VJ Chitra: நடிகை சித்ரா மரண வழக்கில் கணவர் ஹேம்நாத் விடுதலை - நீதிமன்றம் பரபரப்பு தீர்ப்பு

தமிழில் பிரபல நடிகையாக திகழ்ந்த சித்ராவின் மரண வழக்கில், அவரது காதல் கணவர் ஹேம்நாத்தை விடுதலை செய்து நீதிமன்றம் உத்தரவிட்டுள்ளது.

ஹேம்நாத் - விஜே சித்ரா

Source : twitter

தமிழில் திரைப்படங்களில் மட்டுமின்றி சின்னத்திரை நடிகர் மற்றும் நடிகைகளுக்கும் ஏராளமான ரசிகர்கள் உள்ளனர். அந்த வகையில் பிரபலமான சின்னத்திரை நடிகையாக உலா வந்தவர் சித்ரா. இவர் கடந்த 2020ம் ஆண்டு மர்மமான முறையில் ஓட்டல் ஒன்றில் சடலமாக மீட்கப்பட்டார்.

சித்ரா கணவர் விடுதலை:

அவர் தற்கொலை செய்து கொண்டார் என்று தகவல்கள் வெளியான நிலையில், அவரது மரணத்தில் சந்தேகம் இருப்பதாக அவரது குடும்பத்தினர் புகார் அளித்தனர். சித்ராவின் மரண வழக்கில் அவரது கணவர் ஹேம்நாத் மீது சந்தேகம் இருப்பதாக சித்ராவின் குடும்பத்தினர் புகார் அளித்திருந்தனர்.

இந்த சூழலில், அவரது மரண வழக்கில் அவரது கணவர் ஹேம்நாத் விடுவிக்கப்படுவதாக திருவள்ளூர் மகளிர் நீதிமன்றம் உத்தரவிட்டுள்ளது.  ஹேம்நாத்திற்கு எதிராக உரிய ஆதாரங்கள் சமர்ப்பிக்கப்படவில்லை என்றும் நீதிபதி கூறினார்.

தற்கொலையா? கொலையா?

தமிழில் பிரபலமான தொலைக்காட்சிகளில் ஒன்றாக திகழ்வது விஜய் தொலைக்காட்சி. விஜய் தொலைக்காட்சியில் ஒளிபரப்பான தொடர் பாண்டியன் ஸ்டோர்ஸ். இந்த தொடர் தமிழ் ரசிகர்கள் மத்தியில் மிக மிக பிரபலமான தொடர் ஆகும். இந்த தொடரில் நாயகியாக நடித்தவர் சித்ரா. இவர் நடித்த முல்லை என்ற கதாபாத்திரம் ரசிகர்கள் மத்தியில் மிக மிக வரவேற்பை பெற்றது ஆகும். இந்த சூழலில், கடந்த 2020ம் ஆண்டு டிசம்பர் மாதம் அவர் சென்னையை அடுத்த நசரத்பேட்டையில் உள்ள தனியார் நட்சத்திர விடுதியில் சடலமாக மீட்கப்பட்டார்.

2013ம் ஆண்டு நிகழ்ச்சித் தொகுப்பாளராக தனது வாழ்க்கையை தொடங்கிய அவர் தமிழின் பிரபல தொலைக்காட்சிகளான ஜெயா டிவி, ஜீ தமிழ் தொலைக்காட்சிகளிலும் பணியாற்றியவர். இவர் உயிரிழந்த சம்பவம் தமிழ்நாடு முழுவதும் பெரும் பரபரப்பை ஏற்படுத்தியது.

படப்பிடிப்பிற்காக ஹோட்டலில் தங்கியிருந்த சித்ராவுடன் அவரது காதல் கணவர் ஹேமந்த்குமாரும் தங்கியிருந்தார். ஹேமந்த்குமார் வௌியே சென்றிருந்த நேரத்தில் உள்ளிருந்து கதவு தாழிட்டிருந்ததால், கதவை திறக்குமாறு சித்ராவை அழைத்துள்ளார். ஆனால், நீண்ட நேரமாகியும் எந்த பதிலும் வராததால் விடுதி ஊழியர் உதவியுடன் மாற்று சாவியை பயன்படுத்தி திறந்து பார்த்தபோது அவர் தூக்கில் சடலமாக தொங்கியுள்ளார்.

இதை வழக்காக போலீசார் பதிவு செய்தபோது பல்வேறு திடுக்கிடும் தகவல்கள் வெளியானது. இருவரும் ஏற்கனவே பதிவுத்திருமணம் செய்து கொண்டதாக தெரியவந்தது. ஹேம்நாத் மீது சித்ரா குடும்பத்தினர் அளித்த புகாரின் பேரில் அவரை காவல்துறை கைது செய்தது. பின்னர், அவர் மீது குற்றப்பத்திரிகை தாக்கல் செய்யாததால் அவருக்கு நீதிமன்றம் ஜாமின் வழங்கியது. இந்த வழக்கு தொடர்ந்து நடந்து வந்த நிலையில், அவரை விடுதலை செய்து நீதிமன்றம் இன்று உத்தரவிட்டுள்ளது.