Iraivan: இதயம் பலகீனமானவங்க ஜாக்கிரதை.. ஜெயம் ரவியின் இறைவன் படத்துக்கு ஏ சான்றிதழ்.. இதுதான் காரணம்!

ராட்சசன், போர் தொழில் போன்ற படங்களின் வரிசையில் இறைவன் படம் இருக்கும் என்று ட்ரெய்லரை வைத்து தெரிந்துகொள்ள முடிகிறது.

இறைவன், சந்திரமுகி 2 . image source: twitter

ஜெயம் ரவி நடித்திருக்கும் இறைவன் திரைப்படத்திற்கு ஏ சான்றிதழும் ராகவா லாரன்ஸ் நடித்திருக்கும் சந்திரமுகி திரைப்படத்துக்கு யு/ ஏ சான்றிதழும் வழங்கியுள்ளது சென்சார் வாரியம்.

இறைவன்

ஜெயம் ரவி - நயன்தாரா நடித்திருக்கும் இறைவன் திரைப்படம் வருகின்ற செப்டம்பர் 28 ஆம் தேதி வெளியாக இருக்கிறது. என்றென்றும் புன்னகை, மனிதன் உள்ளிட்ட படங்களை இயக்கிய ஐ அகமத் இந்தப் படத்தை இயக்கியுள்ளார். யுவன் ஷங்கர் ராஜா இசையமைத்துள்ளார்.

தனி ஒருவன் திரைப்படத்துக்கு பிறகு ஜெயம் ரவி - நயன்தாரா இரண்டாவது முறையாக இந்தப் படத்தில் இணைந்துள்ளார்கள். ராகுல் போஸ், ஆஷிஷ் வித்யார்த்தி, நரேன், சார்லி, அழகம் பெருமாள், பகவதி பெருமாள், விஜயலட்சுமி, மற்றும் வினோத் கிஷன் உள்ளிட்டவர்கள் இந்தப் படத்தில் நடித்துள்ளார்கள். சைக்கோ த்ரில்லர் ஜானரில் சமீபத்தில் வெளியான இந்தப் படத்தின் ட்ரெய்லர் ரசிகர்களிடையே நல்ல வரவேற்பைப் பெற்றுள்ளது.

ஏ சான்றிதல்

#Iraivan Censored - A certificate
Run Time : 2 hours 33 minutes
Release Date : Sep 28 pic.twitter.com/S4EdE3738z

— Sreedhar Pillai (@sri50) September 22, 2023

இறைவன் திரைப்படத்தில் ஜெயம் ரவி காவல் அதிகாரியாக நடித்துள்ளார். ராகுல் போஸ் 12 பெண்களை கொடூரமாக கொலை செய்த சைக்கோ கொலைகாரனாக நடித்துள்ளார். அவரைக் கண்டுபிடிக்கும் வேட்டையில் ஈடுபடுகிறார் ஜெயம் ரவி. சமீபத்தில் வெளியான இந்தப் படத்தின் ட்ரெய்லரிர் கொடூரமாக கொலை செய்யும் காட்சிகளும் நிர்வாணக் காட்சிகளும் இடம்பெற்றிருந்தன.

ராட்சசன், போர் தொழில் போன்ற படங்களின் வரிசையில் இறைவன் படம் இருக்கும் என்று ட்ரெய்லரை வைத்து தெரிந்துகொள்ள முடிகிறது. மொத்தம் 2 மணி நேரம் 33 நிமிடங்களுக்கு இப்படத்தின் ரன்னிங் டைம் இருக்கும் என்று தெரிவிக்கப்படுகிறது. மேலும் அதீத வன்முறைக் காட்சிகளின் காரணமாக இந்தப் படத்திற்கு ஏ சான்றிதழை வழங்கியுள்ளது சென்சார் வாரியம்.

முன்னதாக ஜெயம் ரவி நடித்து ஏ சான்றிதழ் வாங்கிய ஒரே படம் அமீர் இயக்கத்தில் வெளிவந்த ஆதிபகவன். தற்போது இரண்டாவது முறையாக இறைவன் படம் ஏ சான்றிதழைப் பெற்றுள்ளது குறிப்பிடத் தக்கது.

சந்திரமுகி 2

அதே நேரத்தில் ராகவா லாரன்ஸ், கங்கனா ரனாவத், வடிவேலு நடித்து பி.வாசு இயக்கியிருக்கும் சந்திரமுகி திரைப்படத்திற்கு யு/ஏ சான்றிதல் வழங்கப்பட்டுள்ளது.  கடந்த செப்டம்பர் 15 ஆம் தேதி வெளியாக இருந்த இந்தப் படத்தின் ரிலீஸ் ஒத்திவைக்கப்பட்டு, தற்போது செப்டம்பர் 28ஆம் தேதி வெளியாக இருக்கிறது.

தனி ஒருவன் 2 

ஜெயம் ரவி, நயன்தாரா மூன்றாவது முறையாக இணைய இருக்கும் மற்றொரு படம் தனி ஒருவன் 2. கடந்த 2015 ஆம் ஆண்டு மோகன் ராஜா இயக்கிய தனி ஒருவன் திரைப்படத்தின் வெற்றியைத் தொடர்ந்து தற்போது அதன் இரண்டாம் பாகத்தை எடுக்க முடிவு செய்துள்ளார்கள்.

சமீபத்தில் இந்தப் படத்தின் அறிவிப்பு வீடியோ ஒன்றை வெளியிட்டது படக்குழு. முந்தைய பாகத்தில் அரவிந்த் சாமி வில்லனாக நடித்து மிகப்பெரிய ரசிக கவனத்தைப் பெற்ற நிலையில், இரண்டாம் பாகத்தில் வில்லனாக நடிக்கப் போவது யார் என்கிற தகவல் இன்னும் வெளியிடப்படாமல் இருக்கிறது. விஜய் சேதுபதி அல்லது ஃபகத் ஃபாசில் இந்தப் படத்தில் வில்லனாக நடிக்க வாய்ப்புள்ளதாகவும் கூறப்படுகிறது.