கேரளாவில் வசூல் வேட்டை நடத்தும் ‘DC’.. இந்த ஆண்டு வெளியான தமிழ் படங்களில் புதிய சாதனை
கேரளாவில் தொடர்ந்து வசூல் குவித்து வரும் ‘DC’ திரைப்படம், இந்த ஆண்டு வெளியான தமிழ் படங்களில் அதிக வசூல் செய்த படமாக சாதனை படைத்துள்ளது.
லோகேஷ் கனகராஜ் நடிப்பில் அருண் மாதேஸ்வரன் இயக்கிய ‘DC’ திரைப்படம் வெளியான இரண்டாவது வாரத்திலும் பாக்ஸ் ஆபிஸில் வலுவான நிலையில் தொடர்கிறது. குறிப்பாக கேரளாவில் படத்திற்கான திரையரங்கு வரவேற்பு தொடர்ந்து நீடித்து வருவதுடன், ஓணம் பண்டிகையை முன்னிட்டு புதிய படங்கள் வெளியாகும் சூழலிலும் ‘DC’ படத்துக்கு திரையரங்குகள் ஒதுக்கப்பட்டு வருகின்றன.
லோகேஷ் கனகராஜ் கதாநாயகனாக அறிமுகமான ‘DC’ படத்தில் அவருக்கு ஜோடியாக வாமிகா கபி நடித்துள்ளார். சஞ்சனா கிருஷ்ணமூர்த்தி உள்ளிட்டோரும் முக்கிய கதாபாத்திரங்களில் நடித்துள்ளனர். அருண் மாதேஸ்வரன் இயக்கியுள்ள இப்படத்திற்கு அனிருத் இசையமைத்துள்ளார். வெளியானது முதல் இந்தியாவின் பல்வேறு பகுதிகளிலும், வெளிநாட்டு சந்தைகளிலும் படம் சிறப்பான வசூல் செய்து வருகிறது. பத்தாவது நாள் முடிவில் இப்படத்தின் உலகளாவிய வசூல் ரூ.84 கோடியை கடந்துள்ளதாக பாக்ஸ் ஆபிஸ் தகவல்கள் தெரிவிக்கின்றன.
‘DC’ தமிழ்நாடு வசூல்
தமிழ்நாட்டிலும் படத்தின் வசூல் தொடர்ந்து அதிகரித்து வருகிறது. ஒன்பதாவது நாளில் மட்டும் இந்தியாவில் ரூ.5.50 கோடி நிகர வசூலை ஈட்டிய ‘DC’, இந்திய அளவில் ரூ.50 கோடி வசூல் என்ற மைல்கல்லையும் கடந்தது. அதே நாளில் உலகளாவிய வசூல் ரூ.78.10 கோடியாக இருந்த நிலையில், பத்தாவது நாளில் மேலும் ரூ.4.50 கோடி வசூல் சேர்ந்து மொத்த வசூல் ரூ.84 கோடியை கடந்துள்ளது.
கேரளாவில் வசூல் வேட்டை
இதில் கேரளாவின் பங்களிப்பு முக்கியமானதாக அமைந்துள்ளது. பத்தாவது நாளை நெருங்கிய நிலையில் கேரளாவில் மட்டும் ‘DC’ திரைப்படம் ரூ.16.5 கோடி வசூல் செய்துள்ளதாக வெளியாகியுள்ள தகவல் தெரிவிக்கிறது. இதன் மூலம் 2026-ம் ஆண்டில் கேரளாவில் அதிக வசூல் செய்த தமிழ் திரைப்படமாக ‘DC’ முன்னிலை பெற்றுள்ளது. கேரளாவில் படத்தின் வசூல் தொடர்ந்து அதிகரித்து வருவதால், அதன் திரையரங்கு பயணமும் நீடித்து வருகிறது.
கேரளாவில் ஓணம் பண்டிகை காலம் மலையாள சினிமாவுக்கு மிகவும் முக்கியமான வசூல் காலமாக பார்க்கப்படுகிறது. இந்த காலகட்டத்தில் பல புதிய திரைப்படங்கள் திரையரங்குகளில் வெளியாகும் நிலையில், ஏற்கனவே வெளியாகி இரண்டாவது வாரத்தை கடந்த ‘DC’ தொடர்ந்து திரையரங்குகளில் இடம்பெறுவது கவனம் பெற்றுள்ளது. புதிய வெளியீடுகளின் வருகையையும் தாண்டி பார்வையாளர்களை தக்க வைத்திருப்பதால், கேரளாவில் படத்தின் வசூல் மேலும் அதிகரிக்க வாய்ப்புள்ளது.
இயக்குநராக ஏற்கனவே தனக்கென தனி ரசிகர் வட்டத்தை உருவாக்கியிருந்த லோகேஷ் கனகராஜ், ‘DC’ மூலம் கதாநாயகனாகவும் கவனம் பெற்றுள்ளார். அவரது நடிப்புக்கு கிடைத்த வரவேற்புடன், கேரள பாக்ஸ் ஆபிஸில் கிடைத்துள்ள இந்த வசூல் படத்தின் வெற்றிப் பயணத்திற்கு மேலும் வலு சேர்த்துள்ளது. இரண்டாவது வாரத்திலும் திரையரங்குகளை தக்க வைத்துள்ள நிலையில், ‘DC’ படத்தின் இறுதி வசூல் எவ்வளவு இருக்கும் என்பது தற்போது எதிர்பார்ப்பை ஏற்படுத்தியுள்ளது.
தலைப்பு செய்திகள்
ட்ரெண்டிங் செய்திகள்
