

இந்நிலையில் இன்று முதன்முறையாக தன் குழந்தையுன் புகைப்படத்தை ஜான் கொக்கன் தன் சமூக வலைதளப் பக்கத்தில் பகிர்ந்துள்ளார்.  “மற்ற எல்லா கதைகளிலும் நான் வில்லன் தான். ஆனால் என் மகனுக்காக இந்தக் கதையில் தான் ஹீரோவாக நடிக்கும் வாய்ப்பை நான் பெற்றுள்ளேன்” என நெகிழ்ச்சியுடன் பதிவிட்டுள்ளார். 

2021ஆம் ஆண்டு இயக்குநர் பா.ரஞ்சித்தின் இயக்கத்தில் வெளியான ‘சார்பட்டா பரம்பரை’ படத்தில் வேம்புலி எனும் கதாபாத்திரத்தில் நடித்து  ஜான் கொக்கன் முன்னதாக கோலிவுட்டில் பல ரசிகர்கள சம்பாதித்தார். அதன் தொடர்ச்சியாக இந்த ஆண்டு பொங்கல் வெளியீடாக ரிலீசான துணிவு படத்தில் கோலிவுட்டின் உச்ச நட்சத்திரங்களில் ஒருவரான நடிகர் அஜித்துக்கு வில்லனாக உருவெடுத்து ஜான் கொக்கன் லைக்ஸ் அள்ளினார்.

மேலும் இறுதியாக கப்ஸா, வீர சிம்ஹா ரெட்டி படங்களிலும் வில்லனாக ஜான் கொக்கன் தோன்றியது குறிப்பிடத்தக்கது.

மேலும் படிக்க: Manobala: "வெளிய சொல்ல முடியாத சேட்டை.. அழாமல் பேசுவது ரொம்ப சிரமம்.." மனோபாலா நினைவால் உருகிய மன்சூர், டெல்லி கணேஷ்..!