7 வருடங்கள் சினிமாவில் இருந்து விலகி இருந்தது ஏன்? காரணத்தை சொன்ன பஹத் பாசில்

சினிமா துறையில் 24 ஆண்டுகளை நிறைவு செய்துள்ள மலையாள நடிகர் பஹத் பாசில் தனது அனுபவங்களை பகிர்ந்து கொண்டார்.

பஹத் பாசில்

Source : twitter

மலையாள சினிமாவின் முன்னணி நாயகர்களில் ஒருவராக திகழும் பஹத் பாசில், தனது சிறந்த நடிப்பாற்றலின் மூலம் தமிழ் ரசிகர்கள் மனதிலும் சிம்மாசனம் போட்டு அமர்ந்திருக்கிறார். 

பஹத் பாசில்:

தமிழில் உலகநாயகன் கமல்ஹாசன் நடிப்பில் வெளியான விக்ரம் மற்றும் சூப்பர்ஸ்டார் ரஜினிகாந்த் நடிப்பில் வெளியான வேட்டையன் ஆகிய திரைப்படங்களில் பஹத் பாசில் ஏற்று நடித்த கதாபாத்திரங்கள் தமிழ் சினிமா ரசிகர்களிடையே பெரும் வரவேற்பை பெற்றது.

அடுத்ததாக மாமன்னன் படத்தில் ரத்தினவேலு என்ற வில்லன் கதாபாத்திரத்தில் நடித்த பஹத் பாசில் தனது சிறந்த நடிப்பாற்றலின் மூலம் அந்த கதாபாத்திரத்திற்கு உயிரோட்டம் கொடுத்தார் என்று சொன்னால் மிகையாகாது.

தொடர்ந்து வித்தியாசமான கதைக்களத்துடன் மலையாளம்  மற்றும் தமிழில் வெளியான ஆவேசம் திரைப்படம் சினிமா ரசிகர்கள் முன் பஹத் பாசிலை மீண்டும் ஒருமுறை தலைசிறந்த நடிகராக முன்னிறுத்தியது என்றே சொல்லலாம். குறிப்பாக ரங்கன் கதாபாத்திரத்தில் அவர் நடித்த பல காட்சிகள் இணையவாசிகள் மத்தியில் ட்ரெண்டானது. 

இந்நிலையில், பிரபல தனியார் யூ டியூப் சேனல் ஒன்றிற்கு பேட்டியளித்த பஹத் பாசில், தனது 24 ஆண்டுகால  சினிமா அனுபவங்களை பகிர்ந்து கொண்டார். 

2002 ஆம் ஆண்டு தனது தந்தை பசில் இயக்கிய படத்தின் மூலம் சினிமாவில் அறிமுகமான பஹத் பாசில், அந்த திரைப்படம் தோல்வி அடைந்ததன் காரணமாக அடுத்த 7 ஆண்டுகள் சினிமாவை விட்டு விலகி தனது படிப்பில் கவனம் செலுத்தியதாக கூறினார்.  பின்னர், மீண்டும் 2009  ஆம் ஆண்டு சினிமாவிற்குள் ரீ என்ட்ரி கொடுத்த பஹத் பாசில் அடுத்த 17 ஆண்டுகளில் 66 படங்கள் வரை நடித்து சினிமாவில் தனக்கென தனி இடத்தை பிடித்த அனுபவங்களையும் பகிர்ந்து கொண்டார்.  

பெங்களூரு நாட்கள் படத்தின் போது நஸ்ரியாவுடன் தனக்கு ஏற்பட்ட காதல் அனுபவங்களை பகிர்ந்து கொண்ட பஹத் பாசில், விரைவில் நஸ்ரியாவுடன் மீண்டும் இணைந்து நடிக்க வாய்ப்புள்ளதாகவும் தெரிவித்தார்.

மேலும், மாமன்னன், மாரீசன் படங்களில் வைகைப்புயல் வடிவேலுவுடன் நடித்தது மிகுந்த சந்தோசம் அளித்ததாக  கூறிய அவர், வடிவேலு மிக சிறந்த குணசித்திர நடிகர் எனவும் பாராட்டினார். 

தொடர்ந்து, தனக்கு பிடித்த பழம் பெரும் தமிழ் நடிகர்கள்  எம்.ஆர்.ராதா மற்றும் சந்திராபாபு பற்றிய அனுபவங்களையும் பஹத் பாசில் பகிர்ந்து கொண்டார்.