Daniel Radcliffe: என்னது இவ்ளோ வயசு ஆகிடுச்சா? அப்பாவானார் ஹாரி பாட்டர்.. வாழ்த்துக்களை குவிக்கும் ரசிகர்கள்!

Daniel Radcliffe: மாயாஜால ரசிகர்களுக்கு பிடித்த ஹேரி பாட்டர் படங்களின் நாயகன் டேனியல் ராட்க்ளிஃப்பிற்கு குழந்தை பிறந்துள்ளதாக தகவல் வெளியாகியுள்ளது.

அப்பாவான டேனியல் ராட்க்ளிஃப்

90’ஸ் குழந்தைகளுக்கு மிகவும் பிடித்த மாயாஜால படங்களுள் ஹேரி பாட்டர் படங்களும் அடங்கும். இதில், ஹீரோவாக நடித்துள்ளவரின் இயற்பெயர் கூட சில பேருக்கு தெரியாது. அந்த அளவிற்கு ஹேரி பாட்டராக பலரது மனங்களில் பதிந்தவர், டேனியல் ராட்க்ளிஃப். குழந்தையாக இருந்தது முதல் பருவ வயது வரை அனைத்து ஹேரி பாட்டர் படங்களிலும் ஹீரோவாக நடித்த இவர், பின்னாளில் வெவ்வேறு கதையம்சங்கள் கொண்ட ஹாலிவுட் படங்களிலும் நடிக்க ஆரம்பித்தார். 

அப்பாவான டேனியல்!

டேனியலும், எரின் டார்கே என்ற பிரபல அமெரிக்க நடிகையும் 2012ஆம் ஆண்டு முதல் காதலித்து வருகின்றனர். பல பட நிகழ்ச்சிகளுக்கும் விருது நிகழ்ச்சிகளுக்கும் இருவரும் ஒன்றாகவே வந்து செல்வர். இவர்கள், வெகு விரைவில் திருமணம் செய்து கொள்ள உள்ளதாக அவ்வப்போது தகவல்கள் பரவிய வண்ணம் இருந்தன. இதையடுத்து, எரின் கர்ப்பமாக உள்ளதாக சில நாட்களுக்கு முன்பு தகவல்கள் பரவின. இந்த தகவல்களை, அவர்களது உதவியாளர்கள் உறுதிப்படுத்தினர். இதையடுத்து, டேனியல் ராட்க்ளிஃப்ற்கு குழந்தை பிறந்துள்ளதாக தகவல்கள் வெளியாகியுள்ளன. டேனியல், தனது குழந்தையை தள்ளு வண்டியில் வைத்து எடுத்து சென்ற புகைப்படங்கள் சில இணையத்தில் இப்போது வைரலாகி வருகின்றன. 

மகிழ்ச்சியில் ரசிகர்கள்:

டேனியலை இன்னமும் குழந்தையாக ஹேரி பாட்டர் படத்தில் கண்டு ரசித்து வரும் ரசிகர்கள், அவருக்கு குழந்தை பிறந்து விட்டது என்ற செய்தியை நம்ப முடியவில்லை என சமூக வலை தளங்களில் தங்களது கருத்துகளை தெரிவித்து வருகின்றனர். மேலும், டேனியல் மற்றும் அவரது காதலி எரினிற்கு பலரும் வாழ்த்துகளை தெரிவித்து வருகின்றனர். 

விரைவில் ஹேரி பாட்டர் தொடர்:

சில நாட்களுக்கு முன்னர், ஹேரி பாட்டர் கதைகள் சீசன்கள் அடங்கிய தொடர்களாக வெளிவரும் என்ற அறிவிப்பு வெளியானது. புது நடிகர்களுடனும், காலத்திற்கு ஏற்ற மாதிரியான கதையம்சத்தையும் கொண்டு இந்த தொடர் உருவாகவுள்ளது. புத்தகங்களை திரைப்படங்களாக எடுக்கையில், கதையின் சில அம்சங்கள் கத்தரிக்கப்பட்டதாகவும் அதனால் ரசிகர்களுக்கு விருந்தளிக்கும் வகையில் ஹேரி பாட்டர் கதைகளை தொடராக எடுக்கவுள்ளதாகவும் கூறப்படுகிறது. ஹேரி பாட்டராக முன்னர் நடித்து வந்த டேனியல் ராட்க்ளிஃப் இந்த தொடரில் நடிக்கப்போவது இல்லை என தகவல்கள் வெளியாகியுள்ளன. இருப்பினும், முக்கிய கதாப்பாத்திரங்களாக நடித்த எம்மா வாட்சன், ரூபர்ட் க்ரிண்ட் ஆகியோரை கெஸ்ட் ரோலில் நடிக்க வைக்க பேச்சு வார்த்தைகள்ள நடைப்பெற்று வருவதாக ஹாலிவுட் வட்டாரங்களில் செய்திகள் பரவி வருகின்றன.