இயக்குநர் பா.ரஞ்சித் - சந்தோஷ் நாராயணன் கூட்டணி முடிவுக்கு வருகிறதா?

தமிழ் சினிமாவின் வெற்றிக்கூட்டணியான இயக்குனர் பா.ரஞ்சித் - இசையமைப்பாளர் சந்தோஷ் நாராயணன் கூட்டணி பிரிந்துள்ளதாக தகவல்கள் வெளியாகியுள்ளது.

சந்தோஷ் நாராயணன் - இயக்குனர் பா. ரஞ்சித்

தமிழ் திரையுலகின் முன்னணி இயக்குனராக வலம் வருபவர் பா.ரஞ்சித். அதேபோல, தமிழ் திரையுலகின் இன்று அனைவரையும் ஈர்க்கும் விதத்தில் பாடல்களை உருவாக்கும் இசையமைப்பாளராக வலம் வருபவர் சந்தோஷ் நாராயணன். இவர்கள் இருவரும் அட்டகத்தி என்ற திரைப்படத்தின் மூலமாகவே தமிழ் திரையுலகில் அறிமுகமானர்.

சந்தோஷ் நாராயணனின் மகள் தீ பிரபல ராப் பாடகர் தெருக்குரல் அறிவுடன் இணைந்து சமீபத்தில் எஞ்சாய், எஞ்சாமி என்ற பாடலை எழுதி பாடி வெளியிட்டனர். தமிழில் முதன்முதலில் வேறு எந்த ஆல்பம் பாடலும் பெறாத வரவேற்பை இந்த பாடல் பெற்றது. யூ டியூப்பிலும் 100 மில்லியன் பார்வையாளர்களை கடந்து பெரும் வரவேற்பை பெற்றது.

இந்த நிலையில், சமீபத்தில் எஞ்சாய், எஞ்சாமி பாடலின் வெற்றிக்காக வெளியிடப்பட்ட விளம்பரத்தில் சந்தோஷ் நாராயணனின் மகள் தீ-க்கு மட்டுமே முக்கியத்துவம் அளிக்கப்பட்டு இருந்தது. அந்த பாடலின் வெற்றியில் தீயின் அளவிற்கு சம பங்காற்றிய அறிவுக்கு முக்கியத்துவம் அளிக்கப்படாதது பலருக்கும் அதிர்ச்சியை ஏற்படுத்தியது. திட்டமிட்டே அறிவை இந்த விளம்பரத்தில் ஓரங்கட்டியதாக தகவல்களும் வெளியானது.

இதையடுத்து, உடனடியாக இயக்குனர் ரஞ்சித் இந்த செயலுக்கு தனது கண்டனத்தை டுவிட்டரில் பதிவிட்டார். தெருக்குரல் அறிவு இயக்குனர் ரஞ்சித்தின் கேஸ்ட்லஸ் கலெக்டிவ்-விலும், நீலம் பண்பாட்டு மையத்தின் பல்வேறு நிகழ்ச்சிகளிலும் பாடல்களை எழுதி பாடி வருபவர். இயக்குனர் ரஞ்சித் வெளிப்படையாக தனது கண்டனத்தை பதிவு செய்தது சந்தோஷ் நாராயணனுக்கும், அவருக்கும் மோதல் போக்கை ஏற்படுத்தியுள்ளதாக தகவல்கள் வெளியாகியுள்ளது.

இதன் காரணமாக, பா.ரஞ்சித் முழுக்க முழுக்க உருவாக்கி வரும் காதல் திரைப்படமான “நட்சத்திரங்கள் நகர்கிறது” படத்திற்கு புதிய இசையமைப்பாளர் பணிபுரிய உள்ளதாக தகவல்கள் வெளியாகியுள்ளது. எஞ்சாயி எஞ்சாமி பாடல் வெற்றி விளம்பரத்தில் ஏற்பட்ட கருத்து மோதல் காரணமாகவே இந்த முடிவு எடுக்கப்பட்டுள்ளதாக தகவல்கள் வெளியாகியுள்ளது.

அதேசமயத்தில், இயக்குனர் பா.ரஞ்சித் முழுக்க முழுக்க புதிய கலைஞர்களுடன் பணியாற்றுவதன் காரணமாகவே இந்த படத்திற்கும் புதிய இசையமைப்பாளருடன் பணியாற்ற பா.ரஞ்சித் திட்டமிட்டிருப்பதாகவும் தகவல்கள் வெளியாகியுள்ளது. ரசிகர்களின் ஆஸ்தான வெற்றிக்கூட்டணியான பா.ரஞ்சித் – சந்தோஷ் நாராயணன் பிரிந்திருப்பது ரசிகர்கள் மத்தியில் மிகுந்த வேதனையை ஏற்படுத்தியுள்ளது.

இதையடுத்து, சந்தோஷ் நாராயணன் பல படங்களுக்கு இசையமைத்து முன்னணி இசையமைப்பாளராக தமிழ் திரையுலகில் கோலோச்சி வருகிறார். கானா இசை, மேற்கத்திய இசை, மெல்லிசை என அவர் படங்களுக்கு படங்களுக்கு தனது இசையிலும், பாட்டிலும், பின்னணி இசையிலும் காட்டும் புதுமை அவருக்கு ஏராளமான ரசிகர்களை உருவாக்கித் தந்துள்ளது.

இயக்குனர் ரஞ்சித் இயக்கிய அட்டகத்தி படம் மட்டுமின்றி மெட்ராஸ், கபாலி, காலா மற்றும் சமீபத்தில் வெளியான சார்பட்டா பரம்பரை ஆகிய 5 படங்களுக்கும் சந்தோஷ் நாராயணனே இசையமைத்திருந்தார்.