IND vs SL 1st Test: சுருண்ட இலங்கை.. இமாலய இலக்கை நிர்ணயிக்குமா இந்தியா? வெற்றி வசப்படுமா?
இலங்கைக்கு எதிரான டெஸ்ட் போட்டியில் இந்தியா முன்னிலை பெற்றுள்ள நிலையில், இந்தியாவின் வெற்றி வாய்ப்பு பிரகாசமாகியுள்ளது.
இந்தியா - இலங்கை ஆகிய இரு அணிகளும் மோதும் முதல் டெஸ்ட் போட்டி காலே மைதானத்தில் நடந்து வருகிறது. இந்த போட்டியில் முதல் இன்னிங்சில் படிக்கல்லின் அபார சதம், கே.எல்.ராகுலின் அபார அரைசதத்தால் இந்திய அணி 462 ரன்களை எடுத்தது.
திணறிய இலங்கை:
இதையடுத்து, இலங்கை அணி நேற்று தனது முதல் இன்னிங்சைத் தொடங்கியது. ஆட்டத்தை தொடங்கிய இலங்கைக்கு சிராஜ் அதிர்ச்சி அளித்தார். ஃபெர்னாண்டோ ரன் ஏதுமின்றி அவுட்டாக அடுத்து வந்த அனுபவ வீரர் சண்டிமால் 4 ரன்னில் அவுட்டாகினார். மைதானம் சுழலுக்கு ஒத்துழைக்க மானவ் சுதர், குல்தீப் யாதவ், ஜடேஜா சுழல் தாக்குதலைத் தொடர்ந்தனர்.
சண்டிமால் 4 ரன்னிலும், லஹிரு உதாரா 27 ரன்களிலும், மெண்டிஸ் 14 ரன்னிலும் கேப்டன் டி சில்வா 21 ரன்னிலும் அடுத்தடுத்து அவுட்டாகினர். 6வது விக்கெட்டிற்கு சேர்ந்த சோனல் தினுஷா - நிரோஷன் ஜோடி பொறுப்புடன் ஆடியது. இருவரும் அணியை சரிவில் இருந்து மீட்டனர். சிறப்பாக ஆடிய சோனலும், நிரோஷனும் அரைசதம் விளாசினர்.
சோனல் சதம்:
நிரோஷன் சதத்தை நெருங்கிய நிலையில் 80 ரன்களுக்கு அவுட்டாக, அடுத்து வந்த கேஷரா நுவந்தா 2 ரன்னில் அவுட்டாக தனி ஆளாக போராடிய சோனல் தினுஷா சதம் விளாசி அவுட்டானார். இலங்கை அணி 284 ரன்களுக்கு ஆல் அவுட்டானது.
இமாலய இலக்கை நிர்ணயிக்குமா இந்தியா?
இதனால், இந்திய அணி 178 ரன்கள் முன்னிலை பெற்றுள்ளது. இந்திய அணி இன்று தனது 2வது இன்னிங்சை இன்று ஆடுகிறது. இன்னும் இரண்டு நாட்கள் ஆட்டம் எஞ்சியிருப்பதால் இந்திய அணி இன்று அதிரடியாக ஆடி இமாலய இலக்கை நிர்ணயிக்கவே விரும்பும்.
இன்று கடைசி செசனை இலங்கையை ஆட வைக்கவே இந்தியா விரும்பும். இதனால், இன்றைய நாளில் இந்தியா 450க்கு மேல் இலக்கை நிர்ணயிக்கும் என்று எதிர்பார்க்கப்படுகிறது. இந்த போட்டியில் இந்திய அணி வெற்றி பெறுவதற்கான வாய்ப்புகள் பிரகாசமாக உள்ளது.
அதிரடி பேட்டிங்கா?
இந்திய அணியை 2வது இன்னிங்சில் சுருட்டினால் மட்டுமே இலங்கைக்கு வெற்றி வாய்ப்பு இருக்கும். இல்லாவிட்டால் அவர்கள் டிரா செய்யவே போராடுவார்கள். மைதானம் பேட்டிங்கிற்கு நன்கு ஒத்துழைப்பதால் இந்திய அணியை சுருட்டுவது அவர்களுக்கு சவாலாக இருக்கும் என்று கருதப்படுகிறது.
சுதந்திர தினத்தில் தொடங்கிய இந்த போட்டியில் இந்திய அணி வெற்றி பெறுமா? என்று ரசிகர்கள் ஆவலுடன் உள்ளனர்.
தலைப்பு செய்திகள்
ட்ரெண்டிங் செய்திகள்
