Cinema Headlines: பிரதமர் மோடியாக சத்யராஜ்.. கவின் நடிக்கும் மாஸ்க்.. சினிமா செய்திகள் இன்று!

Cinema Headlines: கோலிவுட் வட்டாரத்தில் இன்று நடைபெற்ற முக்கிய நிகழ்வுகளின் தொகுப்பு..

சினிமா செய்திகள்

ஆண்ட்ரியா - வெற்றிமாறன் உடன் இணையும் அடுத்த படத்தின் தலைப்பு.. கவின் தந்த மாஸ் அப்டேட்!

தமிழ் சினிமாவின் வளர்ந்து வரும் நடிகர்களில் ஒருவரான கவின் நடிப்பில் கடந்த வாரம் வெளியான ஸ்டார் படம் நல்ல வரவேற்பைப் பெற்று வருகிறது. அடுத்ததாக இவர் நடிக்கும் படங்களின் அப்டேட் அடுத்தடுத்து வெளியாகி வரும் நிலையில், ஆண்ட்ரியா ஜோடியாக, வெற்றிமாறன் தயாரிப்பில் கவின் நடிக்கும் அடுத்த பட அப்டேட் வெளியாகியுள்ளது. இப்படத்துக்கு மாஸ்க் எனப் பெயரிடப்பட்டுள்ள நிலையில், விக்ரமன் அசோக் இப்படத்தை இயக்குகிறார். ஜி.வி.பிரகாஷ் இசையமைக்கிறார்.

அப்போது பெரியார்! இப்போது மோடி! அதிர்ச்சி கொடுத்த சத்யராஜ்! விளக்கம் கொடுத்த மகள் திவ்யா!

பிரதமர் நரேந்திர மோடியின் பயோபிக்கில் நடிகர் சத்யராஜ் பிரதமர் மோடி பாத்திரத்தில் நடிப்பதாகத் தகவல்கள் பரவி வரும் நிலையில், இதுகுறித்து அவரது மகள் திவ்யா விளக்கமளித்துள்ளார். பெரியார் திரைப்படத்தில் நடித்தவரும், திராவிட அரசியல் கருத்துகளில் ஈடுபாடு கொண்டவருமான சத்யராஜ் பிரதமர் மோடியாக நடிப்பதாக வெளியான தகவல் அவரது ரசிகர்களை அதிருப்திக்குள்ளாக்கியுள்ளது. இந்நிலையில், இந்தப் படம் தொடர்பான அதிகாரப்பூர்வ அறிவிப்பு அடுத்த வாரம் வெளியாகும் என்றும், கொள்கை ரீதியாக பார்ப்பதை விட கேரக்டராக படத்தினைப் பார்க்குமாறும் அவரது மகள் திவ்யா சத்யராஜ் விளக்கமளித்துள்ளார்.

கவின், சந்தானம், சுந்தர் சி.. சம்மர் பாக்ஸ் ஆஃபிஸ் ரேஸில் முந்துவது யார்? வசூல் நிலவரம்!

சம்மர் ரிலீஸாக வெளியாகியுள்ள அரண்மனை 4, ஸ்டார், இங்க நான் தான் கிங்கு படங்களின் வசூல் நிலவரங்கள் வெளியாகியுள்ளன. நேற்று வெளியான சந்தானத்தின் ‘இங்க நான் தான் கிங்கு’ படம் முதல் நாளில் ரூ.1 கோடி வசூலித்துள்ளதாக பாக்ஸ் ஆஃபிஸ் தரவுகளைப் பகிரும் சாக்னிக் தளம் பகிர்ந்துள்ளது. சென்ற வாரம் வெளியான கவினின் ‘ஸ்டார்’ திரைப்படம் இதுவரை ரூ.18 கோடிகளை வசூலித்துள்ளதாகவும்,
சுந்தர்.சி இயக்கத்தில் தமன்னா, ராஷி கண்ணா உள்ளிட்டோர் நடிப்பில் வெளியாகியுள்ள ‘அரண்மனை 4’ திரைப்படம் உலக அளவில் இதுவரை ரூ70 கோடிகளை வசூலித்துள்ளதாகவும் தகவல்கள் வெளியாகியுள்ளன.

கார்த்திக் ஆர்யனின் அசரவைக்கும் ட்ரான்ஸ்பர்மேஷன்... பயோபிக் படத்துக்காக 18 கிலோ எடை குறைப்பு 

பிரபல பாலிவுட் நடிகர் கார்த்திக் ஆர்யன் பயோபிக் படத்துக்காக 18 கிலோ குறைத்து ஆள் அடையாளம் தெரியாமல் மாறிப்போயுள்ளது சினிமா வட்டாரத்தினரை ஆச்சர்யத்தில் ஆழ்த்தியுள்ளது. பாராஒலிம்பிக் விளையாட்டில் முதன்முதலில் தங்கப் பதக்கம் வென்று சாதனை படைத்த முரளிகாந்த் பெட்காவின் வாழ்க்கை வரலாற்றுப் படமாக உருவாகி வருகிறது ‘சந்து சாம்பியன்’ இந்நிலையில் இந்தப் படத்தில் நடித்து வரும் கார்த்திக் ஆர்யன், உடல் கொழுப்பை 32 சதவீதம் வரை குறைத்தும், உடல் எடையை 18 கிலோ வரை குறைத்தும் தலைகீழ் ட்ரான்ஸ்ஃபர்மேஷன் காண்பித்துள்ளது பாலிவுட் ரசிகர்கள் மத்தியில் பேசுபொருளாகியுள்ளது.