Nayanthara | அடுத்து மாஸ் ஹீரோவுடன் ஜோடி.. விரைவில் ஷூட்டிங்.. பிஸியோ பிஸி நயன்தாரா!

நயன்தாராவின் அடுத்த படம் குறித்த தகவல் கசிந்துள்ளது.

லேடி சூப்பர்ஸ்டார் நயன்தாரா

விக்னேஷ் சிவன் இயக்கத்தில் நயன்தாரா, விஜய் சேதுபதி, சமந்தா உள்ளிட்ட முன்னணி நட்சத்திரங்களின் நடிப்பில் உருவாகி வரும் திரைப்படம் ‘காத்துவாக்குல ரெண்டு காதல்’. இந்த படத்திற்கு முன்னதாக விக்னேஷ் சிவன் இயக்கத்தில் , நயன்தாரா மற்றும்  விஜய் சேதுபதி நடிப்பில் உருவாகியிருந்த திரைப்படம் ’நானும் ரவுடிதான்’. நயன்தாரா நடிப்பில் விக்னேஷ் சிவன் தயாரிப்பில் சமீபத்தில் ஒடிடியில் வெளியான ‘நெற்றிக்கண்’ திரைப்படம் ரசிகர்கள் மத்தியில் நல்ல வரவேற்பை பெற்றது. குறிப்பாக நயன்தாராவின்  நடிப்பை ரசிகர்கள் பாராட்டி தள்ளினர். 

இந்நிலையில் தற்போது அட்லீ - ஷாருக்கான் இணைந்துள்ள திரைப்படத்தில் நடித்து வருகிறார் நயன்தாரா. தற்போது புனேவில் ஷூட்டிங் நடைபெற்று வருவதாகவும், அதில் நயன்தாரா பங்கேற்று நடித்து வருவதாகவும் கூறப்படுகிறது. சமீபத்தில் நயன்தாரா பங்கேற்ற ஷூட்டிங் ஸ்பாட் போட்டோ இணையத்தில் வைரலானது. இந்நிலையில் நயன்தாராவின் அடுத்த படம் குறித்த தகவல் கசிந்துள்ளது. பிரேமம் பட இயக்குநர் அல்போன்ஸ் புத்திரனும் பிரித்திவிராஜும் இணையும் கோல்ட் படத்தில் விரைவில் நயன்தாரா இணையவுள்ளதாக கூறப்படுகிறது. அட்லீ படத்தின் முதற்கட்ட ஷூட்டிங்கை முடித்துவிட்டு கோல்ட் படத்தில் நயன்தாரா இணைவார் எனக் கூறப்படுகிறது.

 அல்போன்ஸ் புத்திரன் இயக்கும் இப்படத்தை பிரித்திவிராஜின் தயாரிப்பு நிறுவனமே தயாரிக்கும் என கூறப்படுகிறது. பிரித்திவிராஜின் தயாரிப்பு நிறுவனத்தை அவரது மனைவி சுப்ரியா மேனன் நிர்வகித்து வருகிறார். நயன்தாரா நடிப்பது உறுதி என்றால் பிரித்திவிராஜ் - நயன்தாரா ஜோடியை முதல்முறையாக திரையில் காணலாம் என ரசிகர்கள் ஆவலாக உள்ளனர்.

பிரித்திவிராஜ் நடிப்பில் சமீபத்தில் மலையாளத்தில் வெளியானது கோல்டு கேஸ் மற்றும் குருதி.இந்த இரண்டு படங்களுமே ஓடிடியில் தான் வெளியானது. அடுத்தப்படியாக, பஹீரின் நீலவெளிச்சம் கதையை மையமாகக் கொண்டு எடுக்கப்படும் ஒரு திரைப்படம் உள்ளிட்ட சில படங்களில் தற்போது பிரித்திவிராஜ்  நடித்து வருகிறார். இதற்கிடையே மோகன்லாலை வைத்து திரைப்படம் ஒன்றையும் இயக்கவுள்ளார். ஏற்கெனவே மோகன்லாலை வைத்து லூசிபையர் திரைப்படத்தை பிரித்திவிராஜ் இயக்கி இருந்தார். அது சூப்பர் டூப்பர் ஹிட் அடித்தது குறிப்பிடத்தக்கது.

முன்னதாக, நேர்காணல் ஒன்றில் பேசிய மலையாள நடிகர் பிரித்திவிராஜ், அடுத்து பிரேமம் இயக்குநர் அல்போன்ஸ் புத்திரனுடன் கைகோக்க உள்ளதாக தகவலை கசியவிட்டார். அதன்பின்னரே கோல்ட் படம் குறித்த தகவல் பரவத் தொடங்கியது.